အသင်းပိုင်ရှင်အပြောင်းအလဲဖြစ်ထားသည့် နယူးကာဆယ်အသင်းနည်းပြသစ်အဖြစ် လက်စတာနည်းပြ ဘရန်ဒန်ရော်ဂျာက ရေပန်းအစားဆုံးဖြစ်နေပြီး ဒေါ့မွန်အသင်းနှင့်လမ်းခွဲပြီးနောက် အသင်းလက်မဲ့ဖြစ်နေသည့် ဆွစ်ဇာလန်နည်းပြလူစီယန်ဖာ၏ အ လေးပေးချက်များမှာလည်း ပိုမိုမြင့်တက်လာလျက်ရှိကြောင်း သိရသည်။
နယူးကာဆယ်အသင်းကို ဆော်ဒီအိမ်ရှေ့မင်းသား ဦးဆောင်သည့် ဆော်ဒီပြည်သူ့ရင်းနှီးမြှုပ်နှံမှု ရန်ပုံငွေအဖွဲ့ဟု အမည်ရသော PIF ကုမ္ပဏီက ဝယ်ယူခဲ့ပြီးနောက် လက်ရှိနည်းပြ စတိဗ်ဘရုစ်ကို ရာထူးမှထုတ်ပယ်၍ နည်းပြသစ် အပြောင်းအလဲပြုလုပ်တော့မည်ဖြစ်ကြောင်း သတင်းများ ထွက်ပေါ်လာခဲ့သည်။
နယူူးကာဆယ်အသင်းသည် ကစားသမားပိုင်း အားဖြည့်ပြင်ဆင်မှုကို ဇန်နဝါရီလမှ ပြုလုပ်နိုင်မည်ဖြစ်သော်လည်း နည်းပြအပြောင်းအလဲကိုမူ အမြန်ဆုံးပြုလုပ်သွားဖွယ်ရှိနေပြီး လက်ရှိနည်းပြ စတိဗ်ဘရုစ်အနေဖြင့် လာမည့် အောက်တိုဘာ ၁၇ ရက်တွင် စပါးအသင်းနှင့်ကစားမည့် ပရီးမီးယားလိဂ်ပွဲစဉ်မတိုင်မီမှာပင် ရာထူးမှ ထုတ်ပယ်ခံရနိုင်သည်ဟု ထင်ကြေးပေးမှုများလည်း ရှိနေသည်။
နယူးကာဆယ်အသင်းတာဝန်ရှိသူများသည် အသင်းကို အချိန်တိုအတွင်း အင်အားကြီးအသင်းတစ်သင်းအဖြစ် ပြုပြင်တည်ဆောက်သွားရန် ရည်ရွယ်ထားခြင်းကြောင့် နည်းပြသစ်ခန့်အပ်ရာတွင် ယခုရာသီတစ်ခုစာအတွက်သာမက အနာဂတ်အတွက်ပါ စဉ်းစားသွားဖွယ်ရှိနေသည်။
ထို့ကြောင့် အသင်းသစ်များအား အချိန်တိုအတွင်း အကောင်းဆုံးပုံဖော်နိုင်စွမ်းရှိသည့် နည်းပြများကို အဓိကပစ်မှတ်ထားနေခြင်းဖြစ်သည်။
ဘောလုံးလောင်းကစားကုမ္ပဏီများတွင် နယူးကာဆယ်နည်းပြသစ်အတွက် အလေးပေးချက်များကို အသီးသီးထုတ်ပြန်ထားပြီး လက်စတာအသင်း၏မြောက်အိုင်ယာလန် နည်းပြ ဘရန်ဒန်ရော်ဂျာက အံ့အားသင့်ဖွယ် ရေပန်းအစားဆုံးဖြစ်နေကြောင်း သိရသည်။
နာမည်ကြီးကုမ္ပဏီများဖြစ်သည့် Sky Bet၊ Paddy Power၊ William Hill၊ Betfair၊ BetVictor တို့က ဘရန်ဒန်ရော်ဂျာကို အလေးပေးချက်တွင် ထိပ်ဆုံးနေရာပေးထားခဲ့ခြင်းဖြစ်သည်။
အစောပိုင်းတွင် လောင်းကစားကုမ္ပဏီကြီးများအကြား အလေးပေးချက်များမှာ ကွဲပြားမှုရှိခဲ့သော်လည်း အောက်တိုဘာ ၁၂ ရက်တွင် ဘရန်ဒန်ရော်ဂျာကို တညီတညွတ်တည်း ထိပ်ဆုံး၌ထားရှိခဲ့ကြကြောင်း သိရသည်။
၂၀၀၉-၂၀ ရာသီကုန်တွင် ဒေါ့မွန်နှင့်လမ်းခွဲပြီးကတည်းက အသင်းလက်မဲ့ဖြစ်နေသည့် လူစီယန်ဖာသည် ပြီးခဲ့သည့်ရက်အနည်းငယ်က ၅ဝး၁ လေးသာ ရှိရာမှ အောက်တိုဘာ ၁၀ ရက်တွင် ၃၃း၁ လေးအထိ မြင့်တက်ခဲ့ပြီး လက်ရှိ၌မူ ၅း၁ လေးဖြင့် ဒုတိယ နေရာတွင် ရပ်တည်နေခြင်းဖြစ်သည်။
