ဗလင်စီယာ ကို အဝေးကွင်းမှာ ဂိုးပြတ် ရှုံးနိမ့်ခဲ့တဲ့ ရီးရဲ မက်ဒရစ် အသင်းဟာ ဒီတစ်ပတ်မှာလဲ အမှတ်ပေးဇယား အဆင့် 2 နေရာမှာ ရပ်တည်နေတဲ့ ဗီလာရီးရဲ အသင်းကို အဝေးကွင်းမှာ ရင်ဆိုင် ကစားရမှာ ဖြစ်ပါတယ်။
အဲဒီနောက်မှာတော့ ချန်ပီယံ လိဂ် နောက်တစ်ဆင့် တက်ဖို့ အရေးကြီးတဲ့ ပွဲစဉ် အဖြစ် အင်တာမီလန် အသင်းကို အဝေးကွင်းမှာပဲ ထပ်ပြီး ယှဉ်ပြိုင် ကစားရမှာပါ။
လက်ရှိ အခြေအနေအရတော့ နည်းပြ ဇီဒန်း အနေနဲ့ အဓိက ကစားသမား 9 ယောက် အထိ မပါဝင်ပဲ နဲ့ ခက်ခဲတဲ့ တိုက်ပွဲတွေကို ရင်ဆိုင်ရဖွယ် ရှိနေပါတယ်။
သတင်းကောင်း တစ်ခုက ဗိုင်းရပ်ပိုး ကူးစက်ခံထားရတဲ့ ကက်စမဲရိုး ဟာ Negative ရလာဒ် အဖြေ ထွက်ခဲ့ပြီ ဖြစ်ပေမယ့် ၊ ဟာဇက် နဲ့ မီလီတာအို တို့နှစ်ယောက် စလုံးကတော့ ကွာရာတင်း ဆက်လက် ဝင်နေရဆဲ ဖြစ်ပါတယ်။ သူတို့ နှစ်ယောက် အခြေအနေနဲ့ ပတ်သက်လို့တော့ ထူးခြားမှု တစ်စုံတရာ ပေါ်ထွက်လာခြင်း မရှိသေးပါဘူး။
တစ်ချိန်တည်းမှာပဲ ဆာဂျီယို ရာမို့စ် နဲ့ ဗာရန်း တို့ဟာ နိုင်ငံ့လက်ရွေးစင် အသင်းတွေ အတွက် ပါဝင် ကစားပေးရင်း ၊ ဒဏ်ရာပြသနာ အသီးသီး ရရှိသွားခဲ့ကြပါတယ်။ ရာမို့စ်ဟာ ဂျာမဏီကို ဂိုးပြတ် အနိုင်ရတဲ့ ပွဲစဉ်မှာ တံကောက်ကြော ဒဏ်ရာ ရရှိသွားခဲ့တာ ဖြစ်ပြီး ၊ ဗာရန်း ကတော့ ပုံခုံး ဒဏ်ရာ ရရှိခဲ့တာပါ။
စပိန် နည်းပြ လူးဝစ် အင်းနရစ် ကတော့ ရာမို့စ် ရဲ့ ဒဏ်ရာနဲ့ ပတ်သက်ပြီး ပြင်းထန်ခြင်း မရှိဘူးလို့ ပြောဆိုခဲ့ပေမယ့် ၊ တရားဝင် ဆေးစစ်မှုတွေကိုတော့ မနက်ဖြန်မှာ ပြုလုပ်ရမှာ ဖြစ်ပါတယ်။
အဓိက တိုက်စစ်မှုးကြီး ဘန်ဇီးမားကလဲ ဒဏ်ရာပြသနာကြောင့် ဗလင်စီယာ နဲ့ ပွဲမှာ ပွဲချိန်ပြည့် ပါဝင် ကစားပေးနိုင်ခဲ့ခြင်း မရှိပေမယ့် ၊ လေ့ကျင့်ခန်း အစီအစဉ်တွေတော့ ပြန်လည် လုပ်ဆောင်နေပြီ ဖြစ်တယ်လို့ သိရပါတယ်။ လူငယ် ကွင်းလယ် ကစားသမား ဗယ်ဗာဒီ ရဲ့ ဒဏ်ရာကတော့ တော်တော်လေး ပြင်းထန်တာမို့ အချိန် အတိုင်းအတာ တစ်ခုအထိတောင် အနားယူရဦးမှာပါ။
တစ်ချိန်တည်းမှာပဲ ကာဗာဟယ် ၊ နာချို နဲ့ အိုဒရီယိုဇိုလာ တို့ကလဲ ပြန်လည် ထူထောင်ရေး အစီအစဉ်တွေကို ဖြတ်သန်းနေပြီ ဖြစ်ပါတယ်။ ဒီတစ်ပတ် ကစားမယ့် ဗီလာရီးရဲ နဲ့ ကစားသမား စာရင်းမှာ 3 ယောက် စလုံး ပါဝင်လာဖို့ မျှော်လင့်ချက် ရှိနေပေမယ့် ၊ ကြံ့ခိုင်မှုပိုင်း ဆိုင်ရာ အကြောင်းပြချက်ကြောင့် ပွဲထွက် ကစားသမား စာရင်းမှာတော့ ပါဝင်လာဖွယ် မရှိပါဘူး။
မက်ဒရစ် အခြေစိုက် သတင်းစာတွေ ကတော့ အဓိက တိုက်စစ်မှုးကြီး ဘန်ဇီးမားဟာ လေ့ကျင့်ခန်း ပြန်ဆင်းနေတာ မှန်သော်လဲ ၊ သီးသန့် လေ့ကျင့်ရေး အစီအစဉ်တွေကိုသာ လုပ်ဆောင်နေတာ ဖြစ်ပြီး ၊ Full Training ကိုတော့ ပါဝင် လုပ်ဆောင်ခြင်း မရှိသေးဘူးလို့ ဆိုပါတယ်။ ဒါကြောင့် ဗီလာရီးရဲ နဲ့ ပွဲ အတွက် ပွဲထွက် ကစားသမား စာရင်းမှာ ပါဝင်လာဖို့ မသေချာသေးဘူးလို့ သုံးသပ်ထားပါတယ်။
ရီးရဲ မက်ဒရစ်ဟာ ဒီရာသီ လာလီဂါ 8 ပွဲ ကစားပြီးထားချိန်မှာ 2 ပွဲ အထိ ရှုံးနိမ့်ထားပြီးပြီ ဖြစ်တဲ့အပြင် ၊ ချန်ပီယံလိဂ် 3 ပွဲ ကစား ထားရာမှာလဲ 1 ပွဲပဲ အနိုင်ရရှိသေးတာ ဖြစ်ပါတယ်။
နည်းပြ ဇီဒန်း အတွက်တော့ ချန်ပီယံလိဂ် ရှုံးထွက်အဆင့်ကို တက်ရောက်နိုင်ဖို့ အတွက် အင်တာမီလန် ၊ ရှက်တာဒိုးနက် တို့နဲ့ ရင်ဆိုင် ကစားရမယ့် အဝေးကွင်း 2 ပွဲ ဆက်ကို ဘယ်လို အဖြေရအောင် ရှာဖွေသွားမလဲ ဆိုတာ တော်တော်လေး စိတ်ဝင်စားဖို့ ကောင်းနေပါတယ်။
