အာဆင်နယ်အသင်းရဲ့ နည်းပြဖြစ်သူ မီခယ်လ် အာတီတာက အသင်းမှာ ပွဲကစားခွင့်တွေ အတော်လေးကို ပျောက်ဆုံးနေရသူ ဖြစ်သလို အသင်းကနေ ရောင်းချခံရဖို့ပါ အခြေအနေများခဲ့တဲ့ ဘယ်နောက်ခံကစားသမား ကီရန် တီယာနေးကို ချန်ပီယံလိဂ် ကစားသမားစာရင်းထဲမှာပါ အံ့အားသင့်ဖွယ် ပြန်လည် ရွေးချယ်လာခဲ့တယ်လို့ သိရပါတယ်။
အသက် (၂၇)နှစ်အရွယ် စကော့တလန် ဘယ်နောက်ခံလူ တီယာနေးဟာ စကော့တလန် ထိပ်သီးကလပ် ဆဲလ်တစ်အသင်းရဲ့ အကယ်ဒမီကနေ ထွက်ပေါ်လာခဲ့သူဖြစ်ပြီး ၂၀၁၉ခုနှစ်မှာပဲ အာဆင်နယ်က ပြောင်းရွှေ့ကြေး ပေါင် (၂၅)သန်းနဲ့ တီယာနေးကို ခေါ်ယူခဲ့ပါတယ်။
အာဆင်နယ်ကို နည်းပြဟောင်း အူနိုင်း အမ်မရီ ကိုင်တွယ်ခဲ့စဉ်တုန်းက တီယာနေးကို ခေါ်ယူခဲ့တာ ဖြစ်ပေမယ့် အဲ့ဒီရာသီမှာပဲ အသင်းက နည်းပြအပြောင်းအလဲတွေ ဖြစ်ပေါ်ခဲ့ပြီး အာဆင်နယ် နည်းပြ ဖြစ်လာခဲ့တဲ့ အာတီတာက နောက်ပိုင်းနှစ်တွေမှာ အသင်းရဲ့ ဘယ်ခြမ်းခံစစ် နေရာအတွက် တီယာနေးထက် တခြားကစားသမားတွေကို နေရာပိုပေးလာခဲ့ပါတယ်။
ဒါ့အပြင် အာဆင်နယ်အသင်းဟာ ပြီးခဲ့တဲ့ ဘောလုံးရာသီက တီယာနေးကို ဆိုစီဒက်အသင်းဆီ တစ်ရာသီ အငှားချခဲ့ပြီး ဒီနွေဈေးကွက်မှာလည်း အသင်းကနေ ရောင်းထုတ်ဖို့ စီစဉ်ခဲ့ပေမယ့် ရောင်းမထုတ်ဖြစ်ခဲ့ပဲ အခုဆိုရင် အသင်းရဲ့ ချန်ပီယံလိဂ် ကစားသမားစာရင်းမှာပါ ပြန်လည် ရွေးချယ်ခံလာရပါတယ်။
အာဆင်နယ်အသင်းရဲ့ ချန်ပီယံလိဂ် ကစားသမားစာရင်းမှာ ဒီနွေမှ ခေါ်ယူထားတဲ့ နောက်ခံကစားသမား ရီကာဒို ကာလာဖီအိုရီ ၊ ကွင်းလယ်ကစားသမား မီခယ်လ် မယ်ရီနို ၊ ဂိုးသမား နက်တိုနဲ့ နွေဈေးကွက် နောက်ဆုံးနေ့ကမှ ခေါ်ယူဖြစ်ခဲ့တဲ့ တောင်ပံကစားသမား ရာဟင်း စတားလင်းတို့လည်း ပါဝင်လာခဲ့ပါတယ်။
ဒီကစားသမားသစ်တွေအပြင် အသင်းမှာ အနာဂတ် မရှိတော့တဲ့ ကစားသမားလို့တောင် သတ်မှတ်နိုင်ရမယ့် တီယာနေးဟာလည်း အာဆင်နယ်ရဲ့ ချန်ပီယံလိဂ် ကစားသမားစာရင်းမှာပါ အံ့အားသင့်ဖွယ်ရာ ပါဝင်လာခဲ့ရပြီး ပွဲကစားခွင့်တွေရော ပြန်လည် ရရှိလာနိုင်မလားဆိုတာ စောင့်ကြည့်သွားရပါတော့မယ်။
