ဘောလုံးဝေဖန်သူအဖြစ် ဆောင်ရွက်နေသည့် မန်ယူဂန္ထဝင်နောက်ခံလူ ဂယ်ရီနဗီးလ်က ဘာစီလိုနာကွင်းလယ်လူ ဖရန်ကီဒီယွန်းသာ ချယ်လ်ဆီးအသင်းသို့ ပြောင်းရွှေ့မည်ဆိုပါက မန်ယူအသင်းအတွက် အလွန်အရှက်ရစရာဖြစ်လိမ့်မည်ဟု ပြောကြားခဲ့သည်။
အသက် (၂၅) နှစ်အရွယ်ရှိ နယ်သာလန်လက်ရွေးစင်ကွင်းလယ်ကစားသမား ဒီယွန်းသည် ယခုနွေရာသီအပြောင်းအရွှေ့စျေး ကွက်တွင် မန်ယူနည်းပြ တန်ဟက်ဂ်၏ နံပါတ် (၁) ပစ်မှတ်ကစားသမားအဖြစ် သတ်မှတ်ခံခဲ့ရသူဖြစ်သည်။
ဒီယွန်းသည် အေဂျက်စ်အသင်းတွင် ကစားစဉ်က လက်ရှိမန်ယူနည်းပြ တန်ဟက်ဂ်လက်အောက်တွင် ကစားခဲ့သူဖြစ်ပြီး မန်ယူအသင်းအနေဖြင့် ၎င်းကို ခေါ်ယူရန် အသည်းအသန်ကြိုးပမ်းခဲ့သည်။
မန်ယူအသင်းက ဒီယွန်းအတွက် ပြောင်းရွှေ့ကြေး ပေါင် (၆၃)သန်းဖြင့် ခေါ်ယူရန် ကမ်းလှမ်းမှုကို ဘာစီလိုနာအသင်းက လက်ခံသည့်အခြေအနေအထိ ရောက်ရှိခဲ့သည်။
သို့သော် ဒီယွန်းသည် ဘာစီလိုနာအသင်းတွင် လစာများ ရရှိရန် ကျန်ရှိနေသည့်အတွက် အသင်းမှထွက်ခွာရန် ငြင်းဆန်သလို၊ ချန်ပီယံလိဂ်ဝင်ခွင့် ဆုံးရှုံးထားသည့် မန်ယူအသင်းသို့ ပြောင်းရွှေ့ရန် ဆန္ဒမရှိကြောင်း သိရသည်။
သို့သော် ယခုအခါ ချယ်လ်ဆီးအသင်းအနေဖြင့် ဒီယွန်းကို ပေါင် (၆၈) သန်းဖြင့် ခေါ်ယူရန် သဘောတူညီမှုရခဲ့ပြီဖြစ်ပြီး ကစားသမားနှင့်ညှိနှိုင်းရန်သာလိုတော့ကြောင်း မီဒီယာများက ဖော်ပြနေကြသည်။
ဒီယွန်းနှင့်ပတ်သက်ပြီး ဂယ်ရီနဗီးလ်က ”ဒီယွန်းကိုသာ မခေါ်နိုင်ဘူးဆိုရင် မန်ယူအတွက် ရှက်စရာဖြစ်ပါလိမ့်မယ်။ တကယ်လို့ ဒီယွန်းသာ ချယ်လ်ဆီးကို ရောက်သွားမယ်ဆိုရင်တော့ မန်ယူအတွက် အရမ်းအရှက်ရစရာဖြစ်ပြီး အရမ်းကို ဆိုးရွားပါလိမ့်မယ်။ ဒီယွန်းအနေနဲ့ အရင်က လက်တွဲခဲ့ဖူးတဲ့ နည်းပြဆီ မလာဘဲ ပြိုင်ဘက်အသင်းကို သွားမယ်ဆိုတာ တွေးကြည့်လို့တောင် မရပါဘူး”ဟု ပြောကြားခဲ့သည်။
