ဗီလာရီးယဲလ်အသင်းသည် စပိန်လက်ရွေးစင်တိုက်စစ်မှူး ဂျရတ်မော်ရီနို(၂၉ နှစ်)ကို ၂၀၂၇ ခုနှစ်အထိ သက်တမ်းတိုးစာချုပ် ချုပ်ဆိုလိုက်ကြောင်း သိရသည်။
ဂျရတ်မော်ရီနို၏မူလစာချုပ်သက်တမ်းမှာ ၂၀၂၃ ခုနှစ်အထိ ဖြစ်သော်လည်း ခေါ်ယူရန် စိတ်ဝင်စားသည့်အသင်းများ ရှိနေသည့်အတွက် သက်တမ်းတိုးခဲ့ခြင်းဖြစ်ကြောင်း သိရသည်။
”ဒီအသင်းအမှတ်တံဆိပ်ကို ကိုယ်စားပြုရတာကို ကျွန်တော် အမြဲတမ်းနှစ်သက်ပါတယ်။ ကျွန်တော့်အတွက်တော့ ဒီအသင်းက ပုံရိပ်ကြီးမားတဲ့အသင်းပါ”ဟု ဂျရတ်မော်ရီနိုက ပြောကြားခဲ့သည်။
ဂျရတ်မော်ရီနိုသည် ပြီးခဲ့သည့်ရာသီက ဗီလာရီးယဲလ်အသင်းအတွက် ပြိုင်ပွဲစုံ(၄၆)ပွဲကစားပြီး ဂိုး(၃၀)အထိသွင်းယူကာ ခြေစွမ်းပြနိုင်ခဲ့သူဖြစ်သည်။
ထို့ပြင် ယခုရာသီ၌ ချန်ပီယံလိဂ်ယှဉ်ပြိုင်ကစားရမည့် ဗီလာရီးယဲလ်အသင်းအတွက် အဆုံးအဖြတ်ပေးမည့်ကစားသမား ဖြစ်လာလိမ့်မည်ဟုလည်း စပိန်မီဒီယာများက သုံးသပ်ထားကြသည်။
အသက်(၂၉)နှစ်အရွယ်ရှိ ဂျရတ်မော်ရီနိုသည် ချယ်လ်ဆီးနှင့်ကစားမည့် ဥရောပစူပါဖလားပွဲအတွက် သူ၏အားလပ်ရက်ကို လျှော့ချပြီး အသင်းနှင့် စောစီးစွာ ပူးပေါင်းခဲ့ခြင်းဖြစ်သည်။
