ရီးယဲလ်အသင်းခေါင်းဆောင် ရာမို့စ်သည် ချယ်လ်ဆီးအသင်းနှင့်ယှဉ်ပြိုင်ခဲ့သော ချန်ပီယံလိဂ် ဆီမီးဖိုင်နယ်(ဒုတိယအကျော့)ပွဲစဉ်တွင် ရရှိခဲ့သည့်ဒဏ်ရာကြောင့် ရာသီကုန်အထိ အနားယူရတော့မည်ဖြစ်ကြောင်း စပိန်အားကစားသတင်းစာ Marca က ဖော်ပြခဲ့သည်။
အသက် (၃၅)နှစ်အရွယ်ရှိ စပိန်ဝါရင့်နောက်ခံလူ ရာမို့စ်သည် တံကောက်ကြောဒဏ်ရာနှင့် ကိုရိုနာဗိုင်းရပ်စ်ကူးစက်ခံရမှုများကြောင့် ကာလရှည်အနားယူနေရသူဖြစ်ပြီး ချယ်လ်ဆီးအသင်းနှင့် (ဒုတိယအကျော့) ပွဲစဉ်တွင် ပြန်လည်ပွဲထွက်ကစားနိုင်ခဲ့ခြင်းဖြစ်သည်။
သို့သော် ရာမို့စ်၏ဒဏ်ရာမှာ အရှင်းမပျောက်သေးဘဲ ချယ်လ်ဆီးအသင်းနှင့်ပွဲစဉ်အား ပါဝင်ကစားခဲ့ခြင်းဖြစ်ပြီး ယင်းပွဲစဉ်တွင် ဒဏ်ရာဟောင်းကို ပြန်လည်ထိခိုက်မိခဲ့ခြင်းဖြစ်ကြောင်း သိရသည်။
ရာမို့စ်သည် ရီးယဲလ်အသင်းနှင့် မေ (၈)ရက်နေ့ နံနက်ပိုင်းလေ့ကျင့်ရေးအစီအစဉ်ကို လွဲချော်ခဲ့ပြီး ရာမို့စ်၏ဒဏ်ရာနောက်ဆုံးအခြေအနေအား ရီးယဲလ်အသင်းမှ ထုတ်ပြန်ခဲ့ခြင်းဖြစ်သည်။
ရီးယဲလ်မက်ဒရစ်ဆေးအဖွဲ့တာဝန်ရှိသူများ၏ စစ်ဆေးချက်များအရ ရာမို့စ်သည် ၎င်း၏ဘယ်ဘက်တံကောက်ကြောကြွက်သားတွင် ပုံမှန်မဟုတ်သည့် နာကျင်မှုပြဿနာတစ်ခု ရှိနေခြင်းဖြစ်ကြောင်း သိရသည်။
ရာမို့စ်အနေဖြင့် ယခုရာသီကုန်အထိ အနားယူရမည်ဖြစ်ရာ အသင်းနှင့်စာချုပ်သစ်မချုပ်ဆိုနိုင်ခဲ့ပါက ချယ်လ်ဆီးအသင်းအားရှုံးနိမ့်ခဲ့သည့် ချန်ပီယံလိဂ်ဆီမီးဖိုင်နယ်(ဒုကျော့)ပွဲစဉ်မှာ ၎င်း၏ရီးယဲလ်ကစားသမားဘဝ နောက်ဆုံးပွဲစဉ်ဖြစ်ခဲ့ပြီဖြစ်ကြောင်း စပိန်မီဒီယာများက ဖော်ပြခဲ့ကြသည်။
ရီးယဲလ်အသင်းတွင် ၂၀၀၅-၀၆ ရာသီမှစတင်ကာ လက်ရှိအချိန်အထိ (၁၆)နှစ်ကြာကစားခဲ့သူ ရာမို့စ်သည် ယခုရာသီကုန်တွင် အသင်းနှင့်စာချုပ်သက်တမ်းကုန်ဆုံးမည်ဖြစ်ပြီး စာချုပ်သစ်ချုပ်ဆိုရန်အတွက် သဘောတူညီမှုမရသေးကြောင်း သိရသည်။
