ယခု တပတ် ရက်ပိုင်း အတွင်း ထွက်ပေါ်လာတဲ့ သတင်းတွေ အရ ၊ ချဲလ်ဆီး အသင်း ဂန္တဝင် ခံစစ်မှူးဟောင်း ဂျွန်တယ်ရီ ဟာ ယခင် အသင်းဖော်ဟောင်း ဖရန့် လမ်းပတ် ကိုင်တွယ်ခဲ့ဖူးတဲ့ ဒါဘီ အသင်း ရဲ့ မန်နေဂျာသစ် ရာထူး အတွက် အထူး ရေပန်းစားနေတယ် လို့ သိရပါတယ် ။
တယ်ရီ ဟာ လောလောဆယ် မှာ အက်စတွန် ဗီလာ အသင်း ရဲ့ လက်ထောက် မန်နေဂျာ အဖြစ်သာ ၊ တာဝန်ယူနေဆဲ ဖြစ်ပါတယ် ။ ဒါဘီ အသင်း ကတော့ ချန်ပီယံရှစ် မှာ အတော်လေး အခြေအနေ ဆိုးနေပြီး ၊ ၁၅ပွဲ ကစား ၊ ရမှတ် ၈မှတ် နဲ့ ဇယား အောက်ဆုံး ကို ရောက်ရှိလို့ နေပါတယ် ။
ဒါဟာ လမ်းပတ် လက်ထက် က ပရီးမီးယားလိဂ် သို့ တန်းတက်လာဖို့ ၊ အတော်လေး အားကောင်းခဲ့ဖူးတဲ့ ဒါဘီ အသင်း နဲ့တော့ ပြောင်းပြန် အခြေအနေ ကို ရောက်နေပါတယ် ။ ဒါဘီ အသင်း ဟာ ပြီးခဲ့တဲ့ ရက်ပိုင်း အတွင်းကပဲ ၊ ရလဒ်ဆိုးတွေ ဆက်တိုက် ကြုံနေခဲ့ရတဲ့ မန်နေဂျာ ဖိလစ် ကိုကူး ကို ရာထူးမှ ထုတ်ပယ်ခဲ့ပါတယ် ။
လောလောဆယ် မှာတော့ ယာယီ မန်နေဂျာ အဖြစ် မန်ချက်စတာ ယူနိုက်တက် အသင်း ရဲ့ ဂန္တဝင် တိုက်စစ်မှူးဟောင်း ဝိန်းရူနီ ကို ကစားသမား – မန်နေဂျာ အဖြစ် ခန့်အပ်ထားလျက် ရှိပါတယ် ။ ရူနီ ဟာ ဒါဘီ အသင်း ကို တကယ့် မန်နေဂျာသစ် မရောက်လာခင် အထိ ဆက်လက် ထိန်းသိမ်းထားမှာ ဖြစ်ပါတယ် ။
ပြီးခဲ့တဲ့ အပတ် အတွင်းကပဲ ချဲလ်ဆီး နည်းပြ ဖရန့် လမ်းပတ် ဟာ ဒါဘီ အသင်း ရဲ့ ယာယီ မန်နေဂျာ ဖြစ်လာခဲ့တဲ့ အင်္ဂလန် လက်ရွေးစင် အသင်းဖော်ဟောင်း ရူနီ အတွက် အကြံပြု မက်ဆေ့ချ် ပေးခဲ့ပြီး ၊ အခုတခါ ဒါဘီ အသင်း ရဲ့ မန်နေဂျာသစ် ရာထူး အတွက် အထူး ရေပန်းစားနေတဲ့ ကလပ် အသင်းဖော်ဟောင်း ဂျွန်တယ်ရီ ဖက်က အခုလိုပဲ ထောက်ခံ ပေးခဲ့ပါတယ် ။
