ပီအက်စ်ဂျီအသင်းသည် ဘာစီလိုနာနှင့်စပိန် နည်းပြချုပ်ဟောင်း အန်နရီကေးကို အသင်း၏နည်းပြချုပ်အဖြစ် ခန့်အပ်လိုက်ပြီဖြစ်ကြောင်း အတည်ပြုသတင်းထုတ်ပြန်ကြေညာလိုက်သည်။
ပီအက်စ်ဂျီသည် နည်းပြချုပ် ဂေါ်လ်တီယာကို ရာထူးတွင် ခန့်ထားပြီး တစ်နှစ်အကြာတွင် အလုပ်မှ ထုတ်ပယ်လိုက်ပြီဖြစ်ကြောင်း ကြေညာလိုက်ပြီးနောက် အန်နရီကေးကိုယခုကဲ့သို့ တရားဝင်ခန့်အပ်လိုက်ပြီဖြစ်ကြောင်း ကြေညာလိုက်ခြင်း ဖြစ်သည်။
ပြီးခဲ့သည့်ကမ္ဘာ့ဖလားအပြိးတွင် စပိန်နည်းပြချုပ်အဖြစ်မှ နုတ်ထွက်ပြီးကတည်းက အန်နရီကေးသည် မည်သည့်အသင်းကိုမျှ ကိုင်တွယ်ရခြင်းမရှိသေးချေ။ အန်နရီကေးသည် ၂၀၁၇ တွင် ဘာစီလိုနာအသင်းနည်းပြချုပ်အဖြစ်မှ နုတ်ထွက်ပြီးကတည်းကလည်း မည်သည့်ကလပ်အသင်းကိုမျှကိုင်တွယ်ခြင်းမရှိသေးချေ။
“ပဲရစ်ကလပ်အသင်းကို ကိုင်တွယ်ခွင့်ရတာက ကျွန်တော့်အတွက် အတွေ့အကြုံသစ်ဖြစ်ပါတယ်။ အခုလိုမြို့ကြီးမှာ အခြေချပြီး ပတ်ဝန်းကျင်အသစ် ဘာသာစကားအသစ်တွေနဲ့တွေ့ကြုံရတာက စိတ်လှုပ်ရှားစရာပါ။ အားလုံးထဲမှာ အကောင်းဆုံးကတော့ ပီအက်စ်ဂျီအသင်းကို ကိုင်တွယ်ခွင့်ရတာပဲ ဖြစ်ပါတယ်”ဟု အန်နရီကေးက အသင်း၏တရားဝင်ဝက်ဘ်ဆိုဒ်သို့ ပြောဆိုလိုက်သည်။
