ဒါဘီအသင်း၏ ကစားသမား နည်းပြအဖြစ်မှ ယာယီနည်းပြအဖြစ် လွှဲပြောင်းတာဝန်ယူတော့မည့် မန်ယူဂန္ထဝင်တိုက်စစ်မှူးဟောင်း ဝိန်းရွန်နီက သူသည် ဇန်နဝါရီအပြောင်းအရွှေ့ကာလတွင် ငွေကြေးသုံးစွဲခွင့်ပြုမည့် အာမခံချက်ရရှိမှ အမြဲတမ်းနည်းပြ တာဝန်ကို လက်ခံဆောင်ရွက်သွားမည်ဖြစ်ကြောင်း အသင်းနှင့် နီးစပ်သူ တစ်ဦးက အတည်ပြုခဲ့သည်။
ဒါဘီအသင်းသည် ၎င်းတို့အသင်း၏ နည်းပြဖြစ်သူ ဖိလစ်ကိုကူးအား ရာထူးမှ ထုတ်ပယ်ရန်ဆုံးဖြတ်ခဲ့ပြီးနောက် ကစားသမား-လက်ထောက်နည်းပြအဖြစ် ဆောင်ရွက်နေသည့် ရွန်နီအား ယာယီနည်းပြအဖြစ် တာဝန်ပေးခဲ့ခြင်းဖြစ်သည်။
ရွန်နီသည် အသင်းကြီး၏ ယာယီနည်းပြ ဖြစ်လာခဲ့ပြီးနောက် ပထမဆုံးအကြိမ်အဖြစ် သူ၏ သဘောထားကို အသင်းတာဝန်ရှိသူတစ်ဦးမှတစ်ဆင့် သိရှိရခြင်းလည်းဖြစ်သည်။
အမည်မဖော်ပြထားသည့် ယင်းတာဝန်ရှိသူက “ဝိန်းက အသင်းပိုင်ရှင်အပြောင်းအလဲကို အမြန်ဆုံးဖြစ်စေချင်နေပါတယ်။ တကယ်သာဖြစ်လာရင် သူ့အတွက် အပြောင်းအရွှေ့အသုံးစရိတ်တွေ ရလာမယ်ဆိုတာကိုလည်း သူသိပါတယ်။ သူကလည်း ဒါဘီအသင်းကို ငွေကြေးသုံးစွဲခွင့်ပေးဖို့ အာမခံချက်တောင်းနေပြီး၊ ကတိကဝတ်ကိုရမှ အမြဲတမ်းနည်းပြရာထူးကို လက်ခံဆောင်ရွက်မှာပါ”ဟု ပြောကြားခဲ့သည်။
လက်ရှိအချိန်တွင် ဒါဘီအသင်းကို ကာတာတော်ဝင်မိသားစုဝင်တစ်ဦးဖြစ်သည့် အယ်လ်နာယန်က လွှဲပြောင်းဝယ်ယူရန် စီစဉ်နေပြီး EFL ကလည်း ခွင့်ပြုချက်ပေးပြီးဖြစ်သည်။
အယ်လ်နာယန်သည် မန်စီးတီးအသင်းပိုင်ရှင် ရှိက်ခ်မန်ဆော်နှင့်ညီအစ်ကိုဝမ်းကွဲ တော်စပ်သူဖြစ်သည်။
