လက်စတာအသင်းမှ နိုင်ဂျီးရီးယားတိုက်စစ်မှူး အီဟီယန်နာချိုသည် ပရီးမီးယားလိဂ်၏ တိုက်စစ်စွမ်းဆောင်ရည်အကောင်းဆုံး ကစားသမား(၁၀)ဦးစာရင်းတွင် ပါဝင်လာခဲ့ကြောင်း သိရသည်။ အဆိုပါစာရင်းမှာ ပရီးမီးယားလိဂ်တွင် ပွဲ(၁၅၀)နှင့်အထက် ယှဉ်ပြိုင် ကစားထားသည့် ကစားသမားများ၏ သွင်းဂိုးနှင့် ဂိုးဖန်တီးမှုကို ပွဲကစားသည့်မိနစ်နှင့် အချိုးချတွက်ချက်ထားခြင်းဖြစ်သည်။
ထို့ကြောင့် ပရီးမီးယားလိဂ်၏ ဂိုးသွင်းအများဆုံးကစားသမားအဖြစ် ရပ်တည်နေသော ဂန္ထဝင်တိုက်စစ်မှူး အလန်ရှီးယား ပါဝင်ခြင်းမရှိဘဲ အာဆင်နယ်တိုက်စစ်မှူးဟောင်း အွန်နရီက ထိပ်ဆုံးတွင် ဦးဆောင်နိုင်ခဲ့သည်။ အွန်နရီသည် အာဆင်နယ်အသင်းအတွက် ပရီးမီးယားလိဂ်၌ (၂၅၈)ပွဲကစားကာ (၁၇၅)ဂိုး သွင်းယူပေးနိုင်ခဲ့သလို၊ ဂိုးဖန်တီးမှုများကိုပါ ပေါင်းစပ်လိုက်ပါက သွင်းဂိုးများနှင့် ပါဝင်ပတ်သက်မှုမှာ (၈၆)မိနစ်တွင် တစ်ဂိုးနှုန်းရှိခဲ့သည်။
ထို့ကြောင့် ပရီးမီးယားလိဂ်၏ တိုက်စစ်စွမ်းဆောင်ရည်အကောင်းဆုံးကစားသမားအဖြစ် ဦးဆောင်နိုင်ခဲ့ခြင်းဖြစ်ပြီး မန်စီးတီးတိုက်စစ်မှူးဟောင်း အဂွဲရိုးကလည်း ၎င်းနှင့်အပြိုင် ထိပ်ဆုံးတွင် ပူးတွဲရပ်တည်နိုင်ခဲ့သည်။
လီဗာပူးလ်တိုက်စစ်မှူး ဆာလာက (၉၇)မိနစ်လျှင် တစ်ဂိုးနှုန်းဖြင့် တတိယနေရာတွင် ရှိနေခဲ့ပြီး အီဟီယန်နာချိုက (၁၁၂)မိနစ်လျှင် တစ်ဂိုးနှုန်းဖြင့် အဆင့်(၁၀)နေရာ ရောက်ရှိလာခြင်းဖြစ်သည်။ ၎င်းသည် ပရီးမီး ယားလိဂ်၌ (၁၈၄)ပွဲ ကစားရာတွင် ဂိုး(၄၀)သွင်းယူပြီး ဂိုးဖန်တီးမှု(၂၄)ကြိမ် ပြုလုပ်ခဲ့သည်။
