နိုင်ငံတကာရက်သတ္တပတ်အပြီး ပြန်လည်ကစားရမည့် မန်စီးတီး-လီဗာပူးလ်ပွဲစဉ်ကို အချိန်အစောဆုံးကစားရခြင်းအတွက် ဆုံးဖြတ်ချက်ချသူများမှာ ဘောလုံးကို မခံစားတတ်ကြောင်း လီဗာပူးလ်အသင်းနည်းပြ ယာဂန်ကလော့ပ်က ဝေဖန်ပြောကြားခဲ့သည်။
ပရီးမီးယားလိဂ်အပါအဝင် ကမ္ဘာတစ်ဝန်းရှိ အမှတ်ပေးပြိုင်ပွဲများကို နိုင်ငံတကာရက်သတ္တပတ်ကြောင့် နိုဝင်ဘာ ၁၃ ရက်မှ ၂၃ ရက်အထိ ရပ်နားထားရမည်ဖြစ်သည်။ နိုင်ငံတကာပွဲစဉ်များအပြီး ပြန်လည်ကစားရမည့် ပရီးမီးယားလိဂ်ပွဲစဉ် ၁၃ ၏ ပထမဆုံးပွဲအဖြစ် နိုဝင်ဘာ ၂၅ ရက် ဒေသစံတော်ချိန် မွန်းလွဲ ၁၂ နာရီခွဲ (မြန်မာစံတော်ချိန် ည ၇ နာရီ) တွင် ချန်ပီယံဆုအတွက် အဓိကပြိုင်ဘက် မန်စီးတီးနှင့် လီဗာပူးလ်အသင်းတို့ အီတီဟတ်ကွင်း၌ ယှဉ်ပြိုင်ကစားရမည်ဖြစ်သည်။
မန်စီးတီးနှင့် လီဗာပူးလ် နှစ်သင်းစလုံးတွင် တောင်အမေရိက ကစားသမားများ ပါဝင်နေပြီး ၎င်းတို့အနေဖြင့် မြန်မာစံတော်ချိန် နိုဝင်ဘာ ၂၂ ရက် နံနက်ပိုင်းအထိ ကမ္ဘာ့ဖလားခြေစစ်ပွဲ ယှဉ်ပြိုင်ကစားရမည်ဖြစ်သောကြောင့် ယာဂန်ကလော့ပ်က ယခုလိုဝေဖန်ခဲ့ခြင်းဖြစ်သည်။
“ဒီလိုပွဲမျိုးကို စနေနေ့ နေ့လယ်ပိုင်း ၁၂ နာရီခွဲမှာ ကစားဖို့ ဘယ်လိုလုပ်နိုင်ရတာလဲ။ ပွင့်ပွင့်လင်းလင်းပြောရရင် ဆုံးဖြတ်ချက်ချတဲ့လူတွေက ဘောလုံးကို မခံစားတတ်ကြဘူး။ ဒီလိုလုပ်ဖို့ မဖြစ်နိုင်ဘူး။ ဒါက ဘောလုံးပွဲ တစ်ပွဲကြည့်ဖို့ ကမ္ဘာကြီးက အချိန်အများဆုံးပေးရတဲ့ အခိုက်အတန့်ပါပဲ။ ဒီအသင်းနှစ်သင်းမှာ နိုင်ငံတကာပွဲ ကစားရမယ့် ကစားသမား (၃၀) လောက်ရှိပါတယ်။ တောင်အမေရိကကစားသမားတွေကို နိုင်ငံအသီးသီးက ခေါ်ယူပြီးတော့ လေယာဉ်တစ်စင်းတည်းနဲ့ ပြန်ခေါ်လာမှာပါ” ဟု ယာဂန်ကလော့ပ်က ပြောကြားခဲ့သည်။
ထို့ပြင် ဇယားထိပ်ဆုံးမှ လက်ရှိချန်ပီယံ မန်စီးတီး အသင်းနှင့် ကစားရမည့်ပွဲမှာ အရေးပါသော်လည်း ချန်ပီယံဆုကို ဆုံးဖြတ်ရန် စောသေးပြီး မတ်၊ ဧပြီမှသာ အဖြေထုတ်နိုင်မည်ဖြစ်ကြောင်း ၎င်းက ဆိုခဲ့သည်။ “ဘရန့်ဖို့ဒ်နဲ့ပွဲမှာ ကျွန်တော်တို့ ထိပ်တန်း အဆင့်တုံ့ပြန်မှု ပြသနိုင်ခဲ့ပေမဲ့ ရှေ့ဆက်သွားနိုင်ဖို့ လိုပါ တယ်။ ကျွန်တော်တို့က မတ် ဒါမှမဟုတ် ဧပြီလောက် ရောက်နေပြီဆိုရင်တော့ အဲဒီအကြောင်း (ချန်ပီယံဆု) ပြောလို့ရပါပြီ။ အဲဒီအချိန်အထိ ကမ္ဘာ့အခက်ခဲဆုံး လိဂ်ပြိုင်ပွဲမှာ ကိုယ့်ရဲ့ပုံစံနဲ့ ဖြတ်ကျော်နိုင်ဖို့ တိုက်ပွဲဝင်ရဦးမှာပါ” ဟု ကလော့ပ်က ဆိုခဲ့သည်။
နိုင်ငံတကာရက်သတ္တပတ်မတိုင်မီ ပွဲစဉ် ၁၂ အပြီးတွင် မန်စီးတီးက ၂၈ မှတ်ဖြင့် ဇယားထိပ်ဆုံးမှ ဆက်လက်ဦးဆောင်နေပြီး လီဗာပူးလ်မှာ အာဆင်နယ်နှင့် ရမှတ်တူ (၂၇ မှတ်)၊ ဂိုးကွာခြားချက် အသာဖြင့် ဒုတိယနေရာတွင်ရှိနေသည်။
