ပြီးခဲ့သည့်မေလက စာချုပ်သစ်ချုပ်ဆိုခဲ့ပြီးနောက် PSG အသင်း၏သစ္စာဖောက်မှုခံနေရသည်ဟု လူငယ်တိုက်စစ်မှူး ဘာပေ ယူဆနေကြောင်း ပြင်သစ်နာမည်ကြီးအားကစားသတင်းစာ L’Equipe က ဖော်ပြခဲ့သည်။
PSG အသင်းဥက္ကဋ္ဌ အယ်လ်ခီလိုင်ဖီ၊ အားကစားဒါရိုက်တာ လူးဝစ်ကမ်ပို့စ်နှင့် နည်းပြ ဂယ်လ်ချီသည် စာချုပ်သစ်ချုပ်ဆိုစဉ်က သူ့အား ပေးထားသည့်ကတိကဝတ်များကို ထိန်းသိမ်းခြင်းမရှိဟု ဘာပေက ယူဆနေပြီး ပြီးခဲ့သည့်မေလက PSG အသင်း နှင့် စာချုပ်သစ်ချုပ်ဆိုခြင်းမှာ မှားယွင်းခဲ့သည်ဟု ပြောကြားခဲ့ကြောင်း သတင်းရင်းမြစ်များ၏စကားကို ကိုးကားကာ ESPN သတင်းဌာနက ရေးသားခဲ့သည်။
ယင်းအခြေအနေများအပေါ် လူးဝစ်ကမ်ပို့စ်က ”ကျွန်တော် အရမ်းပဲ အံ့အားသင့်ရပါတယ်။ ဘာဖြစ်လို့လဲဆိုတော့ နေ့တိုင်း ဘာပေနဲ့ အတူ ဖြတ်သန်းခဲ့လို့ပါ။ ကျွန်တော့်ကိုရော ဥက္ကဋ္ဌကိုပါ ဇန်နဝါရီမှာ အသင်းကထွက်ခွာဖို့ သူ မတောင်းဆိုထားပါ ဘူး”ဟု ကမ်ပို့စ်က RMC Sport သို့ ပြောကြားခဲ့သည်။
ဘာပေသည် PSG အသင်းနှင့် ပြီးခဲ့သည့်မေလကမှ ၂၀၂၅ ခုနှစ်အထိ စာချုပ်သက်တမ်းတိုးထားခြင်းဖြစ်ပြီး စာချုပ်သစ်အရ တစ်ပတ် ပေါင်တစ်သန်းနှင့် စာချုပ်လက်မှတ်ထိုးကြေး ပေါင်သန်း (၁၀၀) ရရှိခဲ့ကြောင်း သိရသည်။
ဘာပေသည် ရီးယဲလ်၊ လီဗာပူးလ်အသင်းများနှင့် သတင်းထွက်လျက်ရှိသည်။
