မန်စီးတီးအသင်း၏ နော်ဝေလူငယ်ကြယ်ပွင့်တိုက်စစ်မှူး ဟော်လန်းသည် နော်တင်ဟမ်ဖောရက်စ်အသင်းနှင့်ကစားခဲ့သည့် ပရီးမီးယားလိဂ်ပွဲစဉ်တွင် စံချိန်သစ်များစွာ တင်ရှိနိုင်ခဲ့ကြောင်း သိရှိရသည်။
ဟော်လန်းသည် မန်စီးတီးအသင်း၏ ပြီးခဲ့သည့် ပရီးမီးယားလိဂ်ပွဲစဉ်ဖြစ်သည့် ခရစ္စတယ်ပဲလေ့စ်အသင်းနှင့်ပွဲတွင် ဟက်ထရစ်သွင်းယူနိုင်ခဲ့ပြီးနောက် ဒုတိယမြောက်ပွဲစဉ်အဖြစ် နော်တင်ဟမ်ဖောရက်စ်အသင်းနှင့် ပွဲတွင် ဟက်ထရစ် ထပ်မံသွင်းယူနိုင်ခဲ့ခြင်းလည်းဖြစ်သည်။
ဟော်လန်းသည် ယင်းပွဲစဉ်များတွင် ဟက်ထရစ်သွင်းယူနိုင်ခဲ့ခြင်းကြောင့် စံချိန်များစွာတင်နိုင်ခဲ့ပြီး ယင်းစံချိန်များထဲတွင် မန်စီးတီးအသင်း၏ ဂန္ထဝင်တိုက်စစ်မှူးဟောင်း အဂွဲရိုး၏ စံချိန်တစ်ရပ်ကိုလည်း ချိုးဖျက်နိုင်ခဲ့ကြောင်း သိရှိရသည်။
ဟော်လန်းသည် ပရီးမီးယားလိဂ် ပထမဆုံး (၅)ပွဲတွင် (၉)ဂိုးအထိ သွင်းယူနိုင်ခဲ့ခြင်းဖြစ်ရာ ယင်းသွင်းဂိုးအရေအတွက်မှာ ပရီးမီးယားလိဂ်ပြိုင်ပွဲသမိုင်းတစ်လျှောက်တွင် သွင်းဂိုးစံချိန်သစ်ဖြစ်ခဲ့ပြီး ယခင်က အဂွဲရိုး တင်ရှိထားသည့် (၈)ဂိုးစံချိန်ကို ကျော်ဖြတ်နိုင်ခဲ့ခြင်းဖြစ်သည်။
အဂွဲရိုး၏ စံချိန်မျိုးကို မစ်ကွင်းကလည်း တင်ရှိထားရာ ဟော်လန်းသည် ယင်းကစားသမားနှစ်ဦးစလုံး၏စံချိန်ကို ချိုးဖျက်နိုင်ခဲ့ခြင်းဖြစ်ကြောင်း သိရှိရသည်။
ထို့ပြင် ဟော်လန်းသည် သြဂုတ်လအတွင်း သွင်းဂိုးအများဆုံးစံချိန်ကိုလည်း ဟာရီကိန်းကို ကျော်ဖြတ်ကာ စံချိန်သစ်တင်နိုင်ခဲ့သည်။ ဟာရီကိန်းသည် သြဂုတ်လအတွင်းတွင် ပရီးမီးယားလိဂ် သွင်းဂိုး (၈)ဂိုးအထိ သွင်းယူကာ စံချိန်တင်ထားခြင်းဖြစ်ပြီး ဟော်လန်းက (၅)ပွဲကစားရုံဖြင့် (၉)ဂိုးအထိသွင်းယူကာ စံချိန်သစ်တင်ရှိခဲ့ခြင်းလည်းဖြစ်သည်။
ထို့ပြင် ပရီးမီးယားလိဂ် ဟက်ထရစ်နှစ်ကြိမ်ကို ပွဲအရေအတွက်အနည်းဆုံးဖြင့် စံချိန်တင်ထားသူမှာ ချယ်လ်ဆီးတိုက်စစ်မှူးဟောင်း ဒမ်ဘာဘားဖြစ်ပြီး နယူးကာဆယ်အသင်းတွင် ကစားနေစဉ်သွင်းယူခဲ့ခြင်း ဖြစ်သည်။ ဒမ်ဘာဘားသည် ဟက်ထရစ် နှစ်ကြိမ်အတွက် ပွဲအရေအတွက် (၂၁)ပွဲ ကစားရုံဖြင့် အမြန်ဆုံး စံချိန်တင်ထားခြင်းဖြစ်ပြီး ဟော်လန်းကမူ (၅)ပွဲကစားရုံဖြင့် စံချိန် တင်ကာ နောက်ဆုံး (၉)ရက်အတွင်း နှစ်ကြိမ်သွင်းနိုင်ခဲ့ ခြင်းလည်းဖြစ်သည်။
ဟော်လန်း၏ သွင်းဂိုးများ၊ စံချိန်မှတ်တမ်းများအပြီး တွင် ဘောလုံးကမ္ဘာတစ်ခုလုံး၏ ချီးကျူးမှုများကိုလည်း ရရှိခဲ့ပြီး ဟော်လန်းသည် လက်ရှိ ကမ္ဘာ့ဘောလုံးလောက၏ အကောင်းဆုံးတိုက်စစ်မှူး၊ အကောင်းဆုံးကစားသမား ဆိုသည့် ချီးကျူးမှုများလည်း ရှိခဲ့သည်။
