ဘာစီလိုနာအသင်းသည် ဆီဗီလာအသင်း၏ ပေါ်တူဂီနိုင်ငံ လစ္စဘွန်းမြို့ခရီးစဉ်သို့ လိုက်ပါသွားခြင်းမရှိသည့် နောက်ခံလူ ခွန်ဒဲအား ခေါ်ယူရန် နီးစပ်နေပြီဖြစ်ကြောင်း သိရသည်။
ဆီဗီလာအသင်းသည် ဒုတိယမြောက်ရာသီကြိုခြေစမ်းပွဲအဖြစ် တနင်္ဂနွေနေ့က စပို့တင်းလစ္စဘွန်းအသင်းနှင့် ယှဉ်ပြိုင်ကစားရာ တစ်ဂိုးစီ သရေကျခဲ့သည်။
ပြင်သစ်လက်ရွေးစင် ခံစစ်အတွင်းလူ ခွန်ဒဲ (၂၃ နှစ်)သည် ဆီဗီလာအသင်းနှင့်အတူ ပေါ်တူဂီနိုင်ငံသို့ လိုက်ပါသွားသော်လည်း လစ္စဘွန်းသို့သွားရောက်ရာတွင် မပါဝင်ဘဲ လာဂို့စ်မြို့ရှိ လေ့ကျင့်ရေးစခန်း၌ ကျန်နေရစ်ခဲ့သောကြောင့် အပြောင်းအရွှေ့သတင်းများ ပိုမိုထွက်ပေါ် လာခြင်းဖြစ်သည်။
၎င်းကို ပရီးမီးယားလိဂ်ကလပ် ချယ်လ်ဆီးအသင်းက ပေါင် ၅၅ သန်းဖြင့် ခေါ်ယူရန် နီးစပ်နေကြောင်း သတင်းများ ထွက်ပေါ်ခဲ့သော်လည်း ကစားသမားဖြစ်သူက ဘာစီလိုနာကိုသာ
ပြောင်းရွှေ့ရန် ဆန္ဒပြင်းပြနေခြင်းဖြစ်သည်။
Daily Mail သတင်းဌာန၏ ဖော်ပြမှုအရ ဘာစီလိုနာအသင်းအနေဖြင့် ခွန်ဒဲအား ပေါင် ၅၁ သန်း ဝန်းကျင်ဖြင့် ကမ်းလှမ်းဖွယ်ရှိပြီး အပြောင်းအရွှေ့၏ ၂၀ ရာခိုင်နှုန်းကို အသင်းဟောင်း ဖြစ်သည့် ဘော်ဒိုးက ခံစားခွင့်ရမည်ဖြစ်ကြောင်း သိရသည်။
ကတ်တလန်အခြေစိုက် Sport သတင်းစာကလည်း ဘာစီလိုနာအသင်းနှင့် ခွန်ဒဲတို့ ၂၀၂၆ ခုနှစ်အထိ စာချုပ်ချုပ်ဆိုရန် သဘောတူညီမှုရရှိထားပြီဟု ဖော်ပြသည်။
