နာပိုလီ ဥက္ကဋ္ဌဖြစ်သူ ဒီလော်ရန်တစ်က ဥရောပ ဘောလုံးလောကရဲ့ တစ်ခုတည်းသော ကလပ်ကသာ ဗစ်တာအော်စီမန်အတွက် တောင်းဆိုထားတဲ့ ပြောင်းရွေ့ကြေးကို ပေးချေဖို့ တက်နိုင်တယ်လို့ ဆိုလိုက်ပါတယ်။ အော်စမန်ဟာ ပြီးခဲ့တဲ့ ရာသီက စီးရီးအေ ချန်ပီယံ ဖြစ်ခဲ့တဲ့ နာပိုလီ အတွက် ၃၁ ဂိုး သွင်းယူခဲ့ကာ ဥရောပထိပ်တန်းကလပ်တွေရဲ့ မျက်စိကျမှုကို ခံနေရပါတယ်။
ယူနိုက်တက် ချဲလ်ဆီး အပြင် ဘိုင်ယန်မြူးနစ် အသင်းကလည်း အော်စီမန်ကို ခေါ်ယူဖို့ စိတ်၀င်စားနေကြပေမယ့်လည်း နာပိုလီ အသင်း ကတော့ အော်စီမန် အတွက် အနည်းဆုံး ယူရိုသန်း ၁၅၀ ပတ်၀န်းကျင် အလို ရှိနေတာကြောင့် တွန့်ဆုတ်နေကြပါတယ်။ ဒီလော်ရန်တစ်က ဒီနွေရာသီမှာ ကီလီယန်အမ်ဘက်ပေကို လက်လွှတ်သွားရဖို့ ရှိနေတဲ့ ပီအက်ဂျီ အသင်းကသာ အော်စီမန်ကို ခေါ်ယူဖို့ တက်နိုင်တဲ့ တစ်ခုတည်းသော ကလပ် ဖြစ်တယ်လို့ ဆိုလိုက်ပါတယ်။
ဒီလော်ရန်တစ်က “ဒီနွေရာသီမှာ ကျနော်တို့ အသင်းရဲ့ တိုက်စစ်မှုး ဗစ်တာအော်စီမန်ကို ခေါ်ယူဖို့ တက်နိုင်တဲ့ တစ်ခုတည်းသော ကလပ်ကတော့ ပဲရစ်စိန့်ဂျာမန်း အသင်းပဲ ဖြစ်ပါတယ်။ အကယ်လို့ နာဆာအယ်ခီလိုင်ဖီ အနေနဲ့ အော်စီမန် အတွက် ကျနော်တို့ကို ယူရိုသန်း ၂၀၀ ၀န်းကျင်နဲ့ ကမ်းလှမ်းလာခဲ့မယ် ဆိုရင် ကျနော်တို့ ဘာဖြစ်လာမလဲ ဆိုတာ စောင့်ကြည့်သွားရမှာ ဖြစ်ပါတယ်။ ကျနော့်ရဲ့ ပုဂ္ဂိုလ်ရေး အမြင် ကတော့ အော်စီမန်ဟာ လာမည့် ရာသီ ဒီမှာပဲ ဆက်နေဖြစ်မှာပါ။” လို့ ဆိုလိုက်ပါတယ်။
ဆက်လက်ပြီး ဒီလော်ရန်တစ်က “အော်စီမန်ဟာ နာပိုလီရဲ့ ရာသီသစ် အကျီကို သေချာပေါက် ၀တ်ဆင် ကစားသွားမှာပါ။ အကယ်၍ တအားကို ကောင်းလှတဲ့ ကမ်းလှမ်းမှု ရရှိလာခဲ့မယ် ဆို၇င်တော့ ကျနော်တို့ သူ့ကို လက်လွှတ်ပေးသွားမှာ ဖြစ်ပြီး ဒီကနေ ရတဲ့ ငွေကြေးနဲ့ အရည်အသွေးကောင်းတဲ့ ကစားသမားတွေကို ရှာဖွေနိုင်မှာပါ။” လို့ ဆိုလိုက်ပါတယ်။
