နာပိုလီအသင်းနှင့် ရမှတ် (၁၁)မှတ်ကွာဟနေသော်လည်း စီးရီးအေချန်ပီယံဆုအတွက် လက်မလျှော့သေးကြောင်း အင်တာမီလန်တိုက်စစ်မှူး လူကာကူကြုံးဝါး

အင်တာမီလန်အသင်းတိုက်စစ်မှူး လူကာကူက လက်ရှိအချိန်တွင် နာပိုလီအသင်းနှင့် ၎င်းတို့အသင်း ကြားရမှတ် (၁၁)မှတ်ကွာဟနေသော်လည်း စီးရီးအေချန်ပီယံဆုအတွက် လက်မလျှော့သေးကြောင်း ပြောကြားခဲ့သည်။

လာမည့်ဗုဒ္ဓဟူးနေ့တွင် ၂၀၂၂ ကမ္ဘာ့ဖလားပြိုင်ပွဲအလွန် ပထမဆုံးစီးရီးအေပွဲစဉ်များ ကစားသွားမည်ဖြစ်ပြီး အင်တာမီလန်အသင်းသည် အိမ်ကွင်း၌ နာပိုလီအသင်းကို လက်ခံကစားရမည်ဖြစ်သည်။

Sky Sport Italia နှင့် ဆုံတွေ့ချိန်တွင် လူကာကူက “နာပိုလီအသင်းနည်းပြ စပယ်လက်တီက ထိပ်တန်းနည်းပြပါ။ ပြီးတော့ နာပိုလီအသင်းမှာလည်း အရည်အသွေးမြင့်ကစားသမားတွေရှိနေပါတယ်။ ထိပ်ဆုံးနေရာမှာ ရပ်တည်ပြီး ပုံစံကောင်းပြသနေတဲ့ နာပိုလီအသင်းကို ကျွန်တော်လေးစားမှုရှိပါတယ်။ ဒါပေမဲ့ သူတို့ကို ကျွန်တော် မကြောက်ပါဘူး။ ဆုဖလားမကိုင်မြှောက်နိုင်သေးသရွေ့ ဘာမှသေချာပေါက်ပြောလို့မရပါဘူး။ ရာသီပြီးဆုံးမယ့်အချိန်က ဇွန်လ (၆)ရက်မှပါ။ အခုမှ ဇန်နဝါရီလထဲပဲ ရှိပါသေးတယ်” ဟု ပြောကြားခဲ့သည်။

လက်ရှိအချိန်တွင် အင်တာမီလန်အသင်းသည် စီးရီးအေအမှတ်ပေးဇယားအဆင့် (၅)နေရာရပ်တည်နေပြီး ချန်ပီယံလိဂ်ဝင်ခွင့်ရရှိရန်ပင် ရုန်းကန်နေရသော်လည်း လူကာကူက ယခုလိုပြောကြားခဲ့ခြင်းဖြစ်သည်။

လူကာကူသည် အင်တာမီလန်အသင်း ကစားသမားဘဝပထမအကြိမ်တွင် စီးရီးအေချန်ပီယံဆု ပိုင်ဆိုင်ဖူးသည်။