ယခု စက်တင်ဘာ(၂၉)ရက် (အင်္ဂါနေ့)တွင် ပရီးမီးယားလိဂ်ကလပ်အသင်းများမှ တာဝန်ရှိသူများသည် ဆွေးနွေးပွဲတစ်ခု ပြုလုပ်သွားမည်ဖြစ်ပြီး ဗြိတိန်အစိုးရက ပရိသတ်များကို ပွဲပြန်ကြည့်ခွင့်မပေးခြင်းနှင့် အခြားကြုံတွေ့ရမည့်ဘဏ္ဍာရေး အခက်အခဲများအတွက် ဆွေးနွေးသွားမည်ဖြစ်ကြောင်း သိရသည်။
ဗြိတိန်အစိုးရက လက်ရှိတွင် အရှိန်မြင့်နေသော ကိုရိုနာဗိုင်းရပ်စ်ရောဂါပိုးကူးစက်မှုကြောင့် အင်္ဂလန်ရှိဘောလုံးပွဲများတွင် ကွင်းအတွင်း ပရိသတ်များလာရောက်ကြည့်ရှုခြင်းကို လာမည့် ၂၀၂၁ ခုနှစ်၊ မတ်လအထိခွင့်ပြုဦးမည်မဟုတ်ကြောင်း ကြေညာခဲ့သည်။
မူလက ပရီးမီးယားလိဂ်ကလပ်အသင်းများအပါအဝင် အင်္ဂလန်ရှိလိဂ်အသင်းများမှာ လာမည့်အောက်တိုဘာလအတွင်း ကွင်းအတွင်းသို့ ပရိသတ်များပြန်လည်ရောက်ရှိစေရန် မျှော်လင့်နေကြပြီး ယခုရာသီအကြိုနှင့်ရာသီအစကာလများတွင် ပရိသတ်အချို့ကို(ပမာဏအကန့်အသတ်ဖြင့်)စမ်းသပ်ကြည့်ရှုခွင့်ပေးသည့်ပွဲများ(Pilot Games) ကစားခဲ့ကြသည်။
ယခု ပရိသတ်များကွင်းအတွင်း ပြန်လည်ဝင်ရောက်ခွင့်ပြုမည့်အချိန်မှာ နောက်ဆုတ်သွားပြီဖြစ်ရာ ကလပ်အသင်းများအနေဖြင့် ကွင်းဝင်ကြေးများ ဆက်လက်နစ်နာမည်ဖြစ်သည်။
ထို့ပြင် ပရီးမီးယားလိဂ်အသင်းများအနေဖြင့် ယမန်နှစ် ဘောလုံးရာသီက ရရှိသောဝင်ငွေ(ရုပ်သံကြေးနှင့် အခြားဆုကြေးများ)ထဲမှ အချို့(၁၀.၇%)ကိုလည်း ရုပ်သံလျော်ကြေးအဖြစ် ပေးခဲ့ရသလို၊ ဘဏ္ဍာရေးအကျပ်အတည်းကြုံတွေ့နေရသော အောက်တန်းလိဂ်(လိဂ်ချန်ပီယံရှစ်၊ League One ၊ League Two) (၃)ခုကိုလည်း ငွေကြေးထောက်ပံ့ကူညီရဖွယ် ရှိနေသည်။
အင်္ဂလန်ဘောလုံးလိဂ်အဖွဲ့ချုပ်လက်အောက်တွင်ရှိသော ကလပ်အသင်း(၇၂)သင်းပါ ယင်းလိဂ်(၃)ခုသည် ၎င်းတို့ ဆက်လက်ရပ်တည်လည်ပတ်နိုင်ရန်အတွက် ပေါင်သန်း (၂၀၀)နှင့်(၂၅၀)ကြား ရန်ပုံငွေလိုအပ်သည်ဟု ဗြိတိန်အစိုးရထံ တင်ပြထားပြီး ငွေကြေးအင်အားတောင့်တင်းသော ပရီးမီးယားလိဂ်အဖွဲ့ချုပ်ထံမှ ကူညီမှုကို မျှော်လင့်နေသည်။
သို့သော် ပရီးမီးယားလိဂ်အသင်းများကိုယ်တိုင် ပရိသတ်များ ကွင်းအတွင်းသို့ ဝင်ရောက်ခွင့်မရခြင်းကြောင့် ကွင်းဝင်ကြေး ဝင်ငွေများစွာ ထိခိုက်နစ်နာမည်ဖြစ်ပြီး စုစုပေါင်းနစ်နာမည့်ငွေ ပေါင်သန်း(၈၀၀)ခန့်ရှိနိုင်ကြောင်းသိရသည်။
ပရိသတ်များ ကွင်းအတွင်းသို့ရောက်ရှိမလာခြင်းကြောင့် ကလပ်အသင်းများအနေဖြင့် ကွင်းဝင်ကြေးသက်သက်သာ နစ်နာဆုံးရှုံးသည်မဟုတ်ဘဲ ကစားသမားများ၏ အင်္ကျီများနှင့် အမှတ်တရပစ္စည်းများရောင်းချမှုမှ ရရှိမည့်ဝင်ငွေများလည်း တစ်စိတ်တစ်ပိုင်း နစ်နာဆုံးရှုံးမည်ဖြစ်သည်။
