“နယ်သာလန်အတွက် ပထမဆုံးကမ္ဘာ့ဖလားရယူပေးနိုင်ဖို့က ကျွန်တော်တို့ရဲ့ အန္တိမပန်းတိုင်ပါ”

နယ်သာလန်အသင်းဟာ ၂၀၂၂ ကမ္ဘာ့ဖလား အုပ်စု (A) မှာ အိမ်ရှင် ကာတာ၊ ဆီနီဂေါ၊ အီကွေဒေါတို့လိုအသင်းတွေနဲ့ ကျရောက်နေပြီး အုပ်စုအဖွင့်ပွဲမှာ အာဖရိကအင်အားကြီး ဆီနီဂေါကို (၂)ဂိုး၊ ဂိုးမရှိနဲ့ အနိုင်ရထားပါတယ်။ နယ်သာလန်က ဒီပြိုင်ပွဲမှာ ရေပန်းစားတဲ့အသင်းမဟုတ်သလို ကြယ်ပွင့်ကစားသမားတွေ သိပ်မရှိပေမဲ့ ပြိုင်ပွဲကြီးတွေရောက်တိုင်း ခြေမှန်မှန်နဲ့ ကစားနေတာကို တွေ့ရတတ်ပါတယ်။ လူးဝစ်ဗန်ဟားလ်က အသင်းကို ဗန်ဒိုက်၊ ဖရန်ကီဒီယွန်း၊ ဒီပိုင်းတို့နဲ့ ကျောရိုးတည်ပြီး တည်ဆောက်ထားပါတယ်။ ဘာစီလိုနာမှာ ခြေစွမ်းပြနေတဲ့ အသက် (၂၅)နှစ် အရွယ် ဖရန်ကီဒီယွန်းက ဆီနီဂေါနဲ့ပွဲမှာ အသင်းရဲ့ကွင်းလယ်ကို ဦးဆောင်ခဲ့ပြီး ဂတ်ပိုသွင်းခဲ့တဲ့ဂိုးကို ဖန်တီးပေးနိုင်ခဲ့ပါတယ်။ ကစားသမားဘ၀ ပထမဆုံးကမ္ဘာ့ဖလားအပေါ်  ဒီယွန်းရဲ့ရင်ခုန်သံနဲ့ မျှော်လင့်ချက်တွေကို ဖော်ပြလိုက်ပါတယ်။