ရီးယဲလ်မက်ဒရစ်အသင်းနည်း ပြဇီဒန်းက အသင်း၏အဓိက ကစားသမား (၂)ဦးဖြစ်သော တိုက်စစ်မှူးဘန်ဇီမာနှင့် တောင်ပံကစားသမားဟာဇက်တို့အနေဖြင့် ဒဏ်ရာပြဿနာများမှ ပြန်လည်ကောင်းမွန်သက်သာလာပြီ ဖြစ်သော်လည်း ပွဲကစားနိုင်မည့်အချိန်ကို အတိအကျမပြောနိုင်သေးကြောင်း ဆိုခဲ့သည်။
ရီးယဲလ်အသင်းသည် လာမည့် ရက်သတ္တပတ်အတွင်း မက်ဒရစ်ဒါဘီ အပါအဝင်၊ ချန်ပီယံလိဂ်ပွဲစဉ်များနှင့် ပွဲကျပ်ကာလကို ဖြတ်သန်းရမည်ဖြစ်ရာ အဓိကတိုက်စစ်မှူးဖြစ်သည့် ဘန်ဇီမာနှင့် တောင်ပံကစားသမားဟာဇက်တို့ အသင်းတွင်ပြန်လည်ကစားနိုင်စေရန် ပရိသတ်များက ဆန္ဒရှိနေခြင်းဖြစ်သည်။
ယင်းကစားသမားများ၏ ဒဏ်ရာအခြေအနေနှင့်ပတ်သက်ပြီး မီဒီယာများ၏မေးမြန်းမှုကို ဇီဒန်းက ၎င်းကစားသမား (၂)ဦးအနေဖြင့် ဒဏ်ရာအခြေအနေများမှ ကောင်းမွန်လာပြီဖြစ်သော်လည်း ပွဲကစားရန်အသင့်မဖြစ်သေးကြောင်း ပြောကြားခဲ့ခြင်းဖြစ်သည်။
ဇီဒန်းက “ဘန်ဇီမာနဲ့ ဟာဇက်က အခြေအနေအကောင်းမွန်လာပါပြီ။ ဒါပေမဲ့ ပွဲကစားဖို့အသင့်ဖြစ်တယ်လို့ ကျွန်တော်မထင်ပါဘူး။ ကျွန်တော် ဘယ်နေ့မှာ သူတို့ပြန်ကစားနိုင်မယ်ဆိုတာ အတိအကျမပြောနိုင်ပါဘူး။ သူတို့ (၂)ဦးစလုံး ပြန်လည်သက်သာ ဖို့အချိန်ကြာကြာအနားယူခဲ့ရလို့ ဘယ်သူပြန်လည်ဖို့အသင့်ဖြစ်ပြီလဲဆိုတာ မသိနိုင်ပါဘူး” ဟုပြောကြားခဲ့သည်။
ဘန်ဇီမာသည် ယခုရာသီတွင်ရီးယဲလ်အသင်းအတွက် လာလီဂါသွင်းဂိုး (၁၂)ဂိုးအပါအဝင်ပြိုင်ပွဲစုံ (၁၇)ဂိုး သွင်းယူပေးထားသူဖြစ်ပြီး ဟာဇက်မှာလည်း ပါဝင်ကစားခွင့်ရသည့်ပွဲများတွင် ခြေစွမ်းပြနေသူဖြစ်သည်။
