စပိန်အသင်းခေါင်းဆောင် အယ်ဗာရိုမိုရာတာက အသင်းမှာ တောက်ပတဲ့အနာဂတ်ကို ပိုင်ဆိုင်ထားပါပြီလို့ ပြောခဲ့ပါတယ်။ ယနေ့နံနက်ကစားခဲ့တဲ့ပွဲစဉ်အတွင်း စပိန်က ဆားဘီးယားကို မိုရာတာရဲ့သွင်းဂိုးအပါအဝင် သုံးဂိုးပြတ် အနိုင်ရပြီး နေးရှင်းလိဂ် ကွာတားဖိုင်နယ်ကို တက်ရောက်သွားခဲ့ပါတယ်။
နည်းပြဒီလာဖွန်တေရဲ့အသင်းဟာ ယခုနှစ်အတွင်း ၁၅ပွဲကစားရာမှာ ၁၂ပွဲအထိ အနိုင်ရခဲ့ပြီး ၂၀၁၃ခုနှစ်နောက်ပိုင်း နိုင်ပွဲအများဆုံးစံချိန်ကို ရရှိခဲ့ပါတယ်။ ယာမယ်လ်၊ ရိုဒရီ၊ အိုလ်မို၊ ကာဗာဂျယ်တို့လို အဓိက ကစားသမား ၇ ဦးလောက်အထိ မပါဝင်ဘဲ ကစားခဲ့ရပေမယ့် စပိန်ဟာ အိမ်ကွင်းမှာ သက်သောင့်သက်သာပဲ အနိုင်ရခဲ့တာပါ။
မိုရာတာက “ကျွန်တော်တို့ ပြိုင်ပွဲကြီးတစ်ခုရဲ့နောက်ဆုံးအဆင့်ကို ရောက်နေပြီး အဲ့ဒါက ဂုဏ်ယူရမယ့်ကိစ္စပါပဲ။
ကျွန်တော်တို့က အမြဲတမ်း နောက်ဆုံးအဆင့်ကို ရောက်နေပေမယ့် ဒါကြီးက လွယ်ကူတယ်လို့ ထင်သွားနိုင်ပေမယ့် ဒါက ဘယ်လောက်အထိ တန်ဖိုးကြီးတယ်၊ ထူးခြားတယ်ဆိုတာ နားလည်ထားဖို့ လိုပါတယ်။
ကျွန်တော်တို့မှာ ဒဏ်ရာရကစားသမားတွေများနေပြီး သူတို့မပါဝင်နိုင်ပေမယ့် လူငယ်ကစားသမားတွေက ဝင်ရောက်အားဖြည့်နိုင်တယ်ဆိုတဲ့ အကောင်းဘက်က ကြည့်ရပါမယ်။
ကျွန်တော်တို့ ဖန်တီးခဲ့တာတွေက ထူးခြားပြီး ဒီအတိုင်းဆက်သွားနိုင်ဖို့ လိုပါတယ်။ စပိန်မှာ ကြီးကျယ်တဲ့ အနာဂတ်တစ်ခု ရှိနေပါပြီ။”လို့ ပြောခဲ့ပါတယ်။
