ပြီးခဲ့သည့် အတ္တလန်တာအသင်းနှင့်ပွဲစဉ်တွင် သွင်းယူခဲ့သော နာပိုလီအသင်းတိုက်စစ်ကစားသမား ခွာရတ်စကယ်လီယာ၏ဂိုးကို နာပိုလီအသင်း နည်းပြ စပယ်လက်တီအပါအဝင် ပရိသတ်များစွာက ချီးကျူးနေကြသည်။
ခွာရတ်စကယ်လီယာသည် အတ္တလန်တာအသင်းကစားသမားများစွာ ဝန်းရံထားသည့် အခြေအနေတွင် လှလှပပလှည့်ဖျားကာ ကန်သွင်းယူခဲ့ခြင်းဖြစ်သည်။
အဆိုပါဂိုးနှင့်ပတ်သက်၍ စပယ်လက်တီက “မာရာဒိုနာရဲ့ သွင်းဂိုးကို မြင်လိုက်ရသလိုပါပဲ။ ခွာရတ်စကယ်လီယာက ဘောလုံးကို လိုသလိုကစားနိုင်သူဖြစ်ပြီး လှည့်ဖျားမှုတွေလည်း ကောင်းမွန်ပါတယ်။ အခုဂိုးမှာဆိုရင် သူ့ရဲ့ ကျွမ်းကျင်မှုနဲ့ လျင်မြန်မှုကို မြင်ရနိုင်ပါတယ်” ဟု ပြောကြားခဲ့သည်။
ထို့ပြင် လူမှုကွန်ရက်မှ ပရိသတ်အများစုကလည်း ခွာရတ်စကယ်လီယာ၏ သွင်းဂိုးမှာ ဇီဒန်း၊ ဂျော့ချ်ဘတ်စ်နှင့် ဘက်ဂီယိုတို့ကဲ့သို့ စွမ်းရည်မျိုးဖြင့် သွင်းယူခဲ့ခြင်းဖြစ်ကြောင်း ချီးကျူးခဲ့သည်။
လက်ရှိရာသီတွင် နာပိုလီအသင်းအတွက် ခြေစွမ်းပြဂိုးများသွင်းယူနေသည့် ခွာရတ်စကယ်လီယာကို နာပိုလီအသင်းပရိသတ်များက မာရာဒိုနာနှင့် ခိုင်းနှိုင်း၍ Kvaradona ဟု တင်စားခေါ်ဝေါ်နေကြသည်။