ဒန်နီယယ်ခန်း က host လုပ်ပြီး အပတ်စဉ် ပြုလုပ်လေ့ ရှိတဲ့ အာဆင်နယ် အသင်းရဲ့ World Cup of Everything အစီအစဉ်မှာ ဒီတစ်ပတ် ဧည့်သည် အဖြစ် လာရောက်ခဲ့သူကတော့ အာဆင်နယ် ကွင်းလယ်လူ မီဆွတ် အိုဇေးလ် ပါ ။
World Cup of Everything အစီအစဉ်ဟာ နယ်ပယ် အစုံက အကြီးအကျယ် အခမ်းနားဆုံးသူတွေကို ရွေးချယ်တဲ့ အစီအစဉ် ဖြစ်ပါတယ် ။ ပြီးခဲ့တဲ့ တစ်ပတ် က ဝီးလော့ နဲ့ နယ်လ်ဆင်တို့ကို ဖိတ်ခေါ်ခဲ့ပြီး ကမ္ဘာ့ အကောင်းဆုံး ရပ်ပါ အဆိုရှင် ကို ရွေးချယ်စေခဲ့ပါတယ် ။
World Cup of Everything အစီအစဉ် ဟာ လာရောက်တဲ့ ဧည့်သည်ကို နာမည်ကျော် နှစ်ဦးထဲက တစ်ဦး ရွေးချယ်စေပြီး ကမ္ဘာ့ဖလား ပြိုင်ပွဲလို ၁၆ သင်း ရှုံးထွက် အဆင့် ၊ ကွာတားဖိုင်နယ် ၊ ဆီမီးဖိုင်နယ် နဲ့ ဗိုလ်လုပွဲ ဆိုပြီး အဆင့်ဆင့် ရွေးချယ်စေတဲ့ အစီအစဉ် တစ်ခုပါ ။
ဒီတစ်ပတ်မှာတော့ ဂျာမနီ အသင်း နဲ့ အတူ ကမ္ဘာ့ဖလား ရခဲ့တဲ့ အိုဇေးလ် ကို ဖိတ်ခေါ် ခဲ့ပြီး ၊ ပြီးခဲ့တဲ့ ၁၀ စုနှစ် အတွင်း ကမ္ဘာ့ အကောင်းဆုံး တိုက်စစ် ကစားသမား ကို ရွေးချယ်စေခဲ့ပါတယ် ။ အိုဇေးလ် ဟာ နာမည်ကျော် တိုက်စစ် ဘောလုံး ကစားသမား ၁၆ ဦးထဲကနေ အဆင့်ဆင့် ရွေးချယ် ပေးခဲ့တာလည်း ဖြစ်ပါတယ် ။
ပထမဦးဆုံး အနေနဲ့ ၁၆ သင်း ရှုံးထွက် အဆင့် ပွဲစဉ် ၈ ပွဲကနေ ကစားသမား ၈ ဦးကို ရွေးချယ်စေခဲ့ပါတယ် ။ ၁၆ သင်း ရှုံးထွက် အဆင့် ပထမဆုံး ပွဲစဉ် အဖြစ် လီဝန်ဒေါစကီး နဲ့ မိုဟာမက် ဆာလက် တို့ နှစ်ဦးထဲက တစ်ဦးကို ရွေးချယ် စေရာ အိုဇေးလ် က လီဝန်ဒေါစကီး ကို ရွေးချယ် ပေးခဲ့ပါတယ် ။အိုဇေးလ် က လီဝန်ဒေါစကီး ကို ရွေးချယ်ရတဲ့ အကြောင်းအရင်းကို ” သူက ထိပ်တန်းအဆင့်မှာ နှစ်တွေ အကြာကြီး ကစားနေသူ ဖြစ်သလို ဂိုးတွေလည်း အများကြီး သွင်းထားသူပါ ။ ဆုဖလားတွေလည်း အများကြီး ရထားပါတယ် ၊ ဒါကြောင့် လီဝန်ဒေါစကီးကိုပဲ ရွေးချယ် ချင်ပါတယ် ။ ”
၁၆ သင်း ရှုံးထွက် အဆင့် ဒုတိယပွဲစဉ်မှာတော့ ဇလာတန် အီဘရာဟီမိုဗစ် နဲ့ ဘန်ဇီးမား တို့ နှစ်ဦး ထိပ်တိုက်တွေ့ခဲ့ပြီး အိုဇေးလ် ကတော့ အသင်းဖော်ဟောင်း ဘန်ဇီမား ကို ရွေးချယ် သွားခဲ့ပါတယ် ။ ” ကျွန်တော် သူ(ဘန်ဇီးမား)နဲ့ လူချင်း အတော်ရင်းနှီးပါတယ်၊သူက တကယ်ကောင်းတဲ့သူပါ ၊ ကျွန်တော် သူနဲ့ တွဲကစားရတာကိုလည်း နှစ်သက်ပါတယ် ။ သူက ဘရာဇီး က ရိုနယ်ဒို လို ကစားသမားပါ ၊ ဂိုးရှေ့မှာဆို အတော်ကောင်းတဲ့သူပါ ။ ကွင်းထဲမှာလည်း အတော် ပါးနပ်ပါတယ် ။ ”
