ဘာစီလိုနာတိုက်စစ်မှူး မက်ဆီသည် ပြင်သစ်ဘာသာစကား သင်ယူနေသည်ဆိုခြင်းကို ငြင်းဆိုခဲ့ကြောင်း ၎င်း၏မိသားစုနှင့် ရင်းနှီးခဲ့သည့် သတင်းအရင်းအမြစ်က ပြောဆိုခဲ့သည်ဟု စပိန်အားကစားသတင်းစာ AS က ဖော်ပြခဲ့သည်။
ယခုရာသီကုန်တွင် ဘာစီလိုနာအသင်းနှင့် စာချုပ်သက်တမ်းကုန်ဆုံးမည့် အသက် (၃၃)နှစ်အရွယ်ရှိ မက်ဆီကို ခေါ်ယူရန် မန်စီးတီးနှင့် PSG အသင်းတို့က စိတ်ဝင်စားနေကြကြောင်း သိရသည်။
PSG အားကစားဒါရိုက်တာ လီယိုနာဒိုက မက်ဆီမှာ သူတို့အသင်း အမြဲခေါ်ယူလိုသည့် ကစားသမားဖြစ်သည်ဟု ပြောဆိုခဲ့ခြင်းကြောင့် PSG သို့ မက်ဆီ ပြောင်းရွှေ့မည်ဆိုသော သတင်းများမှာ ကျယ်ပြန့်စွာ ထွက်ပေါ်လာခဲ့ သည်။
Canal+ သတင်းထောက် ဂါရီတီယာက မက်ဆီတို့မိသားစုသည် လက်ရှိတွင် ပြင်သစ်ဘာသာစကားကို သင်ယူနေသည်ဟုဖော်ပြခဲ့ရာ ယင်းသတင်းများမှာ မှန်ကန်မှုမရှိကြောင်း မက်ဆီ၏မိသားစုဘက်က ငြင်းဆိုခဲ့သည်ဟု သတင်းအရင်းအမြစ်က AS သို့ ပြောကြားခဲ့ခြင်းဖြစ်သည်။
