မန်ယူအသင်းသည် ဒေါ့မွန်အသင်းမှ ဆန်ချိုအား ခေါ်ယူရန်ကြိုးစားရာ၌ လိုအပ်သည့်ပြောင်းရွှေ့ကြေးအတွက် အသင်းရှိကစားသမား(၂)ဦးဖြစ်သော မာစီယဲလ်နှင့် ဗန်ဒယ်ဘိခ်တို့ကိုရောင်းချကာ ငွေရှာဖွယ်ရှိကြောင်း ESPN သတင်းဌာနက ဖော်ပြခဲ့သည်။
၎င်းကစားသမား (၂)ဦးမှာ ပြီးခဲ့သည့်ရာသီက ဆိုးလ်ရှား၏မန်ယူအသင်းတွင် ပုံမှန်နေရာရရန် ရုန်းကန်ခဲ့ရသူများဖြစ်ပြီး ဆိုးလ်ရှားအနေဖြင့် အသင်းကိုပြင်ဆင်ရာ၌ ၎င်းတို့ကို ရောင်းထုတ်ဖွယ်ရှိနေကြောင်း သိရသည်။
နယ်သာလန်လက်ရွေးစင်ကွင်းလယ်လူ ဗန်ဒယ်ဘိခ်သည် ပြီးခဲ့သည့် ၂၀၂၀ နွေရာသီက အေဂျက်စ်အသင်းမှ မန်ယူအသင်းသို့ ရောက်ရှိလာပြီး အသင်းတွင် ပုံမှန်နေရာရရန် ရုန်းကန်နေရသူဖြစ်ကာ ယခုနွေရာသီတွင် အသင်းမှထွက်ခွာမည်ဟု သတင်းများထွက်ပေါ်နေသူဖြစ်သည်။
ထို့အတူ မာစီယဲလ်မှာလည်း ယခုနှစ်မတ်လမှစ၍ မန် ယူအသင်း၏ပွဲစဉ်များတွင် ပါဝင်ခြင်းမရှိတော့သလို ၎င်းကိုလည်း ဆိုးလ်ရှားက ရောင်းထုတ်ရန်စီစဉ်နေကြောင်း သိရှိရသည်။
မာစီယဲလ်သည် ပြီးခဲ့သည့် ရာသီက ပြိုင်ပွဲစုံ (၃၆)ပွဲကစားခဲ့သော်လည်း (၇)ဂိုးသာ သွင်းယူနိုင်ခဲ့ပြီး (၉)ဂိုးဖန်တီးနိုင်ခဲ့သည်။
