မန်ချက်စတာယူနိုက်တက်တိုက်စစ်မှူး ရပ်ရှ်ဖို့ဒ်သည် ပခုံးဒဏ်ရာကို ခွဲစိတ်ကုသမှုခံယူမည်ဖြစ်ပြီး အောက်တိုဘာလအထိ အနားယူရဖွယ်ရှိကြောင်း သိရှိရသည်။
အသက် (၂၃)နှစ်အရွယ်ရှိ အင်္ဂလန်တိုက်စစ်မှူး ရပ်ရှ်ဖို့ဒ်သည် ၂၀၂၀ နိုဝင်ဘာလကတည်းက ပခုံးဒဏ်ရာရရှိခဲ့ခြင်းဖြစ်ပြီး ယင်းဒဏ်ရာကို မခွဲစိတ်ပဲ ဆက်ကစားခဲ့ခြင်းဖြစ်သည်။
ရပ်ရှ်ဖို့ဒ်သည် အဆိုပါဒဏ်ရာ ရရှိနေသော်လည်း မန်ချက်စတာယူနိုက်တက်အသင်း၏ ပွဲစဉ်များတွင် တောက်လျှောက် ပါဝင်ကစားခဲ့သလို၊ ယူရို-၂၀၂၀ ပြိုင်ပွဲတွင် အင်္ဂလန်အသင်းအတွက်လည်း ပါဝင်ကစားခဲ့သည်။
လက်ရှိတွင် ရပ်ရှ်ဖို့ဒ်သည် အသင်းနည်းပြအပါအဝင် ဆရာဝန်များနှင့်တိုင်ပင်ပြီးနောက် ပခုံးဒဏ်ရာကို ခွဲစိတ်ကုသမှု ခံယူရန် ဆုံးဖြတ်ခဲ့ခြင်း ဖြစ်သည်။
မန်ချက်စတာယူနိုက်တက်အသင်း၏ ထုတ်ပြန်ချက်တွင် “ရပ်ရှ်ဖို့ဒ်သည် အသင်းနည်းပြ၊ အသင်းဆေးအဖွဲ့၊ ပါရဂူများနှင့်တိုင်ပင်ပြီးနောက် ပခုံးဒဏ်ရာကို ခွဲစိတ်ကုသမှု ခံယူရန် ဆုံးဖြတ်လိုက်ပြီဖြစ်ကြောင်း၊ ရပ်ရှ်ဖို့ဒ်အနေဖြင့် ခွဲစိတ်ကုသမှု ခံယူပြီးပါက အမြန်ဆုံး ပြန်ကစားနိုင်ရန် လေ့ကျင့်မှုများကို ပြုလုပ်သွားမည်ဖြစ်ကြောင်း” ဖော်ပြပါရှိသည်။
ရပ်ရှ်ဖို့ဒ်အနေဖြင့် ပခုံးဒဏ်ရာမှ ပြန်လည်ကောင်းလာရန် အောက်တိုဘာလအထိ အနားယူရဖွယ်ရှိနေပြီး မန်ချက်စတာယူနိုက်တက်အသင်း၏ ရာသီအစပွဲစဉ်များကို လွဲချော်မည်ဖြစ်ကြောင်း သိရသည်။
