မန်စီးတီးကွင်းလယ်တိုက်စစ်ကစားသမား ဂရီးလစ်ရှ်နှင့် လီဗာပူးလ်နောက်ခံလူ အာနိုးလ်တို့သည် ဒဏ်ရာပြဿနာများကြောင့် နိုင်ငံတကာပွဲများကစားမည့် အသင်းလူစာရင်းမှ နုတ်ထွက်ခဲ့ကြောင်းသိရသည်။
ဂရီးလစ်ရှ်သည် ပေါင်ဒဏ်ရာ ရရှိထားပြီး ပြီးခဲ့သည့်စနေနေ့က ကစားခဲ့သော ဖူလ်ဟမ်ကို (၅-၁)ဂိုးဖြင့် အနိုင်ရသည့်ပွဲအား လွဲချော်ခဲ့သည်။ အာနိုးလ်မှာမူ အက်စတွန်ဗီလာအား (၃-၀)ဂိုးဖြင့် အနိုင်ရသည့်ပွဲတွင် တံကောက်ကြောဒဏ်ရာကြောင့် လူစားလဲ ခံခဲ့ရခြင်းဖြစ်သည်။
အင်္ဂလန်အသင်းနည်းပြ ဆောက်ဂိတ်သည် ၎င်းတို့၏နေရာတွင် အစားထိုးရွေးချယ်မှု မပြုလုပ်ရန် ဆုံးဖြတ်ခဲ့ကြောင်းလည်း ဗြိတိန်မီဒီယာများက ဖော်ပြခဲ့ကြသည်။ ဆောက်ဂိတ်အနေဖြင့် ယခုနိုင်ငံတကာပွဲများအတွက် ချယ်လ်ဆီးတောင်ပံကစားသမား စတာလင်နှင့် ဝက်စ်ဟမ်းကွင်းလယ်လူ ဝက်ဒ်ပရောက်စ်တို့အား မရွေးချယ်မှုအတွက် ဝေဖန်ခံနေရသည်။
အင်္ဂလန်အသင်းသည် စက်တင်ဘာလ ၉ ရက်တွင် ယူကရိန်းအသင်း နှင့် ယူရိုခြေစစ်ပွဲ၊ စက်တင်ဘာလ ၁၂ ရက် တွင် စကော့တလန်နှင့် ခြေစမ်းပွဲများ ကစားသွားမည်ဖြစ်သည်။
