မြန်မာ MMA ကစားသမား ထီရယ်လ် ထန်သည် မကြာမီ စိန်ခေါ်ပွဲတစ်ပွဲ ထိုးသတ်ရမည်ဖြစ်ကြောင်း လူမှုကွန်ရက်မှတစ်ဆင့် အသိပေးခဲ့သည်။
ထီရယ်လ်ထန်သည် One Championship ကပြုလုပ်နေသည့် MMA ပြိုင်ပွဲများ တွင် ယှဉ်ပြိုင်နေသူဖြစ်ပြီး လာမည့်ပွဲတွင် စာချုပ်ချုပ်ဆိုခဲ့ကြောင်းနှင့် ထိုးသတ်ရမည့်ရက်၊ ပြိုင်ဘက်ကစားသမားများကို မကြာမီ ထုတ်ပြန်မည်ဖြစ်ကြောင်း လူမှုကွန်ရက်တွင် ရေးသားဖော်ပြခဲ့ခြင်းဖြစ်သည်။
ထီရယ်လ်ထန်သည် ယခုနှစ် ဖေဖော်ဝါရီ ၁၁ ရက်က အင်ဒိုနီးရှားနိုင်ငံသား ဆူနိုတို နှင့် ထိုးသတ်ရာ ပထမအချီမှာပင် တားမြစ်ထားသည့်နေရာအား ထိုးသတ်မိသဖြင့် အချီမပြည့်ခင် ပွဲရပ်နားခဲ့ရခြင်းဖြစ်သည်။ ထီရယ်လ်ထန်သည် ၂၀၁၉ ခုနှစ်တွင် ပရော်ဖက်ရှင်နယ် MMA ကစားသမားဘဝသို့ ကူးပြောင်းခဲ့ပြီး One Championship အဖွဲ့အစည်းနှင့် လက်တွဲခဲ့ခြင်းဖြစ်သည်။
ထီရယ်လ်ထန်သည် ၂၀၁၉ ခုနှစ် မတ်လမှ ၂၀၂၂ ခုနှစ် ဖေဖော် ၀ါရီအထိ ပွဲပေါင်း ငါးပွဲ ထိုးသတ်ထားရာ သုံးပွဲနိုင်၊ တစ်ပွဲရှုံးနိမ့်ပြီး ကျန်တစ်ပွဲမှာမူ အချီမပြည့်မီ ပွဲရပ်နားခဲ့ရသည်။ ထီရယ်လ်ထန်သည် ၂၀၁၉ ခုနှစ် မတ် ၈ ရက်က ထိုးသတ်သည့်ပွဲတွင် ကမ္ဘောဒီးယား နိုင်ငံသား ဆာရော့သ်ကို အမှတ်ဖြင့်လည်း ကောင်း၊ ၂၀၁၉ ခုနှစ် ဒီဇင်ဘာ ၆ ရက်က ထိုးသတ်သည့်ပွဲတွင် တောင်ကိုရီးယားနိုင်ငံသား ကင်ဝူဂျောင်ကို အမှတ်ဖြင့်လည်း ကောင်း၊ ၂၀၂၁ ခုနှစ် ဖေဖော်ဝါရီ ၅ ရက်က ထိုးသတ်သည့်ပွဲတွင် အင်ဒိုနီးရှားနိုင်ငံသား ပေါလ်လူမီဟီကို ဒုတိယအချီတွင် ဒိုင်ပွဲရပ် ဖြင့်လည်းကောင်း အနိုင်ရရှိခဲ့သည်။
သို့သော် ၂၀၂၁ ခုနှစ် သြဂုတ် ၂၇ ရက်က ထိုးသတ် သည့်ပွဲတွင် တောင်ကိုရီးယားနိုင်ငံသား ဆောင်မင်ဂျောင်ကို အမှတ်ဖြင့် ရှုံးနိမ့်ခဲ့သည်။
