ဆော်ဒီထိပ်သီးကလပ် အယ်လ်အစ်တီဟတ်အသင်းသည် ဗီလာအသင်းတောင်ပံကစားသမား မူဆာဒီယာဘီကို ပေါင်သန်း (၅၀) ဖြင့်ခေါ်ယူရန် နှုတ်အားဖြင့် သဘောတူညီမှုရရှိထားပြီး မန်စီးတီးအသင်းဂိုးသမား အီဒါဆန်ကိုလည်း ပေါင်သန်း (၅၀) ဖြင့် ထပ်မံခေါ်ယူရန် ကြိုးပမ်းနေကြောင်း သိရှိရသည်။
အပြောင်းအရွှေ့ကျွမ်းကျင်သူ ဖာဘရီဇီယိုရိုမာနို၏ ဖော်ပြမှုအရ အယ်လ်အစ်တီဟတ်အသင်းသည် အသက် (၂၅)နှစ်အရွယ် ပြင်သစ်လက်ရွေးစင်ကစားသမား ဒီယာဘီကို Add-ons ကြေးအပါအဝင် ယူရိုသန်း ၆၀ (ပေါင် ၅၀ ဒ သမ ၅ သန်း) ဖြင့် ခေါ်ယူရန် နှုတ်အားဖြင့် သဘောတူညီမှုရရှိထားပြီး (၅)နှစ်စာချုပ် လက်မှတ်ရေးထိုးမည်ဖြစ်သည်။
ဒီယာဘီသည် ပြီးခဲ့သည့်နှစ်နွေရာသီတွင် လေဗာကူဆင်အသင်းမှ ဗီလာအသင်းသို့ ကလပ်စံချိန်တင်ပြောင်းရွှေ့ကြေး ပေါင် (၅၂)သန်းဖြင့် ရောက်ရှိလာသူဖြစ်ပြီး ပြိုင်ပွဲစုံ (၅၄) ပွဲကစား၊ (၁၀) ဂိုးသွင်းယူကာ ဂိုးဖန်တီးမှု (၉)ကြိမ် ပြုလုပ်ပေးနိုင်ခဲ့သည်။
ထို့ပြင် အယ်လ်အစ်တီဟတ်အသင်းသည် မန်စီးတီးအသင်း၏ ဘရာဇီးလ်လက်ရွေးစင်ဂိုးသမား အီဒါဆန် (၃၀ နှစ်) ကို ပေါင်သန်း (၅၀) ဖြင့် ခေါ်ယူရန် ထပ်မံကြိုးပမ်းနေကြောင်း သိရသည်။
အီဒါဆန်ကို အယ်လ်နာဆာအသင်းက ပေါင် (၂၅)သန်းဖြင့် ကမ်းလှမ်းသော်လည်း ပယ်ချခံရသဖြင့် အယ်လ်အစ်တီဟတ်အသင်းက ပေါင်သန်း (၅၀) အသုံးပြုရန် စီစဉ်ထားခြင်းဖြစ်သည်။
အယ်လ်အစ်တီဟတ်အသင်းသည် မန်စီးတီးအသင်းကွင်းလယ်လူ ဒီဘရိုင်းနားနှင့်လည်း ပုဂ္ဂိုလ်ရေးသဘောတူညီမှုရထားကြောင်း သတင်းများထွက်ပေါ်လျက်ရှိပြီး မန်စီးတီးအသင်းကမူ ဒီဘရိုင်းနားကို ရောင်းထုတ်ရန် စီစဉ်နေသည်ဆိုသည့် သတင်းများအား ငြင်းဆန်ပယ်ချထားသည်ကို တွေ့ရသည်။
ဆော်ဒီပရိုလိဂ်ပြိုင်ပွဲသည် အသင်းပေါင်း (၁၈)သင်းဖြင့် ဖွဲ့စည်းထားသည့် ပြိုင်ပွဲတစ်ခုဖြစ်ပြီး စုစုပေါင်းကစားသမား (၅၀၆) ဦးအထိရှိရာတွင် နိုင်ငံခြားသားကစားသမား (၁၂၃) ဦးအထိ ရောက်ရှိနေပြီဖြစ်သည်။
ပြိုင်ပွဲတစ်ခုလုံးတွင် ကစားနေသည့် နို်င်ငံခြားသားအရေအတွက်မှာ စုစုပေါင်းကစားသမားဦးရေ၏ (၂၅) ရာခိုင်နှုန်းနီးပါး ရှိနေပြီး ထိပ်တန်းကစားသမားများစွာ ယှဉ်ပြိုင်ကစားလျက်ရှိသည်။
