ဆော်ဒီကလပ် အယ်လ်ဟီလယ်အသင်းသို့ အယ်လီဂရီ ပြောင်းရွှေ့ဖွယ်ရှိပြီး ဂျူဗင်တပ်စ်နည်းပြသစ်အဖြစ် ကွန်တီနှင့် တူဒေါ ရေပန်းစားနေ

ဂျူဗင်တပ်စ်နည်းပြ အယ်လီဂရီသည် ဆော်ဒီကလပ် အယ်လ်ဟီလယ်အသင်းမှ မြင့်မားသည့်လစာပမာဏဖြင့် ကမ်းလှမ်းမှု ရရှိပြီးနောက် အသင်းပြောင်းရွှေ့ဖွယ်ရှိသဖြင့် ၎င်း၏နေရာတွင် အစားထိုးရန် ကစားသမားနှင့် နည်းပြဟောင်းများဖြစ်သည့် ကွန်တီနှင့် တူဒေါတို့က ရေပန်းအစားဆုံးဖြစ်နေကြောင်း သိရသည်။

အယ်လီဂရီသည် ပြီးခဲ့သည့်ရက် အနည်းငယ်အတွင်း အယ်လ်ဟီလယ် အသင်းကိုယ်စားလှယ်များနှင့် မွန်တီကာလိုတွင် တွေ့ဆုံခဲ့ကြောင်း RAI Sport က အတိအလင်းရေးသားခဲ့သည်။

အယ်လ်ဟီလယ်အသင်းသည် ဂျူဗင်တပ်စ်အသင်းနှင့် ၂၀၂၅ ဇွန်လအထိ စာချုပ်သက်တမ်းရှိနေသည့် အယ်လီဂရီကို တစ်ရာသီ ယူရိုသန်း (၃၀)ဝန်းကျင်နှင့် (၃)နှစ်စာချုပ်၊ လက်မှတ်ထိုးကြေး ယူရို(၁၀)သန်းဖြင့် ကမ်းလှမ်းခဲ့ခြင်းဖြစ်ကြောင်း သိရသည်။

(၅၅)နှစ်အရွယ်ရှိ အယ်လီဂရီကို အယ်လ်ဟီလယ်အသင်းက ယခင်ကတည်းက ကြိုးပမ်းခဲ့ခြင်းဖြစ်ပြီး ၎င်းသည် ယင်းကမ်းလှမ်းမှုကို ငြင်းဆန်ခဲ့သည်ဟု အီတလီမီဒီယာများက ယခုလအစောပိုင်းတွင် ဖော်ပြခဲ့သည်။

ဂျူဗင်တပ်စ်အသင်းတွင် အယ်လီဂရီ၏အနာဂတ် လှုပ်ခတ်လာချိန်တွင် နည်းပြသစ်ဖြစ်လာသူများစာရင်းတွင် ကွန်တီနှင့် တူဒေါက ထိပ်ဆုံး မှပြေးလျက်ရှိသည်။ နှစ်ဦးစလုံးသည် ဂျူဗင်တပ်စ်တွင် ကစားသမားဘဝရော နည်းပြဘဝပါ ဖြတ်သန်းခဲ့ဖူးပြီး လက်ရှိ၌ အသင်းလက်မဲ့ဖြစ်နေသူများ ဖြစ်သည်။

ကွန်တီသည် ဂျူဗင်တပ်စ်အသင်းနည်းပြအဖြစ် ၂၀၁၁ မှ ၂၀၁၄ အထိ (၃)နှစ်ကြာ တာဝန်ယူခဲ့ပြီး စီးရီးအေချန်ပီယံဆု (၃)ကြိမ်နှင့် ဖလား (၅)လုံး ဆွတ်ခူးပေးခဲ့သည်။ တူဒေါမှာ မူ ၂၀၂၀-၂၁ ရာသီတွင် ပီယာလို၏ လက်ထောက်နည်းပြအဖြစ် ဆောင်ရွက်ခဲ့ဖူးသည်။