ပရီးမီးယားလိဂ်ချန်ပီယံဆုကို ကာကွယ်ရန် အလွန်ခက်ခဲကြောင်း လီဗာပူးလ်ကို ဒီဘရိုင်းနား သတိပေး

မန်စီးတီးကွင်းလယ်လူ ဒီဘရိုင်းနားက ပရီးမီးယားလိဂ်ချန်ပီယံဆုကို ကာကွယ်ရန် အလွန်ခက်ခဲမည်ဖြစ်ကြောင်း သတိပေးပြောကြားခဲ့သည်။

လီဗာပူးလ်အသင်းသည် ပြီးခဲ့သည့် ၂၀၁၉-၂၀ ရာသီ ပရီးမီးယားလိဂ်ပြိုင်ပွဲတွင် ရမှတ် (၉၉)မှတ်အထိ ရရှိကာ ဒုတိယနေရာမှ မန်စီးတီးအသင်း (၈၁ မှတ်)ကို (၁၈)မှတ်ဖြတ်ပြီး ချန်ပီယံဆုကို ရယူနိုင်ခဲ့ခြင်းဖြစ်သည်။

မန်စီးတီးအသင်းသည် ၂၀၁၇-၁၈ နှင့် ၂၀၁၈-၁၉ ရာသီများတွင် ပရီးမီးယားလိဂ်ချန်ပီယံဆုကို (၂)ရာသီဆက်တိုက် ရယူနိုင်ခဲ့ပြီး ချန်ပီယံဆုကို ကာကွယ်ရသည်မှာ အလွန်ခက်ခဲကြောင်း ဒီဘရိုင်းနားက ဆိုခဲ့ခြင်းဖြစ်သည်။

ဒီဘရိုင်းနားက “ချန်ပီယံဆုကို ကာကွယ်ရတာ အရမ်းခက်ပါတယ်။ ဒါက ထင်ထားတာထက်ကို ခက်ခဲတာကြောင့် အကောင်းဆုံးယှဉ်ပြိုင်နိုင်ဖို့ လိုပါတယ်။ လက်ရှိချန်ပီယံကို အသင်းတိုင်းက အရမ်းအနိုင်ရချင်ကြပြီး သူတို့နဲ့တွေ့ရင် ပိုကြိုးစားလေ့ရှိပါတယ်။ ပြီးတော့ ချန်ပီယံလမ်းကြောင်းမှာ သေးငယ်တဲ့အရာလေးတွေကအစ ဒုက္ခပေးတတ်တာပါ။ ဒဏ်ရာပြဿနာတွေကလည်း ချန်ပီယံလမ်းကြောင်းကို ပြောင်းလဲစေနိုင်ပါတယ်။ ပရီးမီးယားလိဂ်မှာ တစ်ကြိမ်ဗိုလ်စွဲဖို့တောင် အရမ်းခက်ခဲ့ပါတယ်။ နှစ်ကြိမ်ဆိုရင် ဘယ်လောက် ခက်ခဲမယ်ဆိုတာ ပြောစရာတောင် မလိုပါဘူး”ဟု ပြောကြားခဲ့သည်။

၂၀၂၀-၂၁ ရာသီ ပရီးမီးယားလိဂ်ပြိုင်ပွဲကို ယနေ့(စက်တင်ဘာ ၁၂ ရက်)တွင် ဖူလ်ဟမ်-အာဆင်နယ်ပွဲဖြင့် စတင်ဖွင့်လှစ်မည်ဖြစ်သည်။