မန်ယူနှင့်ကစားသည့် ကာရာဘောင်ဖလားဗိုလ်လုပွဲမတိုင်မီတွင် နယူးကာဆယ်ကစားသမားများ အနေဖြင့် ဗိုလ်လုပွဲများတွင် ကစားသည့်အလေ့အကျင့်များများရရန် လိုအပ်ကြောင်း ဟောင်ဝီက ပြောဆိုလိုက်သည်။
နယူးကာဆယ်သည် မည်သည့်ဗိုလ်လုပွဲသို့မျှ မတက်ဖူးသည်မှာ ၂၄ နှစ်ရှိပြီဖြစ်ပြီး ၁၉၆၉ ခုနှစ်တွင် နောက်ဆုံးတစ်ကြိမ်ဆုဖလားအဖြစ် အင်တာစီးတီးပြိုင်ပွဲတွင် ဗိုလ်စွဲခဲ့သည်။ အောက်တိုဘာ ၂၀၂၁ တွင် ပိုင်ရှင်အပြောင်းအလဲဖြစ်ပြီးနောက် ကစားသမားအင်အားကောင်းလာသော နယူးကာဆယ်သည် ဆုဖလားဆွတ်ခူးနိုင်ရန် အားခဲလာခဲ့သလို လက်ရှိအချိန််တွင်လည်း ပရီးမီးယားလိဂ် အဆင့် ၅ နေရာတွင် ရပ်တည်နေနိုင်သဖြင့်လာမည့်နှစ်တွင် ချန်ပီယံလိဂ်ဝင်ခွင့်ရရန် မျှော်လင့်နေသည်။
ဟောင်ဝီက ၂၀၂၁ အောက်တိုဘာတွင် မန်နေဂျာအဖြစ်ခန့်အပ်ပြီးနောက် တန်းမဆင်းရရေး ရုန်းကန်နေရသော နယူးကာဆယ်သည် ပြီးခဲ့သည့်ဘောလုံးရာသီအကုန်တွင် အဆင့် ၁၁ နေရာ၌ ရပ်တည်နေနိုင်ခဲ့သည်။ နယူးကာဆယ်အနေဖြင့် ကာရာဘောင်ဖလားဗိုလ်လုပွဲသို့ တက်ရောက်နိုင်ခြင်းသည်ပင်လျှင် များစွာတိုးတက်လာခြင်းအဖြစ် သုံးသပ်ရမည်ဖြစ်ကြောင်း သတင်းများက ဆိုသည်။
ဟောင်ဝီကမူ ဗိုလ်လုပွဲသို့ တက်ရောက်ခြင်းသည် နယူးကာဆယ်အတွက် အထူးအဆန်းမဟုတ်တော့ပဲ သာမန်ကိစ္စတစ်ရပ်ကဲ့သို့ သဘောထားနိုင်သည်အထိ တိုးတက်မှုရှိရန် လိုအပ်ကြောင်း ပြောဆိုလိုက်သည်။
ကာရာဘောင်ဖလားဗိုလ်လုပြွတွင် နယူးကာဆယ်ကို အားပေးရန် အတွက် လန်ုဒန်တွင် စုဝေးနေကြသော အသင်းပရိသတ်များ
“နယူးကာဆယ်အနေနဲ့ ဗိုလ်လုပွဲကို တက်နိုင်တယ်ဆိုတာ တစ်သက်တစ်ခါရတဲ့ အခွင့်အရေးလို့ မမြင်စေချင်ပါဘူး. အသင်းသားတွေအနေနဲ့ ဗိုလ်လုပွဲတက်တာကို အလေ့အကျင့်ရနေဖို့ လိုအပ်ပါတယ်။ တစ်သက်တစ်ခါအခွင့်အရေးလို့မြင်နေရတာက အခုကစားရမယ့် ဗိုလ်လုပွဲအတွက် အလားအလာမကောင်းနိုင်ဘူး။ အနာဂတ်မှာ အလုပ်ကြိုးစားပြီး သတ်မှတ်စည်းကမ်းကို လိုက်နာခြင်းဖြင့် ဗိုလ်လုပွဲတွေကို တက်ရောက်နိုင်အောင် ကြိုးစားရပါမယ်။ အခုခေတ်သစ်တစ်ခုရဲ့အစဖြစ်ပြီး နောက်ပိုင်းမှာ ဗိုလ်လုပွဲတွေကို ပုံမှန်ကစားနိုင်ဖို့ ကြိုးစားရမှာ ဖြစ်ပါတယ်။ ဒီနေ့ပွဲမှာ အနိုင်ရရင်တော့ လျင်မြန်စွာတိုးတက်လာတယ်လို့မြင်ရမှာပါ။ ဒါပေမယ့် ဒီတစ်ကြိမ်ဗိုလ်လုပွဲတက်ခြင်းက တစ်သက်တစ်ခါအခွင့်အရေးဖြစ်ပြီး နောက်ဘယ်တော့မှ ရတော့မှာမဟုတ်ဘူးလို့တော့ မြင်လို့မရပါဘူး”ဟု ဟောင်ဝီက ပြောဆိုလိုက်သည်။
