နွေရာသီအပြောင်းအရွှေ့ကာလတွင် ပရီးမီးယားလိဂ်ကလပ်များ၏ အသုံးစရိတ် ပေါင် ၁ ဒသမ ၉ ဘီလီယံအထိရှိပြီး စံချိန်သစ်တင်

ဥရောပဘောလုံးလောက၏ ၂၀၂၂ နွေရာသီအပြောင်းအရွှေ့ကာလမှာ ကြာသပတေးနေ့က ပြီးဆုံးခဲ့ပြီး ပရီးမီးယားလိဂ်ကလပ်များ၏ အသုံးစရိတ်မှာ ပေါင် ၁ ဒသမ ၉ ဘီလီယံအထိရှိကာ သမိုင်းတစ်လျှောက် ငွေကြေးသုံးစွဲမှုအများဆုံးအဖြစ် စံချိန်သစ်တင်ခဲ့ကြောင်း သိရသည်။

ပရီးမီးယားလိဂ်ပြိုင်ပွဲ၏ အသုံးစရိတ်မှာ ၂၀၁၇ ခုနှစ် နွေရာသီတွင် စံချိန်တင်ထားသည့် ပေါင် ၁ ဒသမ ၄ ဘီလီယံကိုကျော်ဖြတ်၍ စံချိန်တင်ခဲ့ခြင်းဖြစ်ပြီး ဥရောပထိပ်တန်းလိဂ်များအနက် သုံးစွဲမှုအများဆုံးအဖြစ်လည်း ရပ်တည်နိုင်ခဲ့သည်။ ထို့ပြင် ကမ္ဘာကျော် Deloitte စီးပွားရေးကုမ္ပဏီ၏ ထုတ်ပြန်မှုအရ ပရီးမီးယားလိဂ်ပြိုင်ပွဲ၏ ယခုနှစ် နွေရာသီအသုံးစရိတ်မှာ နွေရာသီနှင့် ဇန်နဝါရီ အပြောင်းအရွှေ့နှစ်ခုပေါင်း သုံးစွဲမှုအများဆုံး အဖြစ် ၂၀၁၇-၂၀၁၈ ရာသီက စံချိန်တင်ထားသည့် ပေါင် ၁ ဒသမ ၈၆ ဘီလီယံထက်ပင် ပိုများကြောင်း သိရသည်။

ယခုနွေရာသီတွင် ဥရောပထိပ်တန်းလိဂ်ပြိုင်ပွဲငါးခု၏ အသုံးစရိတ်စုစုပေါင်းမှာ ပေါင် ၃ ဒသမ ၈၈ ဘီလီယံရှိပြီး ယခင်နှစ်ထက် ၅၂ ရာခိုင်နှုန်းမြင့်တက်လာသည်။ ၎င်းတို့အနက် ပေါင် ၁ ဒသမ ၉ ဘီလီယံ သုံးစွဲခဲ့သည့် ပရီးမီးယားလိဂ်၏ အသုံးစရိတ်က စုစုပေါင်းပမာဏ၏ ၄၉ ရာခိုင်နှုန်းရှိပြီး ဒုတိယအများဆုံးဖြစ်သည့် စီးရီးအေပြိုင်ပွဲ၏ ပေါင် ၆၄၆ သန်းထက် သုံးဆနီးပါး ပိုများသလို လာလီဂါ၊ စီးရီးအေနှင့် ဘွန်ဒစ်လီဂါ လိဂ်သုံးခု အသုံးစရိတ်စုစုပေါင်းထက်လည်း ပိုများကြောင်းDeloitte က ထုတ်ပြန်ထားသည်။

ထို့ပြင် ပရီးမီးယားလိဂ်ကလပ်များ၏ အသားတင်အသုံးစရိတ် စုစုပေါင်းမှာ ပေါင် တစ်ဘီလီယံအထက်ရှိပြီး သမိုင်းတစ်လျှောက် ပထမဆုံးအကြိမ်အဖြစ် မှတ်တမ်းဝင်ခဲ့သည်။ ပရီးမီးယားလိဂ်ကလပ်အသင်း ၂၀ အနက် ကိုးသင်းက ပေါင်သန်း ၁၀၀ အထက် အသုံး ပြုခဲ့ကြပြီး ချန်ပီယံရှစ်ကလပ်များ၏ အသုံးစရိတ်မှာလည်း ပြီးခဲ့သည့်နှစ် နွေရာသီထက် နှစ်ဆကျော် မြင့်တက်လာကြောင်း သိရသည်။

