ယနေ့ည ကစားရမည့် ဖရန့်ဖွတ်နှင့် ရှုံးထွက်အဆင့်ပွဲစဉ်တွင် အိုဆင်ဟမ်နှင့် ဗာရတ်စကီလီယားတို့ ခြေစွမ်းပြနိုင်မည်ဟု ယုံကြည်ကြောင်း နာပိုလီအသင်းနည်းပြချုပ် စပယ်လက်တီက ထုတ်ဖော်ပြော ဆိုလိုက်သည်။
စီးရီးအေတန်းစီဇယားတွင် ၁၅ မှတ်အကွာဖြင့် ဦးဆောင်နေသော နာပိုလီအသင်းအတွက် လက်ရှိဘောလုံး ရာသီတွင် အိုဆင်ဟမ်နှင့် ဗာရတ်စကီးလီယားတို့က အသင်းကို ဦးဆောင်ခြေစွမ်းပြနေသည်။
ဖရန့်ဖွတ်နှင့်ကစားမည့်ပွဲအကြိုသတင်းစာရှင်းလင်းပွဲတွင် စပယ်လက်တီက “အိုဆင်ဟမ်က ရင့်ကျက်တဲ့ ဘောလုံးသမားတစ်ဦးဖြစ်ပါတယ်။ အိုဆာဆူနာနဲ့ပွဲမှာ သူဒဏ်ရာ ရသွားနိုင်တယ်ဆိုတာကိုသိတဲ့အချိန် ကစားရတာသက်တောင့်သက်သာ မဖြစ်တော့တဲ့ အချိန်မှာ အိုဆင်ဟမ်က မှန်ကန်စွာဆုံးဖြတ်နိုင်ပြီး လူစားလဲဖို့တောင်းဆိုခဲ့ပါတယ်။ ဒီကစားသမားတွေက အခြေအနေကို မှန်မှန်ကန်ကန်သုံးသပ်နိုင်ပါတယ်။ အိုဆင်ဟမ်နဲ့ ဗာရတ်စကီးလီးယားတို့က အခြေအနေကို သုံးသပ်နိုင်သလို လှလှပပလည်း ကစားနိုင်တယ်။ စိတ်ကူးစိတ်သန်းလည်း ကောင်းတယ်။ အားကစားဒါရိုက်တာ နဲ့ အသင်းဥက္ကဌတို့က ကစားသမားအများကြီးထဲကမှ သူတို့နှစ်ယောက်ကို ရွေးချယ်ပြီး နာပိုလီအသင်းအတွက် ခေါ်ယူခဲ့တာက သိပ်ကို မှန်ကန်ခဲ့တယ်လို့ ဆိုရမှာဖြစ်ပါတယ်။ ဖရန့်ဖွတ်နဲ့ပွဲမှာ တိုက်စစ်ကို ရဲရဲဖွင့်ကစားမှာဖြစ်ပါတယ်။ ကြောက်နေစရာ မလိုဘူးဆိုတာကို အိုဆင်ဟမ်တို့ နားလည်ထားပြီးသား ဖြစ်မှာပါ”ဟု စပယ်လက်တီက ထုတ်ပြောလိုက်သည်။
