အဲဗာတန်အသင်းသည် လစ်လပ်လျက်ရှိနေသော အသင်းနည်းပြရာထူးနေရာအတွက် စပိန်လူမျိုးနည်းပြ ဘင်နီတက်ဇ်အား ခန့်အပ်ရန် နီးစပ်လျက်ရှိနေသော်လည်း အသင်းအားပေးသူပရိသတ်များထံမှ ကြီးမားသည့်ကန့်ကွက်မှုများကို ရင်ဆိုင်နေရကြောင်းသိရှိရသည်။
အဲဗာတန်အသင်းသည် ရီးယဲလ်မက်ဒရစ်အသင်းနည်းပြအဖြစ်တာဝန်ယူရန် အသင်းမှနုတ်ထွက် သွားသော အီတလီလူမျိုးနည်းပြ အန်ဆယ်လော့တီ၏နေရာ၌ အစားထိုးရန် နည်းပြများစွာကို ဆက်သွယ်ခဲ့သည်။ အဲဗာတန်အသင်းအဓိကရှယ်ယာရှင်ဖြစ်သူ ဖာဟတ်ဒ်မိုရှီရီသည် ဘင်နီတက်ဇ်အား သဘောကျနှစ်သက်သူတစ်ဦးဖြစ် ပြီး ၎င်းကို နည်းပြသစ်အဖြစ် ခန့်အပ်နိုင်ရန် ကြိုးပမ်းနေခြင်းဖြစ်သည်။
သို့သော် ဘင်နီတက်ဇ်သည် အဲဗာတန်အသင်း၏ ခါးသီးသောမြို့ခံပြိုင်ဘက် လီဗာပူးလ်အသင်းကိုကိုင်တွယ်ခဲ့သည့် နည်းပြတစ်ဦးဖြစ်ရာ အဲဗာတန်အသင်းပရိသတ်အချို့သည် ၎င်းအား အဲဗာတန်အသင်းနည်းပြအဖြစ် မြင်တွေ့လိုခြင်းမရှိ ကြောင်း သိရှိရသည်။ လီဗာပူးလ်အသင်းအား ဘင်နီတက်ဇ် ကိုင်တွယ်ခဲ့စဉ် ၂၀၀၇ ဖေဖော်ဝါရီလအတွင်းက ပြောကြားခဲ့သောစကားတစ်ခွန်းကို ယနေ့တိုင် အဲဗာတန်ပရိသတ်များက အမှတ်ရနေဆဲဖြစ်ပြီး ၎င်းအပေါ် အခဲမကျေသေးကြောင်း ဗြိတိန်သတင်းစာ Daily Mail က ဖော်ပြခဲ့သည်။
ထိုစဉ်က လီဗာပူးလ်အသင်းနှင့် အဲဗာတန်အသင်းတို့သည် မာဆေးဆိုက်ဒ်ဒါဘီပွဲအဖြစ် ယှဉ်ပြိုင်ခဲ့ကြပြီး ဂိုးမရှိသရေကျခဲ့သည်။ ယင်းပွဲအပြီးတွင် ဘင်နီတက်ဇ်က အဲဗာတန် အသင်းကို ပြင်းထန်သည့်စကားလုံးများဖြင့် ဝေဖန်ပြောကြားခဲ့ပြီး ယင်းစကားအတွက် အဲဗာတန်ပရိသတ်များ အလွန်အမင်းဒေါသထွက်ခဲ့ကြသည်။ ဘင်နီတက်ဇ်သည် လီဗာပူးလ်အသင်း နည်းပြအဖြစ် ၂၀၀၄ ခုနှစ်မှ ၂၀၀၈ ခုနှစ်အထိ ဆောင်ရွက်ခဲ့ပြီး အသင်းအတွက် ပရီးမီးယားလိဂ်ဖလား ရယူမပေးနိုင်ခဲ့သော်လည်း ချန်ပီယံလိဂ်၊ FA ဖလားနှင့် ဥရောပစူပါဖလားတို့ကို ရယူပေးနိုင်ခဲ့သည်။
ဘင်နီတက်ဇ်သည် လီဗာပူးလ်အသင်းနှင့် လမ်းခွဲခဲ့ပြီးနောက် အင်တာမီလန်၊ ချယ်လ်ဆီး (ယာယီ)၊ နာပိုလီ၊ ရီးယဲလ် မက်ဒရစ်၊ နယူးကာဆယ်၊ ဒါလီယန်အစရှိသော ကလပ်အသင်း များကို ကိုင်တွယ်ခဲ့သည်။ ယခုနှစ်ဇန်နဝါရီလအတွင်း တရုတ် စူပါလိဂ်ကလပ် ဒါလီယန်အသင်းနှင့် လမ်းခွဲပြီးနောက်တွင် ဘင်နီတက်ဇ်သည် အသင်းလက်မဲ့ဖြစ်နေပြီး အဲဗာတန်အသင်း ရှယ်ယာရှင် မိုရှီရီက ၎င်းကိုခေါ်ယူနိုင်ရန် ကြိုးပမ်းနေခြင်းဖြစ်သည်။
အဲဗာတန်အသင်းသည် လာမည့်ရာသီကြို ပြင်ဆင်မှုများ ကို ဇူလိုင် (၅)ရက်နေ့တွင် ပြန်လည်စတင်ရန် စီစဉ်ထားရာ ယင်း နေ့ရက်မတိုင်မီ နည်းပြသစ်အား အမြန်ဆုံးခန့်အပ်နိုင်ရန် လိုအပ်နေသည်။
