ဂွာဒီယိုလာရဲ့ မန်စီးတီး နဲ့ ယာဂန်ကလော့ရဲ့ လီဗာပူး တို့ဟာ လာမည့် စနေနေ့ အီတီဟတ်မှာ တွေ့ဆုံကြမှာ ဖြစ်ပြီး ဒါဟာ ပထမနဲ့ ဒုတိယ နေရာက အသင်းတို့ရဲ့ တိုက်ပွဲပဲ ဖြစ်ပါတယ်။ အဆိုပါ နည်းပြနှစ်ဦးဟာ လက်ရှိမျိုးဆက်ရဲ့ အကောင်းဆုံး မန်နေဂျာတွေထဲက ၂ ဦး အဖြစ် သတ်မှတ်ခံထားရသူ ဖြစ်ပြီး ၎င်းတို့ရဲ့ အသင်းတွေဟာ ပြီးခဲ့တဲ့ ၆ နှစ်တာ ကာလအတွင်း အင်္ဂလန် ဘောလုံးလောကကို လွှမ်းမိုးထားခဲ့ပါတယ်။
၎င်းတို့ ၂ ဦး သက်ဆိုင်ရာ ကလပ်တွေကို ရောက်လာပြီး နောက်ပိုင်း ၂ သင်းပေါင်း အနေနဲ့ ပရီးမီးယားလိဂ်ဖလား ၆ လုံး ၊ ချန်ပီယံလိဂ်ဖလား ၂ လုံး ၊ အက်ဖ်အေဖလား ၃ လုံး နဲ့ လိဂ်ဖလား ၅ လုံး ဆွတ်ခူးထားပြီး ဖြစ်ပါတယ်။ ဒီကလပ် ၂ ခုစလုံးဟာ မန်ယူနိုက်တက်ရဲ့ အကြီးမားဆုံး ပြိုင်ဘက်တွေ ဖြစ်ပေမယ့်လည်း ကလော့နဲ့ ဂွာဒီယိုလာ တို့ရဲ့ အောင်မြင်မှု နဲ့ စွမ်းဆောင်ရည်တွေ ကတော့ ယူနိုက်တက် ပရိတ်သတ်တွေတောင် ချီးကျူးနေရပါတယ်။
ဒီထဲမှာ ဂယ်ရီနဗီးလည်း အပါအ၀င် ဖြစ်ပြီး ယူနိုက်တက် ဂန္တ၀င်က ဒီနည်းပြ ၂ ဦးထဲ့ ဘယ်သူ့ကို သူ့ရဲ့ အသင်းဟောင်းကို ကိုင်တွယ်စေချင်သလဲဆိုတာ ပြောပြလိုက်ပါတယ်။
ဘယ်သူက ဒီအချိန် ကမ္ဘာ့အကောင်းဆုံး မန်နေဂျာလဲ ဆိုတဲ့ မေးခွန်းကို နဗီးက “ကျနော် ကတော့ ယာဂန်ကလော့ လို့ပဲ ပြောမှာပါ။ ယာဂန်ကလော့ဟာ ပက်ဂွာဒီယိုလာထက် များစွာ နည်းပါးတဲ့ ဘက်ဂျက်နဲ့ အလုပ်လုပ်ခဲ့ရတာပါ။ ပက်ဂွာဒီယိုလာဟာ ပါရမီရှင် တစ်ဦး ဖြစ်ပါတယ်။ သူဟာ ကျနော် တသက်လုံး အမှတ်ရနေမယ့် သူတွေထဲက တစ်ဦး ဖြစ်ပါတယ်။
ဒါပေမယ့် ကျနော့် အတွက် ကတော့ ယာဂန်ကလော့ဟာ amazing မန်နေဂျာ တစ်ဦး ဖြစ်ပါတယ်။ မနက်ဖြန် မန်ချက်စတာယူနိုက်တက် အသင်းကို ဘယ်နည်းပြ ကိုင်တွယ်စေချင်သလဲလို့ ခင်ဗျားတို့ မေးခဲ့မယ် ဆိုရင် ကျနော် ကတော့ ယာဂန်ကလော့ လို့ပဲ ပြောမိမှာပါ။ ဒါပေမယ့် လီဗာပူး ကတော့ သူ့ကို ဘယ်တော့မှ လက်လွှတ်သွားမှာ မဟုတ်ပါဘူး။” လို့ ဆိုလိုက်ပါတယ်။
