ပရီးမီးယားလိဂ်ပြိုင်ပွဲတွင် COVID-19 ရောဂါအတွက် ချမှတ်ထားသည့် အရေး ပေါ်ကန့်သတ်ချက်များကို သောကြာနေ့မှစ၍ ပြန်လည်ပယ်ဖျက်လိုက်ပြီဖြစ်ကြောင်း သိရသည်။
ပြီးခဲ့သည့် ဒီဇင်ဘာနှင့် ဇန်နဝါရီတွင် ဗြိတိန်နိုင်ငံတစ်ဝန်း COVID-19 မျိုးကွဲဖြစ်သည့် အိုမီခရွန်ဗိုင်းရပ်စ်တွေ့ရှိမှု တစ်ရှိန်ထိုး မြင့်တက်မှုကြောင့် နှစ်လအတွင်း ပွဲစဉ်စုစုပေါင်း ၂၀ ကျော်အထိ ရွှေ့ဆိုင်းခဲ့ရသည်။
ထို့ကြောင့် ပရီးမီးယားလိဂ်ပြိုင်ပွဲတာဝန်ရှိသူများက အရေးပေါ်စည်းကမ်းချက်များ ထုတ်ပြန်ခဲ့ခြင်းဖြစ်ပြီး လက်ရှိအချိန်တွင် ရောဂါ ကူးစက်မှုနှုန်း လျော့ကျသွားပြီဖြစ်သောကြောင့် သောကြာနေ့မှစ၍ ပြန်လည်ပယ်ဖျက်ခဲ့ခြင်းဖြစ်သည်။
သို့ဖြစ်ရာ ကလပ်အသင်းများအနေဖြင့် အဝတ်လဲခန်းကဲ့သို့ ရုံတွင်းနေရာများတွင် Mask တပ်ဆင်ရန် မလိုတော့သလို လေ့ကျင့်ရေးကွင်းများ၌ ကုသမှုပြုလုပ်ချိန်ကို အများဆုံး ၁၅ မိနစ်ကန့်သတ်ထားခြင်းကို ပယ်ဖျက်လိုက်ပြီဖြစ်သည်။
ထို့ပြင် ရောဂါပိုးရှိ၊ မရှိ စစ်ဆေးခြင်းကိုလည်း တစ်ပတ်လျှင် နှစ်ကြိမ်သာ ပြုလုပ်ရတော့မည်ဖြစ်သည်။
ကြာသပတေးနေ့ကပြုလုပ်သည့် ပရီးမီးယားလိဂ်ရှယ်ယာရှင်များ အစည်းအဝေးတွင် အရေးပေါ်ကန့်သတ်ချက်များ ပယ်ဖျက်ရန် ဆုံးဖြတ်ခဲ့ခြင်းဖြစ်ပြီး ယခုဖေဖော်ဝါရီလကုန်တွင် အခြားကန့်သတ်ချက်များ ထပ်မံလျှော့ချနိုင်ရန် ရည်ရွယ်ထားကြောင်း သိရသည်။ ပရီးမီးယားလိဂ်ပြိုင်ပွဲမှာ ပွဲစဉ် ၂၅ အထိ ရောက်ရှိနေပြီဖြစ်ပြီး လက်ကျန်ပွဲစဉ် ၁၃ ပွဲသာ ကျန်ရှိတော့သည်။
