စပါးအသင်းနည်းပြ ကွန်တီက ဇန်နဝါရီအပြောင်းအရွှေ့ကာလတွင် ကစားသမားသစ်ခေါ်ယူရန် အလွန်ခက်ခဲကြောင်း ဝန်ခံပြောကြားခဲ့သည်။
ကွန်တီသည် ၂၀၂၁ နိုဝင်ဘာတွင် စပါးအသင်းကို စတင်ကိုင်တွယ်ခဲ့ပြီး ၎င်းလက်ထက်တွင် စပါးအသင်းသည် ရလဒ်ကောင်းများရရှိနေသည်။
သို့သော် ကွန်တီသည် အသင်း၏လူစာရင်းကို အားရကျေနပ်မှုမရှိဘဲ ယခု ဇန်နဝါရီအပြောင်းအရွှေ့စျေးကွက်တွင် ကစားသမားသစ်များခေါ်ယူပေးရန် အသင်းတာဝန်ရှိသူများထံ တောင်းဆိုထားသည်။
သို့သော် စပါးအသင်းအနေဖြင့် လက်ရှိအချိန်(ဇန်နဝါရီ ၁၉ ရက်)အထိ ကစားသမားသစ် ခေါ်ယူနိုင်ခြင်း မရှိသေးပေ။
ကွန်တီက ”ဇန်နဝါရီမှာ ကစားသမားခေါ်ဖို့ အရမ်းခက်တယ်ဆိုတာကို ကျွန်တော် သိပါတယ်။ ရာသီအစပိုင်းမှာ ကစားသမားဝယ်ရတာ ပိုအဆင်ပြေပြီး အရေးကြီးတဲ့ ကစားသမားတွေကိုလည်း ခေါ်နိုင်ပါတယ်။ ဇန်နဝါရီမှာ ကစားသမား ခေါ်ယူရတာ ခက်ပေမဲ့ ကျွန်တော်တို့ ကြိုးစားရမှာပါ”ဟု ပြောကြားခဲ့သည်။
ကွန်တီသည် ယခုဇန်နဝါရီအပြောင်းအရွှေ့တွင် အဒါမာထရာအိုရေးနှင့် တိုက်စစ်ကစားသမား (၂)ဦးခေါ်ယူရန် ပစ်မှတ်ထားနေသည်။
