အာဆင်နယ်နောက်ခံလူ ဂျူရီယန်တင်ဘာစ်က ကြံ့ခိုင်မှုပြည့်ပြည့်၀၀ရှိနေပေမယ့် ပရီးမီးယားလိဂ်ရဲ့တောင်းဆိုမှုနဲ့ အသားကျအောင် ကြိုးစားနေရဆဲဖြစ်ကြောင်း ဝန်ခံလာခဲ့ပါတယ်။
ပြီးခဲ့တဲ့ရာသီက အာဆင်နယ်ကို ရောက်လာတဲ့ အေဂျက်စ်နောက်ခံလူဟောင်းကို အများစုက မျှော်လင့်ချက်ကြီးကြီးထားခဲ့ကြပါတယ်။
ဒါပေမယ့် တင်ဘာစ်ရဲ့ အာဆင်နယ်ကစားသမားဘဝက ရာသီကြိုပွဲစဉ်တွေမှာသာ ခြေစွမ်းပြနိုင်ခဲ့ပေမယ့် အဖွင့်ပွဲမှာတင် ဒူးအရွတ်ကြောစုတ်ပြဲဒဏ်ရာကြောင့် ၉လကြာ အနားယူခဲ့ရပါတယ်။
၂၃နှစ်သားဟာ ဒီနှစ်ရာသီမှာတော့ ကြံ့ခိုင်မှုအပြည့်နဲ့ ပြန်လာနိုင်ခဲ့ပြီဖြစ်ပြီး အာဆင်နယ်ရဲ့ဘယ်နောက်ခံလူအဖြစ် ပုံမှန်ပွဲထွက်ခွင့်ရနေပါတယ်။
ပုံမှန်ပွဲထွက်ခွင့်ရနေပေမယ့် တင်ဘာစ်ကတော့ အင်္ဂလိပ်ဘောလုံးလောကနဲ့ အသားကျဖို့ ကြိုးစားနေရဆဲဖြစ်ကြောင်း ပြောလာခဲ့ပါတယ်။
တင်ဘာစ်က “ဒူးဒဏ်ရာက အရင်ကထက် ပိုပြင်းထန်ပါတယ်။ လေ့ကျင့်ခန်း၊ ပွဲအတွင်းမှာ တခါတလေ နာကျင်တာမျိုး ခံစားနေရဆဲဖြစ်ပေမယ့် ကျွန်တော့်အတွက်တော့ ပြဿနာမရှိတော့ပါဘူး။
ကျွန်တော် အပြင်မှာလေ့ကျင့်တုန်းကလည်း ဘာမှကြောက်မနေဘဲ ဖျက်ထုတ်တာမျိုး လုပ်တာပါပဲ။ အခြေအနေတွေ မှားယွင်းသွားနိုင်တယ်ဆိုပြီး ဘာမှမလုပ်ဘဲ ဝင်ကစားလို့တော့မရပါဘူး။
ကျွန်တော့်ခန္ဓာကိုယ်က ပရီးမီးယားလိဂ်လို ပြင်းထန်တဲ့လိဂ်တစ်ခုမှာ အသားကျဖို့ ကြိုးစားနေရဆဲပါပဲ။ ဒီလိဂ်က ကြံ့ခိုင်မှုပိုင်းအရရော နည်းစနစ်ပိုင်းအရပါ တောင်းဆိုမှုများပါတယ်။ လေ့ကျင့်ခန်းအစီအစဉ်နဲ့ အစည်းအဝေးတွေမှာ ဦးနှောက်ကို အများကြီး အလုပ်ပေးထားရလို့ ပွဲတွေအတွင်းမှာ အလိုအလျှောက် ဆုံးဖြတ်ချက်တွေချလာနိုင်ပါတယ်။”လို့ ပြောခဲ့ပါတယ်။
