ငွေသုံးစွဲနိုင်စွမ်း ကွာဟမှုကြောင့် ကလော့ပ်၏အသင်းနှင့် မိမိကိုင်တွယ်ခဲ့သည့်အသင်းကို မနှိုင်းယှဉ်ရန် ဘင်နီတက်ဇ် ဆို

လီဗာပူးလ်အသင်းနည်းပြဟောင်း ဘင်နီတက်ဇ်က ငွေကြေးသုံးစွဲနိုင်စွမ်း ကွာဟခြင်းကြောင့် လက်ရှိနည်းပြ ယာဂန်ကလော့ပ်၏အသင်းနှင့် မိမိကိုင်တွယ်ခဲ့သည့်အသင်းကို နှိုင်းယှဉ်ခြင်းများမပြုလုပ်ရန် တောင်းဆိုခဲ့ကြောင်း သိရသည်။

ဘင်နီတက်ဇ်သည် လီဗာပူးလ်အသင်းကို ၂၀၀၄ မှ ၂၀၁၀ ခုနှစ်အထိ ခြောက်နှစ်ကြာ ကိုင်တွယ်ခဲ့ပြီး သူ၏လက်ထက်တွင် အပြောင်းအရွှေ့ဘတ်ဂျက် ပေါင်သန်း ၂၀ သာ ရရှိသော်လည်း ကလော့ပ်အနေဖြင့် အရန်ခုံအတွက်ပင် ပေါင်သန်း ၄၀ တန်ကစားသမားများကို ခေါ်ယူခွင့်ရလျက်ရှိကြောင်း ထောက်ပြခဲ့သည်။

“လူတွေက ကျွန်တော့်အသင်းကို သတိတရရှိပါတယ်။ ဒါပေမဲ့ ပေါင်သန်းတစ်ထောင်လောက် သုံးစွဲထားတဲ့ အသင်းနဲ့ နှိုင်းယှဉ်နေကြတယ်။ ဒီပမာဏက အလွန်သုံးစွဲထားတာပါ။ အရန်ခုံမှာတောင် ပေါင်သန်း ၄၀ တန် ကစားသမားတွေ ရှိနေကြတယ်။ ဒီအချက်က ကျွန်တော့်ရဲ့လီဗာပူးလ်အသင်းနဲ့ ကလော့ပ်အသင်းကို ဘာကြောင့်မနှိုင်းယှဉ်သင့်သလဲဆိုတဲ့ အဖြေပါပဲ” ဟု ဘင်နီတက်ဇ်က ပြောကြားခဲ့သည်။

လီဗာပူးလ်အသင်း အရန်ခုံတွင် ဘင်နီတက်ဇ် ပြောကြားသကဲ့သို့ပင် တန်ဖိုးမြင့်ကစားသမားများ ရှိနေပြီး နောက်ခံလူ ကိုနာတေက ပေါင် ၃၆ သန်း၊ အလယ်တန်း၌ ကီတာက ပေါင် ၅၂ သန်းနှင့် ချိန်ဘာလိန်က ပေါင် ၃၅ သန်း၊ တိုက်စစ်၌ ဖေမီနိုက ပေါင် ၂၉ သန်း နှင့် ဂျိုတာက ပေါင် ၄၁ သန်း ပေးချေခဲ့ရသည်။ ထို့ပြင် ဘင်နီတက်ဇ်က အဲဗာတန်ကို ကိုင်တွယ်ခြင်းအတွက် နောင်တမရဟု ဆိုခဲ့သည်။