ဂျာမန် ထိပ်သီး ဘိုင်ယန်မြုးနစ် အသင်းဟာ ဘာစီလိုနာ ရဲ့ ခံစစ်ကြယ်ပွင့် ရော်နယ် အာရူဟို ကို စိတ်ဝင်စား နေတယ်လို့ သတင်းထွက်ပေါ် လာခဲ့ပါတယ် ။
အာဆင်နယ် အသင်းကတော့ ကွင်းလယ်လူ သောမတ်စ် ပါတေး ကို အခု ဇန်နဝါရီမှာ အပြီးသတ် ရောင်းထုတ် နိုင်ဖို့ လုပ်ဆောင် သွားမယ်လို့ ကြားသိရပါတယ် ။
အင်တာမီလန် ဟာ ပြင်သစ် ကလပ် လိုင်လီ အသင်းမှာ ကစားနေတဲ့ တီယာဂို ဂျာလို ကို လာမယ့် ၂၀၂၄ ဇွန်လ မှာ အလွတ်နဲ့ ခေါ်ယူနိုင်ဖို့ အတွက် သေချာအောင် လုပ်ဆောင်နေတယ်လို့ သိရပါတယ် ။
မန်စီးတီး နည်းပြကြီး ဂွာဒီယိုလာ ကတော့ ကယ်ဗင် ဒီဘရိုင်းနား ရဲ့ ဒဏ်ရာ အခြေအနေကို မေးမြန်း ရာမှာ “သူ ဇန်နဝါရီ ပြန်ကစားမယ်လို့ ပြောတယ်မလား ၊ ဒါဆိုရင် ဇန်နဝါရီပေါ့ဗျာ” လို့ ပြန်လည် ဖြေဆိုသွားခဲ့ ပါတယ် ။ ဒါပေမယ့် ဒီဘရိုင်းနား ဟာ ၂၁ နှစ် အရွယ် မဟုတ်တော့ကြောင်း ၊ အချိန်တွေ က အမြဲ ကုန်လွန်နေတာ ဖြစ်ပြီး ဒဏ်ရာ တခုရလာပြီဆိုရင် သေချာ အပြည့်အ၀ ပြန်ကောင်းလာဖို့ လုံလုံလောက်လောက် အနားယူဖို့ လိုအပ်မှာ ဖြစ်ကြောင်းတွေကိုလည်း ဂွာဒီယိုလာ က ပြောဆိုသွားခဲ့ ပါတယ် ။
အေစီမီလန် အသင်းဟာ ပြီးခဲ့တဲ့ စီးရီးအေ ပွဲစဉ်မှာ ပါဝင်ကစားပြီး ပြိုင်ပွဲ သမိုင်းတလျောက် အသက်အငယ်ဆုံး ကစားသမားအဖြစ် မှတ်တိုင် စိုက်ထူနိုင်ခဲ့တဲ့ ကြယ်ပွင့် ကစားသမားလေး ဖရန်စစ္စကို ကာမာဒါ ကို အသက် ၁၆ နှစ် ပြည့်ချိန်မှာ ပရော်ဖက်ရှင်နယ် စာချုပ် ချုပ်ဆိုသွားဖို့ သဘောတူညီမှု ရရှိခဲ့ပြီလို့ သိရပါတယ် ။
ဆွမ်းဆိ အသင်းဟာ အသင်းလက်မဲ့ ဖြစ်တဲ့ အဲဗာတန် ကွင်းလယ်လူဟောင်း ယန်းနစ် ဘိုလာဆီ ကို ကာလတို စာချုပ်နဲ့ ခေါ်ယူလိုက်တယ်လို့ သိရပါတယ် ။
လီယွန်နယ် မက်ဆီ ရဲ့ ဇနီး နဲ့ စပိန် ကွင်းလယ်လူဟောင်း ဖာဘရီဂတ်စ် တို့ရဲ့ ဇနီးဖြစ်သူတို့ဟာ ဖာဘရီဂတ်စ် ကို မက်ဆီ နဲ့ အတူ အင်တာမိုင်ယာမီ အသင်းဆီ ပြောင်းရွှေ့ ကစားဖို့ တိုက်တွန်းခဲ့တယ်လို့ သတင်းထွက်လာခဲ့ ပါတယ် ။ ဒါပေမယ့် ဖာဘရီဂတ်စ် ဟာ အမေရိက ကို သွားကစားဖို့ မရွေးချယ်ခဲ့ဘဲ သူ ရှယ်ယာပါဝင်ထားတဲ့ ကိုမို အသင်းမှာသာ နည်းပြအဖြစ် လုပ်ကိုင်ဖို့ ရွေးချယ်သွားခဲ့ပါတယ် ။
