ဆော်ဒီအာရေဗျနိုင်ငံ၏ ဘဏ္ဍာရေးဝန်ကြီး မိုဟာမက်အယ်လ်ဂျာဒန်းက ပရီးမီးယားလိဂ် ပြိုင်ဘက်အသင်းများ၏ ကန့်ကွက်မှုများ ရှိနေသော်လည်း နယူးကာဆယ်အသင်းတွင် စပွန်ဆာအခွင့်အရေးများစွာ ရှိနေဆဲဖြစ်သည်ဟု ပြောကြားခဲ့သည်။
ပရီးမီးယားလိဂ်ကလပ်အသင်း (၂၀)မှ တာဝန်ရှိသူများနှင့် ပရီးမီးယားလိဂ်အဖွဲ့ချုပ်တို့သည် ပြီးခဲ့သည့် တနင်္လာနေ့က အရေးပေါ်အစည်းအဝေးတစ်ရပ်ကို ကျင်းပခဲ့ကြပြီး ပရီးမီးယားလိဂ်ရှိ စပွန်ဆာစာချုပ်များနှင့် ပတ်သက်သည့် အရေးပါသောဆုံး ဖြတ်ချက်တစ်ခုကို မဲခွဲဆုံးဖြတ်ခဲ့ကြသည်။
ယင်းမှာ အသင်းပိုင်ရှင်များထံမှ စပွန်ဆာငွေကြေးများကို ၎င်းတို့၏ ကလပ်အသင်းများသို့ တိုက်ရိုက်ဖြစ်စေ၊ သွယ်ဝိုက်သောနည်းဖြင့် ဖြစ်စေ မစီးဆင်းစေရန်တားဆီးသောအဆိုကို မဲခွဲဆုံးဖြတ်ခဲ့ကြခြင်းဖြစ်သည်။
နယူးကာဆယ်အသင်းအရောင်း အဝယ်ကိစ္စနှင့်ပတ်သက်ပြီး ယင်းအရေးပေါ်အစည်းအဝေးကို ပြုလုပ်ခဲ့ခြင်းဖြစ်ပြီး နယူးကာဆယ်အသင်းအနေဖြင့် နောက်ပိုင်းတွင် အသင်း၏အရှုံးငွေများကို ထေမိစေရန်အတွက် အသင်းပိုင်ရှင် ဆော်ဒီစော်ဘွားများက တစ်ဖက်လှည့်ဖြင့် စပွန်ဆာစာချုပ်များ ချုပ်ဆိုခြင်းမပြုနိုင်ရန် ကျန်ပရီးမီးယားလိဂ်(၁၈)သင်းက ကြိုးပမ်းခဲ့ကြခြင်းဖြစ်သည်။
ပရီးမီးယားလိဂ်၏ စည်းမျဉ်းများအရ ကလပ်အသင်းတစ်သင်းအနေဖြင့် (၃)ရာသီအတွင်း အများဆုံးပေါင်(၁၀၅)သန်းသာ အရှုံးငွေ ပြခွင့်ရှိပြီး နယူးကာဆယ်အသင်းမှာ ထိပ်တန်းကစားသမားများကို ဆက်တိုက်ခေါ်ယူခဲ့ပါက ယင်းပမာဏထက် များစွာ ပို၍အရှုံးပြဖွယ်ရှိနေသည်။
သို့ဖြစ်ရာ အသင်းပိုင်ရှင် ဆော်ဒီစော်ဘွားများက(အရှုံးငွေလျော့ကျရန်) တစ်ဖက်လှည့်ဖြင့် စပွန်ဆာငွေကြေးများဖြည့်တင်းနိုင်ရာ ပြိုင်ဘက်ပရီးမီးယားလိဂ်ကလပ်အသင်းများက ယင်းဖြစ်နိုင်ခြေကို ကြိုတင်တားဆီးခဲ့ခြင်း ဖြစ်သည်။
သို့သော် အယ်လ်ဂျာဒန်းက “နယူးကာဆယ်အသင်းအတွက် စပွန်ဆာအခွင့်အရေးများစွာ ရှိနေပါတယ်။ ကလပ်အသင်းတိုင်းမှာ မတူခြားနားတဲ့ လမ်းကြောင်းတွေ ရှိနေပါတယ်”ဟု ပြောကြားခဲ့သည်။
ပရီးမီးယားလိဂ်မှ တာဝန်ရှိသူတစ်ဦးကလည်း နယူးကာဆယ်အသင်းအနေဖြင့် ကွင်းအမည်မူပိုင်ခွင့်ကို ပေါင်သန်း(၁၀၀)ဖြင့် ရောင်း ချမည်ဆိုပါက တားဆီးနိုင်မည်မဟုတ်ဟု ဝန်ခံပြောကြားခဲ့သည်။
