ဘာစီလိုနာနောက်ခံလူ ယော်ဒီအယ်လ်ဘာက ဆွာရက်ဇ်အား အက်သလက်တီကိုအသင်းသို့ ရောင်းချခဲ့သည့် အသင်း၏လုပ်ရပ်မှာ မှားယွင်းကြောင်း ဝေဖန်ခဲ့သည်။
ဘာစီလိုနာအသင်းသည် ၂၀၂၀ နွေရာသီအပြောင်းအရွှေ့ကာလတွင် အသင်းတိုက်စစ်မှူး ဆွာရက်ဇ်အား လာလီဂါပြိုင်ဘက် အက်သလက်တီကိုအသင်းထံ ယူရို(၆)သန်းဖြင့် ရောင်းချခဲ့သည်။
ဘာစီလိုနာအသင်းသည် အသက် (၃၄)နှစ်အရွယ်ရှိပြီဖြစ်သည့် ဆွာရက်ဇ်အနေဖြင့် အသက်အရွယ်ကြီးရင့်နေပြီဟုဆိုကာ ရောင်းထုတ်ခဲ့သော်လည်း ဆွာရက်ဇ်သည် ပြီးခဲ့သည့် ၂၀၂၀-၂၁ ရာသီက အက်သလက်တီကိုအသင်းကို လာလီဂါချန်ပီယံဆု ရရှိအောင် အဓိကနေရာမှ စွမ်းဆောင်ပေးခဲ့သူဖြစ်သည်။
ထို့ကြောင့် အယ်လ်ဘာက ဆွာရက်ဇ်ကို ပြိုင်ဘက်အသင်းထံ ရောင်းထုတ်ခဲ့သည့် အသင်း၏လုပ်ရပ်မှာ ရယ်စရာဖြစ်ကြောင်း ပြောကြားခဲ့ခြင်းဖြစ်သည်။
“ဒါ(ဆွာရက်ဇ်အား အက်သလက်တီကိုအသင်းထံ ရောင်းချခဲ့ခြင်းကို ဆိုလိုသည်)က ရယ်စရာပါပဲ။ ဆွာရက်ဇ်က ဘာစီလိုနာအသင်းအတွက် များစွာပေးဆပ်ခဲ့သူပါ။ ဒါပေမဲ့ ဘာစီလိုနာအသင်းက သူ့ကို ရောင်းထုတ်ပစ်တယ်။ ပိုဆိုးတာက ပြိုင်ဘက် အက်သလက်တီကိုအသင်းကို တိုက်ရိုက်ရောင်းလိုက်တာပါ။ အခုတော့ အက်သလက်တီကိုအသင်းက ဆွာရက်ဇ်နဲ့အတူ လာလီဂါချန်ပီယံဆုကို ယူသွားပါပြီ။ ဒါကို ကျွန်တော် သဘောမကျပါဘူး။ ပြီးတော့ ဆွာရက်ဇ်လို တိုက်စစ်မှူးမျိုး ရှာဖို့မလွယ်ပါဘူး။ ဘာစီလိုနာအသင်းမှာ ကစားသမားကောင်းတွေ ရှိပါတယ်။ ဒါပေမဲ့ အသင်းအတွက် ဆွာရက်ဇ် လုပ်ပေးခဲ့တာတွေကို လူတိုင်း သိပါတယ်။ သူက ဘာစီလိုနာအသင်းသမိုင်းမှာ တတိယမြောက် ဂိုးအများဆုံးသွင်းထားသူပါ”ဟု အယ်လ်ဘာက ပြောကြားခဲ့သည်။
ဥရုဂွေးဝါရင့်တိုက်စစ်မှူး ဆွာရက်ဇ်သည် ဘာစီလိုနာအသင်းတွင် (၆)ရာသီ ကစားခဲ့ပြီး ပြိုင်ပွဲစုံ (၂၈၃)ပွဲတွင် (၁၉၈)ဂိုး သွင်းယူခဲ့ကာ အသင်းသမိုင်းတွင် မက်ဆီ (၆၇၂ ဂိုး)၊ ဆီဆာရိုဒရီဂွက်ဇ် (၂၃၂ ဂိုး)ပြီးနောက် တတိယမြောက်ဂိုးသွင်းအများဆုံး ကစားသမားအဖြစ် ရပ်တည်နိုင်ခဲ့သည်။
