မန်ချက်စတာ ယူနိုက်တက် အသင်းဟာ စနေနေ့ ညက အစောဆုံး ပွဲစဥ်အဖြစ် အိုးလ် ထရပ်ဖို့ဒ် ကွင်းထဲမှာ လိဒ်စ် ယူနိုက်တက် အသင်းကို ဧည့်ခံ ကစားခဲ့ရပြီး 5 – 1 ဆိုတဲ့ ဂိုးပြတ် ရလဒ်နဲ့ ရာသီသစ်ကို အကောင်းဆုံး ဖွင့်လှစ် နိုင်ခဲ့ ပါတယ် ။
အဆိုပါ ပွဲစဥ်မှာ မန်ချက်စတာ ယူနိုက်တက် တို့အတွက် သွင်းဂိုး တွေကို ဘရူနို ဖာနန်ဒက်စ် ( 3 ဂိုး ) ၊ မေဆွန် ဂရင်းဝုဒ် နဲ့ ဖရက်ဒ် တို့က သွင်းယူ ပေးနိုင်ခဲ့ကြ ပါတယ် ။ ဒါ့အပြင် ပေါ့ဂ်ဘာက လေးဂိုး အထိ ဂိုးဖန်တီး ပေးသွားနိုင်ခဲ့ ပါတယ် ။
ဒါ့ကြောင့် ပွဲစဥ် အပြီးမှာတော့ ယူနိုက်တက် ပရိသတ်တွေနဲ့ သတင်း သုံးသပ်သူ တွေက ကွင်းလယ် တိုက်စစ် ကစားသမား ဖြစ်သူ နှစ်ဦးကို အထူး ချီးကျူး သွားခဲ့ကြ ပါတယ် ။ ဒါ့အပြင် ပေါ့ဂ်ဘာကို အသင်းမှာပဲ ဆက်လက် ထိန်းသိမ်းထားဖို့ တောင်းဆိုခဲ့ကြပါသေးတယ် ။
အခုတော့ MEN နဲ့ ပြုလုပ်ခဲ့တဲ့ အင်တာဗျူး အစီအစဥ်မှာ ယူနိုက်တက် တို့ရဲ့ ဟတ်ထရစ်ရှင် ဘရူနို ဖာနန်ဒက်စ် က ပေါ့ဂ်ဘာ ကောင်းသထက် ကောင်းလာဖို့ မျှော်လင့်နေကြောင်း၊ သူဟာ တစ်ပွဲကို 5 ဂိုး ၊ 6 ဂိုးလောက် ဖန်တီးပေးနိုင်စွမ်း ရှိသူ ဖြစ်ကြောင်း ချီးကျူးခဲ့လိုက် ပါတယ် ။
” တကယ့်ကို အံ့ဖွယ် ပါပဲ ။ ပေါ့ဂ်ဘာဟာ တစ်ကယ့်ကို ကောင်းမွန်စွာ ကစားပေးနိုင်ခဲ့ ပါတယ် ။ ဒါကို လူတိုင်းလည်း မြင်တွေ့ခဲ့ရ ပါတယ် ။ သူ အခုထက်ပိုပြီး ကောင်းသထက် ကောင်းလာဖို့ ကျွန်တော် မျှော်လင့် နေပါတယ် ။ သူဟာ ဒီထက်ပိုပြီး လုပ်ပြနိုင်စွမ်း ရှိတယ်လို့ ကျွန်တော် ထင်တယ်လေ ”
” ပေါ့ဂ်ဘာဟာ တစ်ပွဲထဲမှာ ဖန်တီးမှု 5 ကြိမ် ၊ 6 ကြိမ်လောက် လုပ်ပေးနိုင်တယ်လို့ ကျွန်တော် သိနေပါတယ် ။ ပေါလ် က အရည်အသွေး ကောင်းပြီးသား ကစားသမား တစ်ယောက်ပါ ။ ကျွန်တော်တို့ အားလုံးဟာ သူ့အပေါ်မှာ ယုံကြည်မှု အပြည့် ရှိနေပြီးသားပါ ”
” အရည်ကြီးတဲ့ အချက်က အခုလို စွမ်းဆောင်ရည်တွေကို ပြသနေဖို့ ၊ အသင်းရဲ့ ကစားပုံ ပိုကောင်းအောင် ကူညီ ပေးနိုင်ဖို့ ပါပဲ ။ ပေါလ် က အဲ့တာတွေကို လုပ်ပြဖို့ ဒီမှာ ရှိနေတာပါလို့ ကျွန်တော် သေချာပေါက် ပြောနိုင်ပါတယ် ” လို့ ဘရူနို ဖာနန်ဒက်စ် က ပြောခဲ့လိုက် ပါတယ် ။
ဘရူနို ဖာနန်ဒက်စ်ဟာ မန်ချက်စတာ ယူနိုက်တက်ဆီ စတင် ရောက်ရှိ ကတည်းက အခုထိ အသင်းအတွက် 29 ဂိုး အထိ သွင်းယူ ပေးထားနိုင်ခဲ့ ပါပြီ ။ အဆိုပါ အချိန်မှ အခုထိ သူ့ထက် ပိုမို ဂိုးသွင်းထားနိုင်သူ ဆိုလို့ တော့တင်ဟမ် ဟော့ စပါးမှ ဟယ်ရီကိန်း ( 30 ဂိုး ) တစ်ဦးထဲသာ ရှိနေပါတယ် ။
