မန်ချက်စတာ အခြေစိုက် ထိပ်သီး ကလပ် နှစ်သင်း ဖြစ်ကြတဲ့ မန်ချက်စတာ ယူနိုက်တက်နဲ့ မန်စီးတီး အသင်း တို့ဟာ ဒီနေ့ နံနက် မှာတော့ အိုးလ် ထရပ်ဖို့ဒ် ကွင်းထဲ ကာရာဘောင်း ဖလား ပြိုင်ပွဲရဲ့ ဆီမီးဖိုင်နယ် အဆင့် ပွဲစဉ် ကစားခဲ့ကြပြီး ဧည့်သည် အသင်းက 0 – 2 ဆိုတဲ့ ရလဒ်နဲ့ အနိုင်ယူ သွားနိုင်ခဲ့ ပါတယ် ။
ဒီပွဲမှာတော့ နှစ်ဖက် အသင်းဟာ ဂိုးပေါက် ခြိမ်းခြောက်မှုတွေကို ကိုယ်စီ လုပ်ဆောင်ခဲ့ကြပေမယ့် လူကျွံမှု ၊ ဂိုးတိုင် ထိမှန်မှု ၊ မန်စီးတီး ဂိုးသမား ရဲ့ လက်စွမ်း ပြမှုတွေကြောင့် ပထမပိုင်းဟာ ဂိုးမရှိ သရေ ရလဒ်သာ ထွက်ပေါ် ခဲ့ရ ပါတယ် ။ ဒါပေမယ့် ဒုတိယပိုင်း မှာတော့ ဂျွန်စတုန်း ၊ ဖာနန်ဒင်ဟို တို့ကြောင့် မန်စီးတီးတို့ ဂိုးတွေ ရရှိခဲ့ကြ ပါတယ် ။
အခုတော့ မန်စီးတီး တို့ဟာ ဖိုင်နယ် အဆင့်ကို တက်ရောက် နိုင်ခဲ့ပြီး တော့တင်ဟမ် ဟော့ စပါး အသင်း နဲ့ ရင်ဆိုင် ကစားရပါတော့မယ် ။ အခြား တစ်ဖက် မှာတော့ ယူနိုက်တက် တို့ဟာ ဆိုးလ်ရှား လက်အောက် ဆီမီး ဖိုင်နယ် အဆင့် အထိ လေးကြိမ် တက်ရောက် ခဲ့ရာမှာ လေးကြိမ်လုံး ရှုံးနိမ့်ခဲ့ ရတဲ့ မှတ်တမ်းဆိုး ပိုင်ဆိုင် သွားခဲ့ရ ပါတယ် ။
ယူနိုက်တက် တို့ဟာ ပြီးခဲ့တဲ့ ဘောလုံး ရာသီ တုန်းက FA ဖလား ၊ ကာရာဘောင်း ဖလား ၊ ယူရို ပါလိဂ် ဖလား ပြိုင်ပွဲ တွေရဲ့ ဆီမီး ဖိုင်နယ် အဆင့်တွေမှာ ချဲလ်ဆီး ၊ မန်စီးတီး ၊ ဆီဗီးလား အသင်း တွေနဲ့ ရင်ဆိုင်ပြီး ရှုံးနိမ့် ခဲ့ပါ သေးတယ် ။ အခုတော့ မန်စီးတီးကို နောက်တစ်ကြိမ် ရှုံးနိမ့်မှု နဲ့ အတူ 4 ကြိမ်ဆက် ရှုံးနိမ့် သွားခဲ့ကြ ပါပြီ ။
အဆိုပါ ပွဲစဉ် အပြီး မှာတော့ ယူနိုက်တက် တို့ဟာ ဆီမီး ဖိုင်နယ် ဆိုတဲ့ အဆင့်ကို ကျော်ဖြတ်ဖို့ အတွက် စိတ်ပိုင်း ဆိုင်ရာ အခက်အခဲ ( ဆိုက်ကို ) တွေကို ရင်ဆိုင် နေကြရတာမျိုး ဖြစ်နေပြီလားလို့ အမေးခံလိုက် ရချိန် မှာတော့ ဆိုးလ်ရှား က ဒီအဆင့်မှာ ပြိုင်ဖက်ကောင်း တွေကို ရင်ဆိုင်ရတယ်လို့ ဖြေရင်း ငြင်းဆန် စကားတွေ ဆိုသွား ခဲ့လိုက် ပါတယ် ။
” ဒါက စိတ်ပိုင်း ဆိုင်ရာ ဆိုက်ကို မဟုတ်ရ ပါဘူး ။ ကျွန်တော်တို့ ဆီမီးမှာ အသင်းကောင်း တွေနဲ့ ရင်ဆိုင် ခဲ့ကြရပြီး လုံလောက်စွာ မကောင်းမွန် ခဲ့ကြ ပါဘူး ။ ကျွန်တော် တို့ဟာ အခု အချိန် အင်္ဂလန် ရဲ့ အကောင်းဆုံး အသင်း နဲ့ ရင်ဆိုင်ခဲ့ ကြရတာပါ ။ ဒီလို ပွဲမှာ ကျွန်တော်တို့ လုံလောက်စွာ မကောင်းမွန် နိုင်ခဲ့ကြ ပါဘူး ” လို့ ဆိုးလ်ရှား က တုန့်ပြန် သွားခဲ့လိုက် ပါတယ် ။