အပြောင်းအရွှေ့နောက်ဆုံးနေ့ဖြစ်သည့် စက်တင်ဘာ ၁ ရက်တွင် ပရီးမီးယားလိဂ်အသင်း ၂၀ အနက် ၁၄ သင်းက ကစားသမားခေါ်ယူမှု ပြုလုပ်ခဲ့ကြပြီး အေဂျက်စ်အသင်းမှ မန်ယူ အသင်းသို့ ပေါင် ၈၂ သန်းဖြင့် ရောက်ရှိလာသည့် ဘရာဇီးလ်လက်ရွေးစင်တောင်ပံကစား သမား အန်တိုနီမှာ သမိုင်းတစ်လျှောက် အပြောင်းအရွှေ့နောက်ဆုံးရက်တွင် တန်ဖိုး အမြင့်ဆုံးခေါ်ယူမှုအဖြစ် မှတ်တမ်းဝင်ခဲ့သည်။

နွေရာသီကာလတွင် ငွေကြေးသုံးစွဲမှု အများဆုံးအဖြစ် အသင်းပိုင်ရှင်သစ် တော့ဒ်ဘိုလီ၏ ချယ်လ်ဆီးအသင်းက ပေါင် ၂၅၁ သန်းဖြင့် ရပ်တည်ခဲ့သည်။ ချယ်လ်ဆီးအသင်း သည် ဖိုဖာနာ၊ ကူကူရယ်လာ၊ စတာလင်၊ ကူလီဘလီ၊ ချူဝူမယ်ကာ၊ အူဘာမီယန်း၊ ကာ ဆာဒီ၊ ဆလိုနီနာ၊ ဇာကာရီယာ (အငှား) တို့ကို ခေါ်ယူခဲ့ပြီး အပြောင်းအရွှေ့ကာလတစ်ခုတည်းတွင် သုံးစွဲမှုအများဆုံး ပရီးမီးယားလိဂ်ကလပ်အဖြစ် စံချိန်တင်ခဲ့သည်။

မာလာစီယာ၊ အဲရစ်ဆင်(အလွတ်)၊ လီ ဆန်ဒရိုမာတီနက်ဇ်၊ ကက်ဆီမီရို၊ အန်တိုနီ၊ ဒူဘရက်ဗ်ကာ (အငှား) တို့အတွက် ပေါင် ၂၁၄ သန်း အသုံးပြုခဲ့သည့် မန်ယူအသင်းက လည်း အသင်းသမိုင်းတစ်လျှောက် ငွေကြေး သုံးစွဲမှုအများဆုံး အပြောင်းအရွှေ့ကာလ အဖြစ် မှတ်တမ်းဝင်ခဲ့သည်။

ထို့ပြင် လန်ဒန်ကလပ် ဝက်စ်ဟမ်းအသင်းက ပေါင် ၁၆၃ သန်းဖြင့် တတိယ၊ စပါးအသင်းက ၁၅၂ သန်း ဖြင့် စတုတ္ထ၊ ပရီးမီးယားလိဂ်တန်းတက် နော်တင်ဟမ်ဖောရက်စ်အသင်းက ပေါင် ၁၄၅ သန်းဖြင့် ပဥ္စမနေရာတွင် ရပ်တည်ခဲ့ပြီး သုံးစွဲမှုအများဆုံး ထိပ်ဆုံးငါးသင်းစာရင်းတွင် Big Six ကလပ် သုံးသင်းသာ ပါဝင်သလို နော်တင်ဟမ်အသင်းမှာလည်း အံ့အားသင့်ဖွယ် ပါဝင်နေသည်။ ချန်ပီယံ မန်စီးတီးအသင်းမှာမူ ပေါင် ၁၂၅ သန်းသာ အသုံးပြုခဲ့ပြီး ရောင်းချမှု မှ ပေါင်သန်း ၁၈၀ အထိ ပြန်လည်ရရှိခဲ့သည်။