ရီးယဲလ်နည်းပြ အန်ဆယ်လော့တီက မိမိတို့အသင်းအနေဖြင့် နှစ်ပွဲဆက် ဂိုးမသွင်းနိုင်ခြင်းအတွက် ဒေါသထွက်သည်ထက် အံ့သြမိသည်ဟု ပြောကြားခဲ့သည်။
ရီးယဲလ်အသင်းသည် စပိန်ဘုရင့်ဖလား ဆီမီးဖိုင်နယ် ပထမအကျော့၌ ဘာစီလိုနာအသင်းကို (၀-၁)ဂိုးဖြင့် ရှုံးနိမ့်ခဲ့ပြီးနောက် လာလီဂါပွဲစဉ်တွင် ဘက်တစ်အသင်းနှင့် (၀-၀)ဂိုးဖြင့် သရေကျခဲ့ပြီး နှစ်ပွဲဆက် ဂိုးပေါက်ပျောက်ခဲ့ခြင်းဖြစ်သည်။
ထို့ကြောင့် လာလီဂါပြိုင်ပွဲတွင် ဘာစီလိုနာအသင်းနှင့် (၉)မှတ် ကွာဟသွားခဲ့သလို၊ စပိန်ဘုရင့်ဖလားတွင်လည်း အခြေမလှဘဲ ဖြစ်သွားခဲ့သည်။
ယင်းအခြေအနေအတွက် ဝေဖန်ပြစ်တင်မှုများ ရှိလာခဲ့ရာ အန်ဆယ်လော့တီက ဂိုးမသွင်းနိုင်သည့် တိုက်စစ်ပိုင်းကို အံ့အားသင့်မိကြောင်း ပြောကြားခဲ့ခြင်းဖြစ်သည်။
၎င်းက ”ဒေါသထွက်တာထက် အံ့သြတာက ပိုပါတယ်။ ကျွန်တော်တို့ ဂိုးမသွင်းနိုင်တာ ထူးဆန်းပါတယ်။ ဒါဟာ ပုံမှန်အခြေအနေမဟုတ်ပါဘူး။ နောက်ဆုံး(၃)ပွဲမှာ တစ်ဂိုးထက် ပိုမသွင်းနိုင်ခဲ့တာ အံ့အားသင့်စရာကောင်းပါတယ်။ ဒီအတွက် ကစားသမားတွေကလည်း စိတ်ပျက်နေပါတယ်။ ဘာကြောင့်လဲဆိုတော့ ကျွန်တော်တို့က ဂိုးတွေအများကြီး သွင်းယူနိုင်စွမ်းရှိတဲ့အသင်းဖြစ်ပြီး အဲဒီအတွက်လည်း အမြဲတမ်းသက်သေပြခဲ့ပြီးဖြစ်တာကြောင့်ပါ။ လက်ရှိအချိန်မှာ ကျွန်တော်တို့အနေနဲ့ တိုက်စစ်ပိုင်းမှာ ပြဿနာရှိနေပြီလို့ ထင်ပါတယ်”ဟု ပြောကြားခဲ့သည်။