မန်ချက်စတာ ယူနိုက်တက် အသင်းကို ဆိုးလ်ရှား ကိုင်တွယ်ခွင့် ရရှိတာ အခုဆို အချိန် နှစ်နှစ် ရှိနေခဲ့ ပါပြီ ။ ဒီလို အနေအထား တစ်ရပ်မှာ သူဟာ ယူနိုက်တက် အတွက် ဆုဖလား ဆွတ်ခူး ပေးထားခြင်း မရှိခဲ့ ပေမယ့် အမှတ်ပေး ဖလား ပြိုင်ပွဲမှာ ခါးသီး ပြိုင်ဖက် လီဗာပူး အသင်း နဲ့ အတူ ရမှတ်တူ နေခဲ့တဲ့ အတွက် လမ်းကြောင်း အမှန်ပေါ် ရောက်နေပြီလို့ ထင်ကြေး ပေးခံ ခဲ့ရ ပါတယ် ။
ဒါပေမယ့် သတင်း သုံးသပ်သူတွေ ကတော့ ဆိုးလ်ရှား အနေနဲ့ ဆီမီး ဖိုင်နယ် အရှုံး ရလဒ် တွေကို ကျော်ဖြတ် ပြနိုင်ဖို့ လိုအပ် နေပြီ ဖြစ်ကြောင်း ၊ ဆုဖလား ဆွတ်ခူး သင့်ပြီ ဖြစ်ကြောင်း တိုက်တွန်း ခဲ့ကြပါ သေးတယ် ။ ဒီလို အနေအထား တစ်ရပ်မှာ အရှုံး ရလဒ် ထွက်ပေါ်ခဲ့ ရတဲ့ အပေါ် …
” ဟုတ်ပါတယ် ၊ ကျွန်တော် တို့ဟာ ခြေစွမ်း ကောင်းမွန်တဲ့ ပြိုင်ဖက် အသင်း နဲ့ ရင်ဆိုင် ခဲ့ကြရ ပါတယ် ။ ကျွန်တော်တို့ ကောင်းမွန်တဲ့ မန်ချက်စတာ စီးတီး အသင်း ကို ရင်ဆိုင်ခဲ့ ရတာပါ ။ သူတို့ရဲ့ ကစားပုံက အတော်လေး ကောင်းမွန်ခဲ့ ပါတယ် ။ သူတို့ ကစားပုံ ကောင်းမွန် နေမယ် ဆိုရင်တော့ ခင်ဗျား တို့လည်း နိုင်ပွဲ ရယူဖို့ အတွက် ပိုကောင်းဖို့ လိုအပ် နေမှာ ပါပဲ ”
” ကျွန်တော်တို့ လုံလောက်စွာ မကောင်းခဲ့ကြ ပါဘူး ။ ဒါဟာ အမှန်တရား ပါပဲ ။ သူတို့ အကောင်းဆုံး ပုံစံ ပြသပြီး ကစားတဲ့ အချိန် ကျွန်တော် တို့ဟာ အကောင်းဆုံး ပုံစံ ပြသ နိုင်စွမ်း ကင်းမဲ့ နေခဲ့ကြ ပါတယ် ။ ခင်ဗျားဟာ ဆီမီး ဖိုင်နယ်မှာ ရှုံးတယ် ၊ ပွဲစဉ် တစ်ပွဲမှာ ရှုံးတယ် ဆိုတာက ရှုံးပွဲ နဲ့ ထိုက်တန်လို့ ရှုံးတာလို့ပဲ ကျွန်တော် ထင်မိ ပါတယ် ”
” ကျွန်တော်တို့ နီးစပ်မှု တစ်ခုတော့ ပိုင်ဆိုင်ထားကြ ပါပြီ ။ ဒါဟာ လွန်ခဲ့တဲ့ တစ်နှစ်ကထက် ပိုကောင်းတဲ့ မန်ချက်စတာ ယူနိုက်တက်ရဲ့ version တစ်ခုကို ပြသခြင်း ဖြစ်ခဲ့ရ ပါတယ် ။ ဒါဟာ အပေါင်း လက္ခဏာ ဆောင်တဲ့ စွမ်းဆောင်ရည် တစ်ခုပါ ။ ဒါပေမယ့် လုံလောက်စွာတော့ မကောင်းသေး ပါဘူး ” လို့ ဆိုးလ်ရှား က ပြန်လည် ဖြေကြား သွားခဲ့လိုက် ပါတယ် ။