၁၆ သင်း ရှုံးထွက် အဆင့် တတိယ ပွဲစဉ်မှာအင်နီယေစတာ နဲ့ ဂါရက်ဘေးလ် တို့နှစ်ဦး ထိပ်တိုက်တွေ့ခဲ့ကြပြီး အိုဇေးလ် ကတော့ အင်နီယေစတာ ကိုပဲ ရွေးချယ် ပေးခဲ့ပါတယ် ။ နောက်တစ်ပွဲ အဖြစ် မက်ဆီ နဲ့ ဒေးဗစ်ဆေးလ်ဗားတို့ နှစ်ဦးထဲက ရွေးချယ်စေရာ အိုဇေးလ် က မက်ဆီကိုပဲ ရွေးပေးခဲ့ပါတယ် ။
ဆက်လက်ပြီး အိုဇေးလ် က ခရစ္စတီယာနို ရိုနယ်ဒို Vs စတာလင် မှာ ခရစ္စတီယာနို ရိုနယ်ဒို ၊ ဒီမာရီယာ Vs အဂွေးရိုး မှာ ဒီမာရီယာ ၊ နေမာ Vs ဟာဇက် မှာ နေမာ ၊ ရော်ဘင် Vs ဆွာရက်ဇ် တို့မှာ ရော်ဘင် ကို အသီးသီး ရွေးချယ် ပေးခဲ့ပါတယ် ။
ကွာတားဖိုင်နယ် အဆင့်ကို လီဝန်ဒေါစကီး ၊ ဘန်ဇီးမား ၊ အင်နီယေစတာ ၊ မက်ဆီ ၊ ခရစ္စတီယာနို ရိုနယ်ဒို ၊ ဒီမာရီယာ ၊ နေမာ ၊ ရော်ဘင်တို့ တက်ရောက်ခဲ့ကြပါတယ် ။ ကွာတားဖိုင်နယ် ရဲ့ ပထမဆုံး ပွဲမှာတော့ လီဝန်ဒေါစကီး နှင့် ဘန်ဇီးမား တို့ ထိပ်တိုက်တွေ့ခဲ့ကြပြီး အိုဇေးလ်ကတော့ ဘန်ဇီးမား ကို ရွေးချယ် ပေးခဲ့ပါတယ် ။
ကျန်ကွာတားဖိုင်နယ်ပွဲမှာတော့ အင်နီယေစတာ Vs မက်ဆီ ၊ ခရစ္စတီယာနို ရိုနယ်ဒို Vs ဒီမာရီယာ ၊ နေမာ Vs ရော်ဘင် တို့ ထိပ်တိုက် တွေ့ခဲ့ကြပြီး အိုဇေးလ် က မက်ဆီ ၊ ခရစ္စတီယာနို ရိုနယ်ဒို ၊ ရော်ဘင် တို့ကို ရွေးချယ် ပေးခဲ့ပါတယ် ။
ဆီမီးဖိုင်နယ် အဆင့်မှာတော့ ဘန်ဇီးမား နဲ့ မက်ဆီ ၊ ရိုနယ်ဒို နဲ့ ရော်ဘင် တို့ ထိပ်တိုက် တွေ့ခဲ့ကြပြီး ဖိုင်နယ်ကို တက်လှမ်း သွားတဲ့ ကစားသမားတွေကတော့ အိုဇေးလ် ရဲ့ အသင်းဖော်ဟောင်းတွေ ဖြစ်ကြတဲ့ ဘန်ဇီးမား နဲ့ ရိုနယ်ဒို တို့ပါ ။
ဗိုလ်လုပွဲမှာ အနိုင်ရ ဗိုလ်စွဲသွားတဲ့သူကို ရွေးချယ်ရာမှာ အိုဇေးလ် က ” အနိုင်ရသူကတော့ ရိုနယ်ဒို ပါပဲ ။ သူတို့နှစ်ဦးစလုံးက အရေးပါတဲ့ ပွဲတွေမှာ ဂိုးသွင်း နိုင်ကြတဲ့သူတွေပါ ၊ သူတို့နှစ်ဦးစလုံးက ဆုဖလားတွေလည်း အများကြီး ရခဲ့ကြသူတွေပါ ၊ သူတို့နဲ့ အတူ တွဲကစားရတာကို အတော်လေး နှစ်သက်ပါတယ် ၊ ကွင်းထဲမှာကော ကွင်းပြင်မှာကော သူတို့အကြောင်း ကျွန်တော် သိပါတယ် ၊ ဒါပေမယ့် ရိုနယ်ဒိုက ရိုနယ်ဒို ပါပဲဗျာ ။ ” လို့ ပြောကြား သွားခဲ့ပါတယ် ။
