ရီးယဲလ်မက်ဒရစ်အသင်း တောင်ပံကစားသမား ဟာဇက်သည် ပေါင်ဒဏ်ရာထပ်မံရရှိခဲ့သောကြောင့် အနည်းဆုံး (၄)ပတ်မှ (၆)ပတ်အထိ အနားယူရဖွယ်ရှိနေကြောင်း သိရသည်။
ဟာဇက်သည် ရီးယဲလ်အသင်းသို့ ရောက်ရှိလာကတည်းက ဒဏ်ရာပြဿနာများဖြင့် ရုန်းကန်နေရသူဖြစ်ပြီး ဝဲဘက်ပေါင်ကြွက်သားဒဏ်ရာရရှိခဲ့ခြင်းဖြစ်ကြောင်း ရီးယဲလ်အသင်းက ဗုဒ္ဓဟူးနေ့တွင် အတည်ပြုထုတ်ပြန်ခဲ့သည်။
၎င်းအနေဖြင့် အချိန်မည်မျှအနားယူရမည်ကို ရီးယဲလ်အသင်း၏ ထုတ်ပြန်ချက်တွင် မဖော်ပြထားသော်လည်း (၄)ပတ်မှ (၆)ပတ်အထိ ကြာမြင့်နိုင်ကြောင်း Marca အပါအဝင် စပိန်သတင်းဌာနများစွာက ခန့်မှန်းဖော်ပြလျက်ရှိသည်။
ဟာဇက်အနေဖြင့် (၆)ပတ်ကြာ အနားယူရပါက မတ်လတတိယပတ်မှသာ ပြန်လည်ကစားနိုင်ဖွယ်ရှိပြီး အနည်းဆုံး(၈)ပွဲခန့် လွဲချော်ဖွယ်ရှိကြောင်း သိရသည်။
သို့ဖြစ်ရာ ဟာဇက်သည် ဟွယ်ဆကာ၊ ဂီတာဖေး၊ ဗလင်စီယာ၊ ဗယ်လာဒိုလစ်၊ ဆိုစီဒက်၊ အက်သလက်တီကို၊ အယ်လ်ချီအသင်းတို့နှင့် လာလီဂါပွဲစဉ်များအပြင် အတ္တလန်တာအသင်းနှင့်ကစားရမည့် ချန်ပီယံလိဂ် ရှုံးထွက် (၁၆) သင်းအဆင့် ပထမအကျော့ပွဲကိုပါ လွဲချော်ဖွယ်ရှိနေခြင်းဖြစ်သည်။
၂၀၁၉ ခုနှစ် နွေရာသီတွင် ချယ်လ်ဆီးအသင်းမှ ပြောင်းရွှေ့လာသူ ဟာဇက်သည် ရီးယဲလ်ကစားသမားဘဝ တစ်ရာသီခွဲကာလအတွင်း (၃၅) ပွဲကစား၊ (၄)ဂိုးသာ သွင်းယူထားနိုင်ပြီး ဒဏ်ရာပြဿနာများဖြင့် ရုန်းကန်နေရသည်။
၎င်းအနေဖြင့် နောက်ဆုံးရရှိခဲ့သည့် ပေါင်ကြွက်သား ဒဏ်ရာအပါအဝင် စုစုပေါင်း(၉)ကြိမ်မြောက် ဒဏ်ရာရရှိခြင်းဖြစ်ပြီး COVID-19 ရောဂါ Positive တွေ့ရှိမှုကြောင့်လည်း တစ်ကြိမ် အနားယူခဲ့ရသည်။ ယခုလွဲချော်ဖွယ်ရှိသည့် (၈)ပွဲကိုပါ ထည့်သွင်းတွက်ချက်လျှင် ၎င်းမပါဝင်နိုင်သည့်ပွဲအရေအတွက်မှာ (၅၁) ပွဲအထိ ရှိလာမည်ဖြစ်သည်။
