နော်ဝေလက်ရွေးစင်နည်းပြ စတေးလ်ဆိုဘက်ကန်းက အာဆင်နယ်အသင်းခေါင်းဆောင် မာတင်အိုဒီဂတ်ဟာ အသင်းအတွက် ပါဝင်ကစားနိုင်ဦးမှာမဟုတ်ကြောင်း အသိပေးပြောကြားလာခဲ့တာကြောင့် ကစားသမားအနေနဲ့ ကလပ်အသင်းအတွက်လည်း ကစားပေးနိုင်ဖို့ မဖြစ်နိုင်သေးဘူးလို့သိရပါတယ်။
အိုဒီဂတ်ဟာ ပြီးခဲ့တဲ့ စက်တင်ဘာလ ၉ ရက်နေ့က ဩစတြီးယားနဲ့ယှဉ်ပြိုင်ခဲ့တဲ့ နေရှင်းလိဂ်ပွဲစဉ်မှာ နော်ဝေအတွက်ပါဝင်ကစားပေးရင်း ဒုတိယပိုင်းမှာ ခြေကျင်းဝတ်ဒဏ်ရာ ပြင်းပြင်းထန်ထန်ရှိခဲ့ပါတယ်။ အိုဒီဂတ်ဟာ အဲဒီအချိန်ကတည်းက အာဆင်နယ်အတွက် ပါဝင်ကစားနိုင်ခဲ့ခြင်းမရှိဘဲ ယခုအခါမှာလည်း ဆိုဘက်ကန်းက ကစားသမားရဲ့ပြန်လာနိုင်ချေနဲ့ပတ်သက်ပြီး အနုတ်သဘောဆောင်တဲ့သတင်းကို ထုတ်ဖော်ပြောကြားလာခဲ့တာဖြစ်ပါတယ်။
နော်ဝေနည်းပြရဲ့အဆိုအရ အသက်-၂၅ နှစ်အရွယ်ကစားသမားဟာ လာမယ့် အောက်တိုဘာ ၁၁ နဲ့ ၁၄ ရက်တွေမှာ ယှဉ်ပြိုင်သွားရမယ့် ဆလိုဗေးနီးယား၊ ဩစတြီးယားတို့နဲ့ပွဲစဉ်တွေမှာ ပါဝင်နိုင်မှာမဟုတ်ဘူးလို့သိရပါတယ်။
ဆိုဘက်ကန်းက “သူပြန်ကစားနိုင်ဖို့ ဝေးပါသေးတယ်။ အသင်းလူစာရင်းမှာပြန်ပါလာဖို့ စောင့်ရပါဦးမယ်။ ဘယ်လောက်အထိ အချိန်ကြာဦးမလဲဆိုတာကတော့ ကျွန်တော်တို့စောင့်ကြည့်သွားရဦးမှာပါ။ သေချာတာကတော့ ဒီတစ်ခေါက် အသင်းရဲ့လူစာရင်းမှာ သူမပါဘူးဆိုတာတ ကျွန်တော်သိပါတယ်” လို့ပြောကြားခဲ့ပါတယ်။
နိုင်ငံအသင်းအတွက်ပါဝင်ခွင့်မရချိန်မှာတော့ အာဆင်နယ်ကြယ်ပွင့်အနေနဲ့ ကြံ့ခိုင်မှုပြန်လည်တည်ဆောက်ဖို့ ကြိုးစားသွားရမှာဖြစ်ပါတယ်။ လာမယ့် စနေနေ့မှာတော့ အာဆင်နယ်ဟာ ပရီးမီးယားလိဂ်ပွဲစဉ်အဖြစ် ဆောက်သမ်တန်နဲ့ယှဉ်ပြိုင်သွားရမှာဖြစ်ပြီး အိုဒီဂတ်အနေနဲ့ အဆိုပါပွဲစဉ်ကိုလည်း လွဲချော်သွားဦးမှာဖြစ်ပါတယ်။
