ဘာစီလိုနာအသင်းသည် ဇွန်လ (၃၀)ရက်တွင် အသင်းနှင့်စာချုပ်သက်တမ်းကုန်ဆုံးမည့် အသင်းခေါင်းဆောင် မက်ဆီကို စာချုပ်သက်တမ်းတိုးရန် သဘောတူညီမှုမရရှိသေးကြောင်း Goal.com က အခိုင်အမာဖော်ပြခဲ့သည်။
ဘာစီလိုနာအသင်းတာဝန်ရှိသူများသည် အသက် (၃၄)နှစ်အရွယ်ရှိ အာဂျင်တီးနားတိုက်စစ်မှူး မက်ဆီကို စာချုပ်သစ်ချုပ်ဆိုရန် ဆွေးနွေးနေသော်လည်း လက်ရှိအချိန်အထိ တိုးတက်မှုမရှိသေးကြောင်း သိရှိရသည်။
ဘာစီလိုနာအသင်းဥက္ကဋ္ဌ လာပေါ်တာက မိမိတို့အနေဖြင့် မက်ဆီအား စာချုပ်သစ်ချုပ်ဆိုနိုင်မည်ဟု ယုံကြည်ကြောင်းနှင့် မက်ဆီအနေဖြင့် အသင်းမှထွက်ခွာမည်မဟုတ်ကြောင်း ပြောကြားထားသည်။
သို့သော် Goal.com ၏ ဖော်ပြချက်အရ လာပေါ်တာသည် မက်ဆီကို စာချုပ်သစ်ချုပ်ဆိုရန်အတွက် မက်ဆီ၏ အေးဂျင့်အဖြစ်ဆောင်ရွက်နေသည့် ဖခင်ဖြစ်သူ ဟော်ဟဲမက်ဆီနှင့် ဆွေးနွေးမှုများ ပြုလုပ်နေသော်လည်း လက်ရှိအချိန်ထိ တရားဝင်ကမ်းလှမ်းခြင်းမရှိသေးကြောင်း သိရှိရသည်။
ထို့ပြင် လက်ရှိတွင် အာဂျင်တီးနားအသင်းနှင့် ကိုပါအမေရိကပြိုင်ပွဲ ကစားနေသည့် မက်ဆီကိုယ်တိုင်ကလည်း ၎င်း၏အနာဂတ်နှင့်ပတ်သက်ပြီး တစ်စုံတစ်ရာ ဆုံးဖြတ်ရခြင်းမရှိသေးကြောင်း စပိန်အားကစားသတင်းစာ Marca က ဖော်ပြခဲ့သည်။
ဘာစီလိုနာအသင်းအနေဖြင့် မက်ဆီအား စာချုပ်သစ်ချုပ်ဆိုရန် ကြိုးပမ်းရာတွင် အသင်း၏ဘဏ္ဍာရေးအခြေအနေကလည်း ပြဿနာတစ်ရပ်ဖြစ်နေကြောင်း စပိန်မီဒီယာများက ဖော်ပြနေကြသည်။
ဘာစီလိုနာအသင်းသည် ကိုရိုနာဗိုင်းရပ်စ်ကပ်ဘေးကြောင့် ဝင်ငွေများလျော့ကျခဲ့သဖြင့် လက်ရှိတွင် ကြွေးမြီ ယူရို(၁)ဘီလီယံကျော် တင်ရှိနေပြီး မက်ဆီအား အသင်းတွင်ဆက်ထိန်းမည်ဆိုပါက အသင်း၏လစာကို လျှော့ချရန် လိုအပ်ကြောင်း လာလီဂါအဖွဲ့ချုပ်(LFP)ဥက္ကဋ္ဌ တီဘက်စ်က သတိပေးပြောကြားခဲ့သည်။
ဘာစီလိုနာအသင်းသည် ပြီးခဲ့သည့် ၂၀၂၀- ၂၁ ရာသီက ကပ်ဘေးကြောင့် အသင်း၏တစ်နှစ်လစာငွေ ကို ယူရို (၆၇၁)သန်းမှ ယူရို (၃၈၂.၇)သန်းအထိ လျော့ကျခဲ့ရသည်။
သို့သော် ဘာစီလိုနာအသင်းအနေဖြင့် မက်ဆီကို စာချုပ်သစ်ထပ်မံချုပ်ဆိုမည်ဆိုပါက အဆိုပါပမာဏမှာ မလုံလောက်သေးဘဲ ထပ်မံလျှော့ချရန် လိုအပ်နေသေးသလို၊ မက်ဆီအနေဖြင့် တစ်နှစ်လစာ ယူရို (၅၀)သန်းသာ ယူရဖွယ်ရှိနေကြောင်း သိရသည်။
