ဘိုင်ယန်မြူးနစ်အသင်းသည် နည်းပြချုပ်နာဂယ်စ်မန်းကို ရာထူးမှ ချက်ချင်းထုတ်ပယ်လိုက်ပြီဖြစ်သည်။ နာဂယ်စ်မန်းသည် နိုင်ငံတကာပွဲစဉ်များအပြီးတွင် ကစားမည့် ဒေါ့မွန်နှင့်ပွဲကိုလည်း ကိုင်တွယ်ခွင့်ရတော့မည် မဟုတ်ဘဲ ဘိုင်ယန်နည်းပြချုပ် ရာထူးမှ ချက်ချင်းထွက်ခွာမည်ဖြစ်သည်။
ဖိအားများအောက်ရောက်နေသော နာဂယ်စ်မန်းကို ရာသီကုန်သီအထိမစောင့်ဘဲ ဘိုင်ယန်တာဝန်ရှိသူများက ရာထူးမှချက်ချင်း ထုတ်ပယ်လိုက်ခြင်းကြောင့် ဘောလုံးလောကမှာ အံ့အားသင့်ခဲ့ရသည်။ ဘိုင်ယန်မြူးနစ်အသင်းသည် ကန့်လန့်ကာ နောက်ကွယ်တွင် တစ်စုံတစ်ခု ဖြစ်ပျက်ခဲ့ခြင်းကြောင့် နာဂယ်စ်မန်းကို ယခုကဲ့သို့ ချက်ချင်းထုတ်ပယ်ရန် ဆုံးဖြတ်ခဲ့ခြင်းဖြစ်နိုင်ကြောင်း မီဒီယာများက သုံးသပ်ဖော်ပြသည်။
ဘိုင်ယန်သည် နာဂယ်စ်မန်းကို ထုတ်ပယ်ပြီးနောက်တွင် ချဲလ်ဆီးအသင်းမန်နေဂျာဟောင်း တူချယ်နှင့် ဆွေးနွေးနေပြီး ယခုအခါတွင် တူချယ်သည် ဘိုင်ယန်အသင်း၏ နည်းပြချုပ်ဖြစ်လာပြီဖြစ်ကြောင်းလည်း သတင်းများက ဖော်ပြကြသည်။
ထိုသို့နည်းပြချုပ်အပြောင်းအလဲဖြစ်သွားခြင်းနှင့်ပတ်သက်၍ ဘိုင်ယန်ခံစစ်မှူးကန်ဆယ်လိုက “ကျွန်တော်လည်း အခုမှ သိတယ်။ နိုင်ငံတကာပွဲစဉ်တွေကစားအပြီး မြူးနစ်ကို ပြန်ရောက်ရင် နာဂယ်စ်မန်းကို မတွေ့ရတော့ဘူးပေါ့။ နာဂယ်စ်မန်းကိုလည်း ကျေးဇူးတင်ပါတယ်။ တူချယ်ကို ပြိုင်ဘက်အဖြစ် ရင်ဆိုင်ပြီး ချန်ပီယံလိဂ်မှာ ရှုံးနိမ့်ဖူးတယ်။ ဒီတစ်ခါတော့ တူချယ်နဲ့အတူ ချန်ပီယံလိဂ်ကို အနိုင်ရနိုင်ဖို့ မျှော်လင့်ပါတယ်”ဟု ပြောဆိုလိုက်သည်။
