လီဗာပူးလ်နည်းပြ ယာဂန်ကလော့ပ်က အသင်းဝါရင့်တိုက်စစ်မှူး ဖေမီနိုအားအသင်းတွင် ဆက်ရှိနေစေလိုကြောင်း အတည်ပြုပြောကြားခဲ့သည်။
အသက် (၃၁)နှစ်အရွယ်ရှိ ဘရာဇီးလ်ဝါရင့်တိုက်စစ်မှူး ဖေမီနိုသည် ၂၀၁၅ နွေရာသီတွင် ဟော်ဖန်ဟင်မ်အသင်းမှ လီဗာပူးလ်အသင်းသို့ ပေါင်(၂၉) သန်းဖြင့် ရောက်ရှိလာသူဖြစ်သည်။
၎င်းသည် ကလော့ပ်လက်ထက် ဆုဖလားများရယူခဲ့သည့် လီဗာပူးလ်အသင်းတွင် အဓိကကစားသမားအဖြစ် ခြေစွမ်းပြနိုင်ခဲ့သည်။ ဖေမီနိုသည် ယခုရာသီတွင် ဒဏ်ရာပြဿနာများနှင့် ရုန်းကန်နေရသော်လည်း ပြိုင်ပွဲစုံ (၂၁) ပွဲအထိ ကစားထားပြီး (၉) ဂိုး သွင်းယူထားသည်။
သို့သော် ဖေမီနို၏လက်ရှိစာချုပ်မှာ ယခုရာသီကုန်တွင် သက်တမ်းကုန်ဆုံးမည်ဖြစ်ရာ ကလော့ပ်က ၎င်းကို အသင်းတွင် ဆက်ရှိနေစေလိုကြောင်း ပြောကြားခဲ့ခြင်းဖြစ်သည်။ ကလော့ပ်က “ကျွန်တော် အရင်က ပြောဖူးသလိုပါပဲ။ သူ့ကို အသင်းမှာ ဆက်ရှိနေစေချင်ပါတယ်” ဟု ပြောကြားခဲ့သည်။
လီဗာပူးလ်အသင်းသည် ယခုရာသီကုန်တွင် အသင်းနှင့် စာချုပ်သက်တမ်းကုန်ဆုံးမည့် ကစားသမားများထဲတွင် ချိန်ဘာလိန်၊ ကီတာနှင့် မီလ်နာတို့ကို လက်လွှတ်ဖွယ်ရှိသော်လည်း ဖေမီနိုကိုမူ ၂၀၂၅ ခုနှစ်အထိ သက်တမ်းရှိ စာချုပ်တစ်ရပ်ချုပ်ဆိုရန် ဆွေးနွေးမှုများ ပြုလုပ်နေကြောင်း ဗြိတိန်သတင်းစာ Daily Mail က ဖော်ပြခဲ့သည်။