မနေ့က ပွဲကြို သတင်းစာ ရှင်းလင်းပွဲ မှာ လမ်းပတ် က ” ဟုတ်ပါတယ် ။ ကျွန်တော် ကတော့ ဂျွန် ဟာ မန်နေဂျာ တယောက် ဖြစ်လာဖို့ ကံပါလာတယ် လို့ ထင်ပါတယ် ။ သူဟာ ပြီးခဲ့တဲ့ နှစ်အနည်းငယ် အတွင်း အက်စတွန် ဗီလာ မှာ ဒင်းစမစ် ရဲ့ လက်ထောက် မန်နေဂျာ အဖြစ် ကောင်းကောင်း အလုပ်လုပ်နိုင်ခဲ့ပါတယ် ။ ”
” အကယ်၍ ဒါဘီ အသင်း ကို ကိုင်တွယ်ဖြစ်ရင်တော့ ၊ အဲ့ဒီမှာ သူ သေချာပေါက် ပညာတွေ ထပ်ရဦးမှာပါ ။ ဂျွန်မှာ ပိုင်ဆိုင်ထားတဲ့ အရာတွေက ပွဲအတွေ့အကြုံတွေ ဖြစ်ပါတယ် ။ ကျွန်တော် ဟာ သူနဲ့အတူ နှစ်ပေါင်း များစွာ တွဲကစားဖူးတဲ့ အတွက် ၊ သူ ဘယ်လို အရာတွေကို ကမ်းလှမ်းပေးနိုင်လဲ ဆိုတာ ကောင်းကောင်း သိပါတယ် ။ ”
” အပြင်က သတင်းတွေသာ တကယ် မှန်တယ် ဆိုရင်တော့ ဒါဘီ မန်နေဂျာ ရာထူး ဟာ သူ့အတွက် တကယ့် အလားအလာ ကောင်းတဲ့ အလုပ် တခု လို့ ကျွန်တော် ယူဆပါတယ် ။ ကျွန်တော် ဟာ ဒါဘီ အသင်း မှာတုန်းက အချိန်တို အတိုင်းအတာ တခု သာ ရခဲ့ပေမယ့် ၊ အဲ့ဒီမှာ ချစ်ခြင်း မေတ္တာတွေ အများကြီး ခံစားခဲ့ရဖူးပါတယ် ။ ”
” ဒါဘီ အသင်း ဟာ ဘယ်လောက် ကြီးကျယ်တဲ့ ကလပ် အသင်း တသင်း ၊ ဘယ်လို ပရိသတ်မျိုး ပိုင်ဆိုင်ထားတဲ့ အသင်း ၊ အဲ့ဒီ မြို့မှာ နေထိုင်ရတဲ့ ခံစားချက် က ဘယ်လိုလဲ ဆိုတာ ကျွန်တော် ကောင်းကောင်း သိပါတယ် ။ ဂျွန် ဟာလည်း ဆာလောင် ပြင်းပြမှု ရှိတဲ့ ၊ ရည်မှန်းချက် ကြီးမားတဲ့ မန်နေဂျာ တယောက် ဖြစ်လာနိုင်ပါတယ် ။ ”
” ဒါဘီ မှာပဲ ဖြစ်ဖြစ် ၊ ဘယ်အသင်းမှာပဲ ဖြစ်ဖြစ် ၊ ဂျွန် ဟာ သူ့ရဲ့ ကြိုးစားအားထုတ်မှု လမ်းစဉ် အတိုင်း ဆက်လက် ကျင့်သုံးနေမှာပါ ။ ဒါထက်လည်း ကျွန်တော် မသိတော့ပါဘူး ။ ဒါပေမယ့် ကျွန်တော့ အမြင်မှာတော့ ဂျွန်ဟာ အံ့သြဖွယ် မန်နေဂျာ တယောက် ဖြစ်လာနိုင်တယ် လို့ ထင်ပါတယ် ။ ” လို့ ပြောကြားခဲ့ပါတယ် ။
